អន្តរជាតិ
កូរ៉េខាងជើងគំរាមបាញ់ពន្លិចជប៉ុនឲ្យបាត់ក្នុងសមុទ្រហើយអាមេរិកនឹងក្លាយជាផេះ
× នៅថ្ងៃទី១៤ខែកញ្ញា កូរ៉េខាងជើងបានគំរាមថាខ្លួននឹងបាញ់នុយក្លេអ៊ែរពន្លិចជប៉ុន ហើយកម្ទេចអាមេរិកឲ្យក្លាយជាផេះ។ គណៈកម្មការសន្តិភាពអាស៊ីប៉ាស៊ីហ្វិករបស់ក្រុងព្យុងយ៉ាង បានអះអាងថា កូរ៉េខាងជើងនឹងរៀបចំសងសឹកអាមេរិកចាប់ពីពេលនេះទៅដោយកម្ទេចអាមេរិកឲ្យទៅជាផេះ ហើយមិនយូរទៀតទេ ជប៉ុននឹងលិចទៅក្នុងសមុទ្រដែរហើយ ព្រោះហ៊ានគាំទ្រការដាក់ទណ្ឌកម្មថ្មីលើខ្លួន។
បន្ទាប់ពីក្រុមប្រឹក្សាសន្តិសុខអង្គការសហប្រជាជាតិបានចេញសេចក្ដីសម្រេចថ្មីលើកូរ៉េខាងជើង នៅថ្ងៃទី១១ ខែកញ្ញា កូរ៉េខាងជើងបានព្រមានថា ជប៉ុនមិនយូរទៀតនោះទេនឹងត្រូវលិចក្នុងសមុទ្រដោយអាវុធនុយក្លេអ៊ែររបស់ខ្លួន ហើយអាមេរិកនឹងក្លាយជាផេះ។ កូរ៉េខាងជើងគំរាមបែបនេះ ក៏ដោយសារតែប្រទេសទាំងពីរនេះបានគាំទ្រការដាក់ទណ្ឌកម្មថ្មីលើកូរ៉េខាងជើង។
«ជប៉ុនគួរតែលិចចូលក្នុងសមុទ្រដោយអាវុធនុយក្លេអ៊ែរ។ ដូច្នេះហើយ មិនយូរនោះទេ ជប៉ុននឹងមិននៅជិតយើងទៀតឡើយ។ ចាប់ពីពេលនេះ យើងក៏នឹងសងសឹកដោយធ្វើឲ្យអាមេរិកក្លាយជាផេះដែរ»។ នេះជាការប្រកាសរបស់គណៈកម្មការសន្តិភាពក្រុងព្យុងយ៉ាងនៅថ្ងៃទី១៤ ដែលស្រង់ដោយទីភ្នាក់ងារព័ត៌មាន Reuters ។
កូរ៉េខាងជើងខឹងច្រឡោតយ៉ាងខ្លាំងនឹងទណ្ឌកម្មថ្មី ហើយក៏បានសន្យាថាបង្កើនការអភិវឌ្ឍបន្ថែមកម្មវិធីនុយក្លេអ៊ែររបស់ខ្លួន ថែមទាំងគំរាមកម្ទេចជប៉ុន កូរ៉េខាងត្បូងនិងអាមេរិកផងដែរ។ កូរ៉េខាងជើងក៏រិះគន់ជប៉ុនដែលស្ដាប់តាមបញ្ជាអាមេរិក។ កូរ៉េខាងជើងបានរំឭកសកម្មភាពរបស់ជប៉ុនសម័យសង្គ្រាម និងអះអាងថា ជប៉ុនមិនបានសូមទោសដោយស្មោះពីសកម្មភាពរបស់ខ្លួន ដូចនេះជប៉ុនមិនគួរទទួលបានការលើកលែងទោសឡើយ។
ឆ្លើយតបការគំរាមរបស់កូរ៉េខាងជើង មន្ត្រីរដ្ឋាភិបាលជប៉ុន លោក Yoshihide Suga បានពាក្យគំរាមកំហែងនេះថា ជាសកម្មភាពបង្កការក្ដៅក្រហាយ និងអាក្រក់ខ្លាំងណាស់។ លោកបន្តថា ការគំរាមកំហែងរបស់ក្រុងព្យុងយ៉ាងជាអ្វីមិនអាចទទួលយកបាន ហើយភាពតានតឹងក្នុងតំបន់នឹងកើនឡើង។
កន្លងមក លោកប្រធានាធិបតី ដូណាល់ ត្រាំ ធ្លាប់បានសន្យាមិនអនុញ្ញាតិឲ្យកូរ៉េខាងជើងគំរាមអាមេរិកដោយអាវុធនុយក្លេអ៊ែរទៀតឡើយ។ អាមេរិកបានស្នើសុំចិនដែលជាសម្ព័ន្ធមិត្តកូរ៉េខាងជើងឲ្យបញ្ឈប់ក្រុងព្យុងយ៉ាង ស្របពេលដែលចិនក៏បានគាំទ្រសេចក្ដីសម្រេចថ្មីរបស់អង្គការសហប្រជាជាតិផងដែរ។
សូមរម្លឹកបន្តិចថា ក្រុមប្រឹក្សាសន្តិសុខអង្គការសហប្រជាជាតិនៅដើមសប្ដាហ៍នេះបានយល់ព្រមជាឯកច្ឆន្ទក្នុងការដាក់ទណ្ឌកម្មថ្មីលើកូរ៉េខាងជើង។ ទណ្ឌកម្មថ្មីនេះរួមមានហាមឃាត់ការនាំចេញវាយនភណ្ឌ និងការកាត់ផ្ដាច់ការផ្គត់ផ្គង់ប្រេងឆៅផងដែរ៕
Tag:
កូរ៉េខាងជើង
ជប៉ុន
អាមេរិក
© រក្សាសិទ្ធិដោយ thmeythmey.com