ជាតិ
រដ្ឋាភិបាលកំណត់ថ្ងៃប្រារព្ធទិវាមនុស្សចាស់កម្ពុជា-អន្តរជាតិ នៅថ្ងៃទី១ ខែតុលា ជារៀងរាល់ឆ្នាំ
× រាជរដ្ឋាភិបាលបានបង្កើតគណៈកម្មាធិការជាតិកម្ពុជាដើម្បីមនុស្សចាស់ ក្នុងគោលដៅអនុវត្តនូវតួនាទី និងភារកិច្ចដែលមានជាអាទិ៍ រៀបចំគោលនយោបាយជាតិដើម្បីលើកស្ទួយសុខុមាលភាពមនុស្សចាស់ និងរៀបចំទិវាមនុស្សចាស់នៃកម្ពុជា ដោយកំណត់យកថ្ងៃទី១ ខែតុលា ជារៀងរាល់ឆ្នាំ ដោយរួមជាមួយទិវាមនុស្សចាស់អន្តរជាតិផងដែរ។
សារាចររបស់រដ្ឋាភិបាលស្តីពី ការរៀបចំទិវាមនុស្សចាស់កម្ពុជា និងទិវាមនុស្សចាស់អន្តរជាតិថ្ងៃទី ១ ខែតុលា បានឲ្យដឹងថា រាជរដ្ឋាភិបាលកម្ពុជាចាត់ទុកទិវាមនុស្សចាស់កម្ពុជា-អន្តរជាតិ ជាទិវាបុណ្យរម្លឹកដល់គុណូបការៈ របស់មនុស្សចាស់កម្ពុជា បុព្វការីជន ជីដូនជីតា ឪពុកម្ដាយ អ៊ំ ពូ មីង ដែលជាអ្នកកសាង និងបន្សល់ទុកនូវកេរមរតកដ៏ថ្លៃថ្លា សម្រាប់កូនចៅជំនាន់ក្រោយៗទៀត។
ដើម្បីរៀបចំទិវាមនុស្សចាស់កម្ពុជា-អន្តរជាតិ ថ្ងៃទី ១ ខែតុលា ឆ្នាំ២០១៧ ឲ្យបានទូលំទូលាយ និងផ្សព្វផ្សាយឲ្យប្រជាជនកម្ពុជាគ្រប់វ័យបានយល់ដឹងកាន់តែច្បាស់អំពីអត្ថន័យទិវានេះ ក្នុងនោះដែររាជរដ្ឋាភិបាលបានណែនាំដូចខាងក្រោម៖
ក្រសួងសង្គមកិច្ច អតីតយុទ្ធជន និងយុវនីតិសម្បទា គណៈកម្មាធិការជាតិកម្ពុជាដើម្បីមនុស្សចាស់ ត្រូវសហការជាមួយក្រសួង ស្ថាប័ន អង្គការជាតិ-អន្តរជាតិ ដែលពាក់ព័ន្ធដើម្បីចាត់តាំងពិធីអបអរសាទរទិវាមនុស្សចាស់កម្ពុជា-អន្តរជាតិ នេះឲ្យបានអធិកអធមរាល់ឆ្នាំ។ បន្ទាប់មកទៀត រាជធានី-ខេត្ត ត្រូវរៀបចំពិធីនេះ ដោយបង្កលក្ខណៈឲ្យមន្ត្រីរាជការ កងកម្លាំងប្រដាប់អាវុធគ្រប់លំដាប់ថ្នាក់ ព្រះសង្ឃ បព្វជិត លោកយាយ-តា ព្រមទាំងប្រជាជនគ្រប់វ័យបានចូលរួម ដើម្បីបង្កើនការយល់ដឹងឲ្យកាន់តែទូលំទូលាយអំពីសារៈសំខាន់នៃគោលនយោបាយជាតិមនុស្សចាស់កម្ពុជា។
ក្រសួងអប់រំ យុវជននិងកីឡា ត្រូវធ្វើសេចក្ដីណែនាំដល់គ្រប់សាកលវិទ្យាល័យ វិទ្យាស្ថាន មន្ទីរអប់រំ យុវជននិងកីឡា រាជធានី-ខេត្ត ជំរុញចលនា សិស្ស-និស្សិត ឲ្យចេះគោរពដំបូន្មានរបស់មាតាបិតា ជីដូន-តា ចាស់ព្រឹទ្ធាចារ្យ និងឲ្យយល់ដឹងអំពីការប្រែប្រួលរបស់មនុស្សចាស់ ព្រមទាំងបង្កើតកម្មវិធីម៉ោងសិក្សាចុះសួរសុខទុក្ខមនុស្សចាស់ ពិសេសនោះជួយបំពេញការងារជាឧត្តមប្រយោជន៍មនុស្សចាស់ ជរា ពិការ ក្រីក្រ ទុរគត គ្មានទីពឹង នៅក្នុងមូលដ្ឋាន ស្ថិតនៅជិតកន្លែងសិក្សារបស់ខ្លួន។
ជាមួយគ្នានេះដែរក្រសួងព័ត៌មាន ត្រូវណែនាំបណ្ដាញសារព័ត៌មានរដ្ឋ និងឯកជនទាំងអស់ផ្សព្វផ្សាយឲ្យបានទូលំទូលាយ នូវខ្លឹមសារសកម្មភាពក្នុងឱកាសទិវាមនុស្សចាស់-អន្តរជាតិ ថ្ងៃទី ១ ខែតុលា។ រីឯគ្រប់ក្រសួង ស្ថាប័ន រាជធានី-ខេត្ត ត្រូវរៀបចំបដានៅតាមអង្គភាព និងទីសាធារណៈគ្រប់ទីកន្លែង៕
Tag:
ទិវាមនុស្សចាស់កម្ពុជា-អន្តរជាតិ
© រក្សាសិទ្ធិដោយ thmeythmey.com