ប្រជាជនកូរ៉េខាងជើងរាប់លាននាក់គាំទ្រសង្គ្រាមប្រឆាំងអាមេរិក

អន្តរជាតិ

ប្រជាជនកូរ៉េខាងជើងរាប់លាននាក់គាំទ្រសង្គ្រាមប្រឆាំងអាមេរិក

29, Sep 2017 , 5:27 pm

រូបភាព

ដោយ:

ប្រជាជនកូរ៉េខាងជើង៤,៧លាននាក់បានស្ម័គ្រចិត្តចូលជាយោធា បន្ទាប់ពីមេដឹកនាំរបស់ខ្លួនប្រកាសថា កូរ៉េខាងជើងនឹងបង្ក្រាបអាមេរិក។ ក្រុងព្យុងយ៉ាងបានអះអាងថា ការស្ម័គ្រចិត្តចូលរួមជាយោធានេះជាផ្នែកមួយនៃយុទ្ធនាការផ្សព្វផ្សាយដើម្បីជំរុញសាមគ្គីភាពរបស់កូរ៉េខាងជើង។

ប្រជាជនកូរ៉េខាងជើងចំនួន៤,៧លាននាក់បានស្ម័គ្រចិត្តចុះឈ្មោះជាយោធាបន្ទាប់ពីមេដឹកនាំរបស់ខ្លួនគីម ជុងអ៊ុន បានប្រកាសបង្ក្រាបអាមេរិក។ ក្នុងចំណោមនេះ គេឃើញមានស្ដ្រី ១,២២លាននាក់ និងយុវជនជាច្រើនលាននាក់ទៀត។ ការចុះឈ្មោះចូលជាយោធាដោយស្ម័គ្រចិត្តរបស់ប្រជាជនកូរ៉េខាងជើងពេលនេះជាផ្នែកមួយនៃយុទ្ធនាការផ្សព្វផ្សាយដើម្បីជំរុញសាមគ្គីភាពរបស់ក្រុងព្យុងយ៉ាង។

បើតាមទីភ្នាក់ងារព័ត៌មាន South China Morning Post មេដឹកនាំកូរ៉េខាងជើង គីម ជុងអ៊ុន កាលពីថ្ងៃទី២១ ខែកញ្ញា បានប្រកាសដូច្នេះថា៖ «ខ្ញុំប្រាកដណាស់ថានឹងកម្ទេចអាមេរិកដោយអាវុធនុយក្លេអ៊ែរ»។ លោកគីម ជុងអ៊ុន បានប្រកាសបែបនេះក្រោយពេលប្រធានាធិបតីអាមេរិក ដូណាល់ ត្រាំ បានអះអាងនៅមហាសន្និបាតអង្គការសហប្រជាជាតិថា លោកនឹងប្រើចំណាត់ការយោធាដើម្បីការពារអាមេរិក និងសម្ព័ន្ធរបស់ខ្លួន។

ដោយឡែក ចិនដែលជាសម្ព័ន្ធមិត្តជិតស្និទ្ធរបស់កូរ៉េខាងជើងក៏បានបញ្ជាឲ្យក្រុមហ៊ុនកូរ៉េខាងជើងនៅចិនបិទបណ្ដោះអាសន្ន បន្ទាប់ពីអង្គការសហប្រជាជាតិបានចេញសេចក្ដីសម្រេចដាក់ទណ្ឌកម្មលើកូរ៉េខាងជើងនៅថ្ងៃទី១២ ខែកញ្ញា។ ចំណែកឯម៉ាឡេស៊ីវិញបានហាមប្រាមប្រជាជនខ្លួនក្នុងការធ្វើដំណើរទៅកូរ៉េខាងជើង ដរាបណាស្ថានភាពតានតឹងនៅឧបទ្វីបកូរ៉េនៅមិនទាន់ត្រលប់មកធម្មតាវិញ។

នៅមុននេះ កូរ៉េខាងជើងក៏បានរៀបចំការប្រមូលផ្ដុំប្រជាជនរាប់ពាន់នាក់ដើម្បីសម្ដែងការប្រឆាំងសម្ដីប្រធានាធិបតី ដែលគំរាមកម្ទេចកូរ៉េខាងជើង ក៏ដូចជាគាំទ្រការឆ្លើយតបវិញរបស់មេដឹកនាំក្រុងព្យុងយ៉ាងផងដែរ។ នេះជាទម្លាក់ដែលគេតែងឃើញជាញឹកញាប់ ពេលថ្នាក់ដឹកនាំកូរ៉េខាងជើងចេញសេចក្ដីថ្លែងការណ៍ម្ដងៗ។

សង្គ្រាមពាក្យសម្ដីរវាងអាមេរិក និងកូរ៉េខាងជើង កើនកម្ដៅខ្លាំង តាំងពីការថ្លែងរបស់លោក ត្រាំ នៅក្នុងកិច្ចប្រជុំមហាសន្និបាតអង្គការសហប្រជាជាតិ។ គូសត្រូវទាំងពីរមានគំរាមគ្នាទៅវិញទៅមក ដោយកូរ៉េខាងជើងគំរាមបាញ់មីស៊ីលដាក់អាមេរិក ឯអាមេរិកវិញក៏ឆ្លើយតបវិញថា ជម្រើសយោធារបស់ខ្លួន នឹងធ្វើឲ្យកូរ៉េខាងជើងវិនាសមិនខាន៕