អន្តរជាតិ
យ៉ាងហោច ៥០នាក់ស្លាប់ និង ២០០នាក់របួសក្នុងករណីបាញ់ប្រហារនៅក្រុង Las Vegas
រូបភាព៖ Getty Images
×![]()
ដោយ: ថ្មីៗ
មនុស្សច្រើនជាង៥០នាក់ស្លាប់ និងជាង ២០០នាក់រងរបួសក្នុងការបាញ់ប្រហារមួយលើហ្វូងមនុស្សដែលកំពុងចូលរួមក្នុងកម្មវិធីរាត្រីសមោសរមួយនៅក្នុង ទីក្រុងLas Vegas។ ខ្មាន់កាំភ្លើងនោះត្រូវបានប៉ូលិសកំណត់អត្តសញ្ញាណ ហើយគេមានឈ្មោះថា Stepen Paddock។
សារព័ត៌មានអាមេរិក New York Times បានផ្សាយថា មនុស្សស្លាប់ក្នុងករណីបាញ់រះនៅកម្មវិធីរាត្រីសមោសរមួយដែលមានការចូលរួមពីតារាចម្រៀង Jason Aldean នៅក្នុងក្រុង Las Vegas កើនឡើងដល់ច្រើនជាង ៥០នាក់ហើយ។ ចំណែកអ្នកដែលរងរបួសវិញនោះ កើនដល់ច្រើនជាង ២០០នាក់ឯណោះ។
Joseph Lombardo មន្ត្រីប៉ូលិសប្រចាំស្រុក Clark បានបញ្ជាក់ប្រាប់អ្នកកាសែតថា មនុស្សដែលស្លាប់កើនឡើងលើស ៥០នាក់ ហើយខ្មាន់កាំភ្លើងនោះត្រូវបានគេកំណត់អត្តសញ្ញាណបានហើយ។ គេមានឈ្មោះថា Stepen Paddock មានវ័យ ៦៤ ឆ្នាំ ហើយត្រូវបានប៉ូលិសសម្លាប់ក្រោយធ្វើសកម្មភាពនៅសណ្ឋាគារ Mandalay Bay។
បើតាមមន្ត្រីនៅកន្លែងកើតហេតុ ការបាញ់ប្រហារនេះកើតឡើងនៅម៉ោង ១០៖ ០៨នាទីយប់។ ខ្មាន់កាំភ្លើងប្រើប្រាស់កាំភ្លើងយន្តបាញ់ចេញពីបន្ទប់សណ្ឋាគារមួយនៅក្បែរ ហើយនៅពេលគេបាញ់ប្រហារនោះ តន្ត្រីដែលកំពុងប្រគំនោះឈប់ ហើយអ្នកចូលរួមបានស្រែកឲ្យមនុស្សម្នារក្រាបចុះផងដែរ។
ប៉ូលិសកំពុងស្រាវជ្រាវនៅឡើងពាក់ព័ន្ធករណីវាយប្រហារនេះនិងមិនមានការអះអាងថា វាជាករណីអ្វីឲ្យពិតប្រាកដឡើយ។ ប៉ូលិសជឿជាក់ថា វាមិនមានខ្មាន់កាំភ្លើងផ្សេងទៀតឡើយ ក្រៅពីជនឈ្មោះ Paddock នោះ៕
© រក្សាសិទ្ធិដោយ thmeythmey.com
