កីឡាជាតិ
ជាតិ
បុណ្យសមុទ្រ ប្រារព្ធនៅចុងខែធ្នូ ក្នុងខេត្តកែប រូបភាពពីហ្វេសប៊ុកក្រសួងទេសចរណ៍២
×
រដ្ឋាភិបាល បានកំណត់យកខេត្តកែប ដើម្បីប្រារព្ធពិធីបុណ្យសមុទ្រ ចាប់ពីថ្ងៃទី២២ ដល់ថ្ងៃទី២៤នៅខែធ្នូ។ ការសម្រេចនេះ ធ្វើឡើងក្នុងកិច្ចប្រជុំរវាងរដ្ឋមន្ត្រីក្រសួងទេសចរណ៍ អភិបាលខេត្តកែប ភាគីពាក់ព័ន្ធ ដែលវិស័យឯកជន និងដៃគូអភិវឌ្ឍន៍កាលពីថ្ងៃ ទី២៧ ខែកញ្ញា។ នេះបើតាមហ្វេសប៊ុកក្រសួងទេសចរណ៍ ដែលបញ្ជាក់ដែរថា សម្ដេច ហ៊ុន សែន នឹងអញ្ជើញបើកប្រារព្ធពិធីបុណ្យសមុទ្រ នេះដែរ។
បើតាមប្រភពដដែលក្នុងកិច្ចប្រជុំនេះ លោក ថោង ខុន រដ្ឋមន្ត្រីទេសចរណ៍ បានណែនាំឲ្យអាជ្ញាធរខេត្ត រៀបចំហេដ្ឋារចនាសម្ព័ន្ធនានាក្នុងខេត្តរៀបចំកន្លែងកម្សាន្ត ចំណតយានយន្ត ក៏ដូចជាជំរុញការងារបង្កើតបង្គន់អនាម័យ និងបង្គន់ចល័ត និងទីតាំងពាក់ព័ន្ធដទៃទៀត សម្រាប់ព្រឹត្តិការណ៍បុណ្យសមុទ្រនេះ។ ទន្ទឹមនឹងនេះ ការបណ្តុះបណ្តាល និងពង្រឹងគុណភាពសេវាកម្មទេសចរណ៍ក៏ត្រូវរៀបចំឲ្យល្អផងដែរ ព្រមទាំងបំផុស និងណែនាំប្រជាពលរដ្ឋក្នុងខេត្ត ឲ្យរៀបចំ និងតុបតែងគេហដ្ឋានរបស់ខ្លួនឲ្យបានស្អាត សម្រាប់ជួលឲ្យភ្ញៀវទេសចរ ដែលនឹងទៅចូលរួមពិធីនេះ។ អាជ្ញាធរខេត្ត ក៏ត្រូវអភិវឌ្ឍន៍ផលិតផលទេសចរណ៍ថ្មីៗឲ្យបានច្រើន ដើម្បីទាក់ទាញទេសចរ ឲ្យទៅចូលរួមក្នុងពិធីបុណ្យសមុទ្រ នៅចុងឆ្នាំ២០១៧នេះ។ ទស្សនីយភាពសិល្បៈ កម្មវិធីកម្សាន្ត និងកីឡាជាច្រើនទៀត នឹងមានវត្តមាននៅក្នុងពិធីបុណ្យសមុទ្រនេះ ដូចការរៀបចំកាលពីឆ្នាំកន្លងមកដែរ។
សូមរម្លឹកថា មានភ្ញៀវទេសចរជាតិ និងអន្តរជាតិ ចូលរួមប្រមាណ៥០ម៉ឺននាក់ ក្នុងព្រឹត្តិការណ៍បុណ្យសមុទ្រកាលពីឆ្នាំ២០១៦ ដែលរៀបចំនៅខេត្តព្រះសីហនុ។
កិច្ចប្រជុំនោះ អភិបាលខេត្តកែប លោក កែន សត្ថា បញ្ជាក់ថា ខេត្តកែបទទួលបានភ្ញៀវទេសចរ សរុបជាង១លាននាក់ នៅឆ្នាំ២០១៦ កើនចំនួន១.៦ ភាគរយធៀបនឹងឆ្នាំ២០១៥ ។ ដោយឡែក រយៈពេល៩ខែ ឆ្នាំនេះ កែបទួលទេសចរជាតិ និងអន្តរជាតិបានជិត១លាននាក់៕
Tag:
បុណ្យសមុទ្រ
ថោង ខុន
កែន សត្ថា
កែប
© រក្សាសិទ្ធិដោយ thmeythmey.com