អន្តរជាតិ
កូរ៉េខាងជើងព្រមានអាមេរិក បើហ៊ានដាក់ទណ្ឌកម្មហួសហេតុលើខ្លួន
× បន្ទាប់ពីកូរ៉េខាងជើងបានបាញ់សាកល្បងអាវុធនុយក្លេអ៊ែរលើកទីប្រាំមួយ អាមេរិកកំពុងស្វែងរកផ្លូវដាក់ទណ្ឌកម្មថ្មីលើរដ្ឋកុម្មុយនីស្ដនេះ។ ចំណែកឯកូរ៉េខាងជើងវិញក៏បានព្រមានថា បើអាមេរិកនៅតែបន្តដាក់ទណ្ឌកម្មតឹងរ៉ឹងលើប្រទេសខ្លួនទៀត អាមេរិកនឹងទទួលបានការឈឺចាប់យ៉ាងស័ក្តសមទង្វើរបស់ខ្លួនមិនខាន។
នៅថ្ងៃទី១១ ខែកញ្ញា កូរ៉េខាងជើងបានព្រមានថា អាមេរិកនឹងទទួលបានការឈឺចាប់មិនធ្លាប់មាន បើអាមេរិកបន្តដាក់ទណ្ឌកម្មធ្ងន់ៗហួសហេតុលើខ្លួនទៀត។ ការព្រមាននេះកើតឡើងស្របពេលដែលអាមេរិកកំពុងស្វែងរកទណ្ឌកម្មថ្មីដើម្បីបន្ថែមសម្ពាធលើកូរ៉េខាងជើងតាមរយៈក្រុមប្រឹក្សាសន្តិសុខ បន្ទាប់ពីរដ្ឋកុម្មុនីយស្ដនេះបានបាញ់សាកល្បងអាវុធនុយក្លេអ៊ែរលើកទី៦។
ក្នុងកិច្ចប្រជុំស្ដីពីសេចក្ដីសម្រេចថ្មីលើកូរ៉េខាងជើង អាមេរិកស្នើឲ្យក្រុមប្រឹក្សាសន្តិសុខអង្គការយល់ព្រមលើទណ្ឌកម្មថ្មីដែលខ្លួនមានបំណងដាក់លើក្រុងព្យុងយ៉ាង ទោះរងការប្រឆាំងពីចិននិងរុស្សីក្ដី។ ទណ្ឌកម្មថ្មីរបស់អាមេរិកសម្រាប់កូរ៉េខាងជើងរួមមាន បង្កកទ្រព្យសម្បត្តិលោកគីម ជុងអ៊ុន ហាមឃាត់ការនាំចេញវាយនភណ្ឌ ការបញ្ឈប់ការផ្គត់ផ្គង់ប្រេង និងការផ្ដល់បៀវត្សដល់ពលករកូរ៉េខាងជើងផង។
ទីភ្នាក់ងារព័ត៌មាន AFP បានស្រង់សម្ដីក្រសួងការបរទេសកូរ៉េខាងជើងដូច្នេះថា៖ «បើអាមេរិកនៅតែបន្តដាក់ទណ្ឌកម្មតឹងរ៉ឹងហួសហេតុលើកូរ៉េខាងជើងទៀត ក្រុងព្យុងយ៉ាងច្បាស់ជាឲ្យអាមេរិកទទួលបានវិញនូវការឈឺចាប់ដ៏ខ្លាំងក្លាបំផុត។ ចំណាត់ការថ្មីកូរ៉េខាងជើងនឹងធ្វើឲ្យអាមេរិករងការឈឺចាប់ដូចនឹងការឆ្លងកាត់កន្លងមក ហើយពិភពលោកនឹងបានឃើញថាកូរ៉េខាងជើងអាចបង្ក្រាបអាមេរិកដោយចំណាត់ការដ៏តឹងរ៉ឹងរបស់ខ្លួនបែបណាខ្លះ»។
ជុំវិញបញ្ហានេះ ក្រុងព្យុងយ៉ាងអះអាងច្រើនលើកច្រើនហើយថា ខ្លួនត្រូវការអាវុធនុយក្លេអ៊ែរដើម្បីការពារខ្លួនប៉ុណ្ណោះ ប៉ុន្តែបែរជាត្រូវអាមេរិកចោទថាចង់ប្រកាសសង្គ្រាមទៅវិញ។ នៅក្នុងពិធីជប់លៀងអបអរជោគជ័យការបាញ់គ្រាប់បែកអ៊ីដ្រូសែនកាលពីចុងសប្ដាហ៍កន្លងទៅ មេដឹកនាំកូរ៉េខាងជើង គីម ជុងអ៊ុន បានសរសើរក្រុមអ្នកវិទ្យាសាស្ត្រទាំងអស់ ហើយថែមទាំងជំរុញឲ្យពួកគេផលិតអាវុធបន្ថែមទៀតផងដែរ។
សូមរម្លឹកបន្តិចថា កាលពីថ្ងៃទី៣ខែកញ្ញា កូរ៉េខាងជើងបានជោគជ័យក្នុងការបាញ់សាកល្បងគ្រាប់បែកអ៊ីដ្រូសែនដែលជាអាវុធនុយក្លេអ៊ែរលើកទី៦របស់ខ្លួន ហើយបង្កឲ្យមានការព្រួយបារម្ភពីសំណាក់អន្តរជាតិយ៉ាងខ្លាំង។ អាមេរិកក៏ស្នើកិច្ចប្រជុំបន្ទាន់នៅក្រុមប្រឹក្សាសន្តិសុខដើម្បីអនុម័តទណ្ឌកម្មថ្មីដែលខ្លួនត្រៀមរួចជាស្រេច៕
Tag:
កូរ៉េខាងជើង
អាមេរិក
ក្រុមប្រឹក្សាសន្តិសុខអង្គការសហប្រជាជាតិ
© រក្សាសិទ្ធិដោយ thmeythmey.com