អន្តរជាតិ
ស្រីលង្ការចាត់វិធានការប្រឆាំងសង្ឃជ្រុលនិយម ដែលប្រើហិង្សាបំពានជនភៀសខ្លូនរ៉ហ៊ីងយ៉ា
× រដ្ឋាភិបាលស្រីលង្ការបានសម្រេចចាត់វិធានការប្រឆាំងលោកសង្ឃជ្រុលនិយមដែលបង្កឲ្យមានអំពើហិង្សាប្រឆាំងជនជាតិភាគតិចឥស្លាមរ៉ូហ៊ីងយ៉ាដែលភៀសខ្លួនទៅកាន់ស្រីលង្ការនោះ។ អ្នកគាំទ្រសង្ឃជ្រុលនិយមប្រាំមួយនាក់ត្រូវបានអាជ្ញាធរចាប់ខ្លួនរួចទៅហើយ ហើយអាជ្ញាធរនឹងចាប់ខ្លួនសង្ឃទាំងនោះបន្តទៀត។
បន្ទាប់ពីអំពើហិង្សាប្រឆាំងជនភៀសខ្លួនមីយ៉ាន់ម៉ារ៉ូហ៊ីងយ៉ាកើតឡើងនៅកូឡុំបូ រដ្ឋាភិបាលស្រីលង្ការបន្តដុតដៃដុតជើងស្វែងរកជនបង្ក និងនាំពួកគេមកផ្តន្ទាទោសតាមផ្លូវច្បាប់ដែរ។ បច្ចុប្បន្ននេះអាជ្ញាធរចាប់ខ្លួនក្រុមបង្កបាន ប្រាំមួយនាក់ហើយ ហើយអាជ្ញាធរក៏កំពុងតាមចាប់ខ្លួនលោកសង្ឃជ្រុលនិយមទាំងនោះបន្ថែមទៀតដែរ។
ទីភ្នាក់ងារព័ត៌មាន AFP បានស្រង់សម្តីមន្ត្រីប៉ូលិសស្រីលង្ការដែលសុំមិនបង្ហាញអត្តសញ្ញាណដូច្នេះ៖ «យើងបានកំណត់អត្តសញ្ញាណលោកសង្ឃដែលបង្កឲ្យមានហិង្សាទាំងនោះរួចរាល់ហើយ។ យើងក៏បានបញ្ជូនក្រុមការងារបីក្រុមទៅចាប់ពួកគេផងដែរ» ។
សូមបញ្ជាក់បន្តិចដែរ ក្រោយមានការវាយប្រហារលើជនភៀសខ្លួនរ៉ូហ៊ីងយ៉ាកាលពីថ្ងៃអង្គារនៅតំបន់ជាយក្រុងកូឡុំបូ រដ្ឋាភិបាលស្រីលង្ការក៏បានចេញថ្កោលទោសសង្ឃជ្រុលនិយម និងចាត់ទុកពួកគេជាសត្វផងដែរ។
អំពើហិង្សាប្រឆាំងប្រជាជនរ៉ូហ៊ីងយ៉ានេះកើតឡើងដោយមានការចូលរួមពីក្រុមអ្នកគាំទ្រសង្ឃជ្រុលនិយម ដោយពួកគេគប់ដុំថ្មជាដើម ហើយហិង្សានេះក៏បានបណ្តាលឲ្យប៉ូលិសពីរនាក់រងរបួសធ្ងន់ផងដែរ។
រដ្ឋាភិបាលស្រីលង្ការបានបង្ហើបថា មនុស្សប្រុសប្រាំនាក់ និងស្ត្រីម្នាក់ត្រូវបានគេចាប់ខ្លួនរួចរាល់ដែរ ហើយមន្ត្រីប៉ូលិសជាច្រើននាក់ក៏កំពុងស្ថិតក្រោមការស៊ើបអង្កេតផងដែរដោយសារពួកគេមិនចាត់វិធានការទប់ស្កាត់អំពើហិង្សានេះផងដែរ។
តាមពិតទៅស្រីលង្ការជាប្រទេសមានប្រជាជនភាគច្រើនកាន់សាសនាព្រះពុទ្ធ ហើយសង្ឃដែលជ្រុលនិយមបង្កហិង្សាប្រឆាំងប្រជាជនរ៉ូហ៊ីងយ៉ានេះក៏មានទំនាក់ទំនងជិតស្នទ្ធិជាមួយក្រុមសង្ឃជ្រុលនិយមនៅមីយ៉ាន់ម៉ាដូចគ្នា។ ក្រុមសង្ឃទាំងពីរត្រូវបានគេចោទប្រកាន់ថា បានព្យាយាមបញ្ឆេះហិង្សា និងកំហឹងប្រឆាំងប្រជាជនឥស្លាមជាជនជាតិភាគតិចនោះ៕
Tag:
ស្រីលង្ការ
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com