ចិនជួយសង់មន្ទីរពិសោធន៍រ៉ែ តម្លៃ ២.៥លានដុល្លារ នៅខេត្តកំពង់ឆ្នាំង

ជាតិ

ចិនជួយសង់មន្ទីរពិសោធន៍រ៉ែ តម្លៃ ២.៥លានដុល្លារ នៅខេត្តកំពង់ឆ្នាំង

01, Oct 2017 , 8:30 pm

រូបភាព

ដោយ:

ភ្នំពេញ៖ ចិនជួយសាង់សង់មន្ទីរពិសោធន៍ភូគព្ភសាស្ត្រជាតិនៅខេត្តកំពង់ឆ្នាំង ដែលចំណាយទឹកប្រាក់ជាង២លានដុល្លារ។ មន្ទីរពិសោធន៍នេះ នឹងជួយកម្ពុជាឲ្យមានកន្លែងពិសោធន៍អំពីធនធានរ៉ែរបស់ខ្លួន ដោយមិនចាំបាច់យកសំណាកទៅពិសោធន៍នៅក្រៅបរទេសដូចសព្វមួយដងទៀតឡើយ។

កម្ពុជា និងចិន បានប្រារព្ធពិធីបញ្ចុះបឋមសិលាបើកការដ្ឋានសាង់សង់មន្ទីរពិសោធន៍ភូគព្ភសាស្ត្រជាតិ មានទីតាំងស្ថិតនៅឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ដែលមានតម្លៃ ២.៥លានដុល្លារ។ ការសាងសង់មន្ទីរពិសោធន៍ភូគព្ភសាស្ត្រនេះ បានចេញជាផ្លែផ្កាក្រោយអតីតក្រសួងឧស្សាហកម្ម រ៉ែ និងថាមពល របស់កម្ពុជា និង ក្រសួងដែនដី និងធនធាននៃប្រទេសចិន បានចុះអនុស្សារណៈ យោគយល់គ្នា(MoU)កាលពីឆ្នាំ២០១១។ នេះបើតាមសេចក្តីប្រកាសព័ត៌មាន របស់ក្រសួងរ៉ែ និងថាមពល ដែលបានផ្សព្វផ្សាយកាលពីថ្ងៃទី២៧ ខែកញ្ញា។

បើតាមសេចក្តីប្រកាសខាងលើ ការសាងសង់មន្ទីរពិសោធន៍នេះ នឹងជួយដល់កម្ពុជា ឲ្យមានកន្លែងពិសោធន៍ និងធ្វើតេស្តលើសំណាកគំរូភូគព្ភសាស្ត្រនានា ដូចជា ទឹក ដី ថ្ម និងរ៉ែ ដែលជួយក្នុងការសិក្សាស្រាវជ្រាវសក្តានុពលធនធានរ៉ែ និងការវាយតម្លៃប្រកបដោយប្រសិទ្ធិភាពនៅក្នុងទឹកដីរបស់ខ្លួន។ មន្ទីរពិសោធន៍នេះ នឹងជួយកាត់បន្ថយការខាតបង់រូបិយវត្ថុ និងពេលវេលាក្នុងការនាំចេញសំណាកគំរូភូគព្ភសាស្ត្រទៅវិភាគ និងធ្វើតេស្តនៅបរទេស ខណៈដែលកម្ពុជាពុំទាន់មានមន្ទីរពិសោធន៍ប្រភេទនេះ កាលពីពេលកន្លងមក។

សេចក្តីប្រកាសដដែល ឲ្យដឹងបន្ថែមថា មន្ទីរពិសោធន៍នេះ នឹងសាងសង់លើផ្ទៃដី១៤០០០ម៉ែត្រក្រឡា និងប្រើពេលវេលាសាងសង់៣ឆ្នាំ ហើយពេលសាងសង់រួចរាល់ នឹងត្រូវប្រគល់ឲ្យក្រសួងរ៉ែ និងថាមពលជាអ្នកគ្រប់គ្រង។ ទន្ទឹមនោះដែរ ការសាងសង់មន្ទីរពិសោធន៍ ការបំពាក់សម្ភារបរិក្ខារវិភាគ និងការបណ្តុះបណ្តាលពីការវិភាគដល់មន្ត្រីកម្ពុជា គឺជាការចំណាយទាំងស្រុងរបស់ភាគីចិន៕