លោក ឃីម សុខហេង ថាកូនអាចទម្លាក់កំហុសដាក់ឪពុកម្តាយ បើហាមកូនមិនឲ្យធ្វើការដែលគេពេញចិត្ត

ជាតិ

លោក ឃីម សុខហេង ថាកូនអាចទម្លាក់កំហុសដាក់ឪពុកម្តាយ បើហាមកូនមិនឲ្យធ្វើការដែលគេពេញចិត្ត

01, Oct 2017 , 10:39 pm

រូបភាព

ដោយ:

លោក ឃីម សុខហេង អ្នកឯកទេសផ្នែកអភិវឌ្ឍមនុស្ស និងជាស្ថាបនិកវិទ្យាស្ថានសិក្សាដើម្បីជោគជ័យយល់ថា ការបង្ខំ ឬហាមប្រាមរបស់ឪពុកម្តាយ មិនឲ្យកូនខ្លួនធ្វើការងារដែលពួកគេពេញចិត្ត ឪពុកម្តាយនោះ អាចប្រឈមនឹងការទម្លាក់កំហុសពីកូនទៅអនាគត។ លោក សុខហេង ពន្យល់ថា ការបង្ខំ ធ្វើឲ្យកូនគ្មានឆន្ទៈ ហើយក្នុងករណីកូនធ្វើតាម តែមិនជោគជ័យ ពួកគេនឹងបន្ទោសឪពុកម្តាយ។ តែផ្ទុយទៅវិញ បើពួកគេសម្រេចចិត្តដោយខ្លួនឯង នោះពួកគេនឹងខិតខំប្រឹងប្រែង និងទទួលខុសលើការសម្រេចចិត្តរបស់ខ្លួន។

លោក ឃីម សុខហេង អ្នកឯកទេសផ្នែកអភិវឌ្ឍមនុស្ស និងជាស្ថាបនិកវិទ្យាស្ថានសិក្សាដើម្បីជោគជ័យមើលឃើញថា ការហាម ឬបង្ខំកូនមិនឲ្យធ្វើការងារដែលពួកគេពេញចិត្ត ភាគីទាំង២ មានផ្នត់គំនិតខុសគ្នា។ ម្យ៉ាងព័ត៌មានដែលកូនផ្តល់ទៅឪពុកម្តាយ មិនល្មមគ្រប់គ្រាន់ ដែលអាចបញ្ចុះបញ្ចូលឪពុម្តាយពួកគេបាន។

ជាដំណោះស្រាយ អ្នកដែលជួបបញ្ហានេះគួរតែពន្យល់ហេតុផល និងបង្ហាញផែនការច្បាស់លាស់ដែលពួកគេចង់ធ្វើទៅឪពុកម្តាយខ្លួន។ បន្ថែមពីនេះ ពួកគេត្រូវរកបុគ្គលណាម្នាក់ក្នុងវិស័យ ឬអាជីពដែលខ្លួនចង់ធ្វើនោះជាគំរូ និងបើអាចត្រូវសុំការណែនាំ ឬស្នើឲ្យជនគំរូនោះ ជួយបញ្ចុះបញ្ចូលឪពុកម្តាយ។

សម្រាប់លោក ឃីម សុខហេង ឪពុកម្តាយក៏គួរបើកទូលាយចិត្តដែរឲ្យកូនធ្វើកិច្ចការតាមចំណូលចិត្ត និងទេពកោសល្យរបស់ពួកគេ ទើបកូនគាត់ មានឱកាសជោគជ័យខ្ពស់ទៅអនាគត។ លោក ឃីម សុខហេង បន្ថែមទៀតថា៖«ការបង្ខំពីឪពុកម្តាយ ធ្វើឲ្យកូនគ្មានឆន្ទៈ ហើយបើគេធ្វើតាមឪពុកម្តាយ ហើយមិនជោគជ័យ ពួកគេនឹងបន្ទោសយើងជាឪពុកម្តាយ។ ផ្ទុយទៅវិញ បើកូនសម្រេចចិត្តដោយខ្លួនឯង នោះពួកគេនឹងទទួលខុស ហើយខិតខំប្រឹងប្រែង»៕