កីឡាជាតិ
ការប្រកួតប្រណាំងកង់ឡើងភ្នំពានរង្វាន់ SMART ឆ្នាំ២០១៣ ចាប់ផ្តើមនៅថ្ងៃទី២១ ដូចឆ្នាំកន្លងទៅដែរ កាប្រណាំងកង់ឡើងភ្នំពានរង្វាន់ SMART ឆ្នាំ២០១៣ នឹងប្រព្រឹត្ត ទៅចំនួន៥ជុំ លើទីតាំង៥កន្លែងខុសៗគ្នាផងដែរ ដោយការប្រណាំងនៅជុំទី១ នឹងធ្វើឡើងនៅ ថ្ងៃទី ២១ ខែមេសា ឆ្នាំ២០១៣ នៅតំបន់កោះដាច់ខាងមុខនេះ។
តាមរយ:សន្និសីទសារព័ត៌មាននៅទីស្នាក់ការគណ:កម្មាធិការជាតិអូឡាំពិកកម្ពុជា ព្រឹកមិញនេះ សហព័ន្ធប្រណាំងទោចក្រយានកម្ពុជា បានប្រកាសថាការប្រណាំងកង់នៅជុំទី១ នឹងធ្វើនៅថ្ងៃទី២១ ខែមេសា ឆ្នាំ២០១៣ នៅតំបន់រមណីដ្ឋានកោះដាច់ ដោយសង្ឃឹមថា នឹង មានកីឡាករ កីឡាការិនីជនជាតិខ្មែរ និងបរទេសចូលរួមជិត ២០០នាក់ ដោយបែងចែកជា ៨វិញ្ញាសា (មានតាំងពីអ្នក ចេះជិះដើម្បីកម្សាន្តរហូតដល់កម្រិតអាជីព) ខណ:កាលពីឆ្នាំ ២០១២ មានតែ១៥០នាក់ប៉ុណ្ណោះ។
ដោយយោងតាមប្រសាសន៍លោក អ៊ីវ ព្យែរកាទ្រី អគ្គលេខាធិការរងសហប័ន្ធកីឡា ទោចក្រយាន និងជាអ្នករៀបចំកម្មវិធីនៃការប្រកួតបានឲ្យដឹងថា ការប្រណាំងនេះជាការ ប្រណាំងបែបឆ្លងកាត់ឧបសគ្គ (Cross Country Racing) ជាប្រភេទវិញ្ញា សាកីឡាអូឡាំពិកនា ឆ្នាំ១៩៩៦ ហើយវិញ្ញាសាប្រណាំងកង់ឆ្លងកាត់ឧបសគ្គនេះ ធ្វើឡើងនៅលើប្រភេទផ្លូវដែល មានស្ថានភាពលំបាក ចុះទឹក ឆ្លងអូរ ឡើងភ្នំ ចុះភ្នំ ឆ្លងកាត់ផ្លូវលំតូចធំជាដើម តែមានសភាព សប្បាយរីករាយ។
លោកបានបន្តទៀតថា សម្រាប់ការប្រណាំងនៅជុំទី១ ដែលធ្វើឡើងនៅតំបន់រមណី ដ្ឋានកោះដាច់ ជាប្រភេទផ្លូវដែលមានលក្ខណ:លំបាក និងងាយស្រួល ដែលសមស្របតាម សមត្ថភាព នៃប្រភេទកីឡាករ ម្នាក់ៗ និងក្នុងគោលបំណងទាក់ទាញកីឡាករឲ្យចូលរួមឲ្យ បានច្រើន។
ចំពោះកាលវិភាគនៃការប្រកួតរួមមាន
លើកទី១ ថ្ងៃទី២១ ខែមេសា ឆ្នាំ ២០១៣ នៅកោះដាច់
លើកទី២ ថ្ងៃទី១៩ ខែឧសភា ឆ្នាំ២០១៣ នៅខេត្តកែប
លើកទី៣ ថ្ងៃទី១៩ ខែមិថុនា ឆ្នាំ២០១៣ នៅព្រែកលៀប
លើកទី៤ ថ្ងៃទី៤ ខែកក្កដា ឆ្នាំ២០១៣ នៅភ្នំលៀប
លើកទី៥ ថ្ងៃទី៣ ខែវិច្ឆិកា ឆ្នាំ២០១៣ នៅភ្នំបាសិត៕ © រក្សាសិទ្ធិដោយ thmeythmey.com