អន្តរជាតិ
ត្រាំ ប្រាប់រដ្ឋមន្ត្រីការបរទេសខ្លួន៖ «កុំចំណាយកម្លាំងឥតប្រយោជន៍ចរចាជាមួយ គីម ជុងអ៊ុន»
× ប្រធានាធិបតីអាមេរិក ដូណាល់ ត្រាំ បានប្រាប់រដ្ឋមន្ត្រីការបរទេសលោក រិច ធីល័រសិន ឲ្យឈប់ចំណាយកម្លាំងនិងពេលវេលាឥតប្រយោជន៍ដើម្បីចរចាជាមួយកូរ៉េខាងជើងទៀត។ លោកនិយាយបែបនេះបន្ទាប់ពីរដ្ឋមន្ត្រីការបរទេសខាងលើលើកឡើងថា វ៉ាស៊ីនតោននៅបើកទ្វារចរចាជាមួយក្រុងព្យុងយ៉ាងដដែល។
«សន្សំកម្លាំងទុកទៅ ធីល័រសិន។ យើងនឹងធ្វើអ្វីដែលគួរតែត្រូវបានធ្វើនោះ»។ នេះជាសម្តីរបស់លោក ដូណាល់ ត្រាំ ក្នុងគណនី Twitter ផ្លូវការរបស់ខ្លួនផ្តាំទៅរដ្ឋមន្ត្រីការបរទេសអាមេរិកលោក រិច ធីល័រសិន ដែលចង់ចរចាជាមួយកូរ៉េខាងជើងនោះ។
លោក ដូណាល់ ត្រាំ បានលើកឡើងបែបនេះបន្ទាប់ពីលោក ធីល័រសិនដែលកំពុងទស្សនកិច្ចនៅចិននោះបង្ហើបថា អាមេរិកនៅតែរក្សាផ្លូវសម្រាប់ទំនាក់ទំនងដោយផ្ទាល់ជាមួយកូរ៉េខាងជើងជានិច្ច ប៉ុន្តែកូរ៉េខាងជើងហាក់មិនមានចំណាប់អារម្មណ៍សោះ។ វាព័ត៌មានពាក់ព័ន្ធការចរចាជាមួយកូរ៉េខាងជើងដំបូងបំផុតដែលគេបានលឺពីមាត់សមាជិកគណៈរដ្ឋមន្ត្រីរបស់លោក ដូណាល់ ត្រាំនោះ។
លោក ត្រាំ បានសរសេរដូច្នេះ៖«ខ្ញុំបានប្រាប់លោក រិច ធីល័រសិន រដ្ឋមន្ត្រីការបរទេសដ៏អស្ចារ្យរបស់យើងរួចហើយថា គាត់កំពុងតែខ្ជះខ្ជាយពេលវេលាទៅព្យាយាមចរចាជាមួយបុរសគ្រាប់រ៉ុក្កែត (គីម ជុងអ៊ុន) នោះ»។
កន្លងមក លោក ដូណាល់ ត្រាំ បានផ្តោះប្តូរពាក្យសម្តីគំរាមកំហែង និងប្រមាថគ្នាទៅវិញទៅមកជាមួយមេដឹកនាំកូរ៉េខាងជើងលោក គីម ជុងអ៊ុន ហើយវាបានបង្កឲ្យមានភាពតានតឹងខ្លាំងផងដែរ។ មិនត្រឹមតែប៉ុណ្ណោះ លោក ដូណាល់ ត្រាំ ថែមទាំងបានទិតៀនបណ្តាអតីតប្រធានាធិបតីមុនៗថែមទៀតផងពាក់ព័ន្ធការបណ្តែតបណ្តោយឲ្យកូរ៉េខាងជើងឡើងចាងនិងមាននុយក្លេអ៊ែរបែបនេះ។
យ៉ាងណាមិញពាក្យសម្តីរបស់លោក ដូណាល់ ត្រាំ ដែលប្រាប់ឲ្យលោក ធីល័រសិន ឈប់ចំណាយពេលចរចាបានក្លាយជារឿងចម្រូងចម្រាសផងដែរ។ គេចោទជាសំណួរថា បើមិនចរចាមានន័យថា ត្រាំកំពុងគិតចង់ធ្វើសង្គ្រាម។ប៉ុន្តែមន្ត្រីសេតវិមានព្យាយាមបន្ធូរបន្ថយស្ថានការណ៍។
យោងតាមទីភ្នាក់ងារព័ត៌មាន AFP មន្ត្រីជាន់ខ្ពស់សេតវិមានម្នាក់ដែលមិនបង្ហាញអត្តសញ្ញាណបានលើកឡើងថា វាជារឿងធម្មតាទេដែលប្រធានាធិបតីលើកឡើងដូច្នេះព្រោះកូរ៉េខាងជើងមិនបានឈប់បង្ករឿងឡើយ។ មន្ត្រីរូបនេះបន្តថា៖« នៅពេលដែលកូរ៉េខាងជើងបន្តបង្ករឿង ប្រធានាធិបតីមិនគិតថា វាជាពេលដែលត្រូវចរចាឡើយ»។
ចំណែកទីប្រឹក្សាលោក រិច ធីល័រសិន R.C Hammond ឯណោះវិញបានពន្យល់ផងដែរពីផ្លូវសម្រាប់ការទាក់ទងរវាងអាមេរិកនិងកូរ៉េខាងជើងបើកចំហរយកហើយ ប៉ុន្តែវាមិនត្រូវបានប្រើប្រាស់សោះ។ រីឯអ្នកនាំពាក្យក្រសួងការបរទេសអាមេរិក Heather Nauert ក៏លើកឡើងស្រដៀងគ្នាដែរថា ផ្លូវការទូតនៅបើកចំហរសម្រាប់ គីម ជុងអ៊ុន នៅពេលបច្ចុប្បន្ន ប៉ុន្តែវាមិនមែនបើកចំហររហូតឡើយ៕
Tag:
ដូណាល់ ត្រាំ
រិច ធីល័រសិន
គីម ជុងអ៊ុន
© រក្សាសិទ្ធិដោយ thmeythmey.com