ជាតិ
បទល្មើសនេសាទពិបាកបង្ក្រាបដោយសារឈ្មួញខ្លះមានខ្នងបង្អែក រូបថត៖ ហ្វេសប៊ុករដ្ឋបាលជលផល
× ភ្នំពេញ៖ លោក ឱម សាវ៉ាត នាយកប្រតិបត្តិសម្ព័ន្ធភាពដើម្បីអភិរក្សធនធានជលផល(Fact) និងតំណាងសហគមន៍នេសាទ បានប្រាប់សារព័ត៌មានថ្មីៗថា មូលហេតុដែលធ្វើឲ្យបទល្មើសនេសាទនៅតែបន្តកើតមាន គឺបណ្តាលមកពីអំពើពុករលួយ។ ពួកគេ ពន្យល់ថា អាជ្ញាធរនៅមូលដ្ឋានមួយចំនួន បានធ្វើជាខ្នងបង្អែករបស់ឈ្មួញក្នុងការប្រព្រឹត្តបទល្មើសនេសាទ។
ក្នុងសិក្ខាសាលាមួយនៅភ្នំពេញ ដែលមានមន្ត្រីជាន់ខ្ពស់របស់រដ្ឋបាលជលផលនៃក្រសួងកសិកម្ម ក្រសួងមហាផ្ទៃ អង្គការសង្គមស៊ីវិល និងប្រធានសហគមន៍នេសាទ បានលើកឡើងពីបញ្ហាប្រឈម និងឧបសគ្គក្នុងការបង្ក្រាបបទល្មើសនេសាទ ដែលធ្វើឲ្យត្រីថយចុះ និងប៉ះពាល់ដល់ជីវភាពអ្នកនេសាទ។
តំណាងសហគមន៍នេសាទមកពីខេត្តក្រចេះ ភ្នំពេញ និងសហគមន៍នេសាទជុំវិញបឹងទន្លេសាប បានលើកឡើងដូចៗគ្នាថា អ្នកប្រព្រឹត្តបទល្មើស នៅតែរួចផុតពីសំណាញ់ច្បាប់ ហើយពួកគេបានឃុតឃិតគ្នាជាមួយអាជ្ញាធរមូលដ្ឋាន ដើម្បីប្រព្រឹត្តបទល្មើសនេសាទ។ ពួកគេ បានស្នើឲ្យអាជ្ញាធរថ្នាក់ជាតិ ពិនិត្យលើកូនចៅក្រោមបង្គាប់របស់ខ្លួន ដើម្បីចាត់វិធានការតាមផ្លូវច្បាប់ ជាការព្រមានដល់អ្នកប្រព្រឹត្តបទល្មើលនេសាទដទៃទៀត។
ឆ្លើយតបនឹងការលើកឡើងខាងលើ លោក អេង ជាសាន ប្រធានរដ្ឋបាលជលផល បានប្រាប់ ប្រធានសហគមន៍ ដែលឃើញបទល្មើសនេសាទ រាយការណ៍បន្ទាន់ទៅនគរបាលយុត្តិធម៌ប្រចាំការនៅជិតបំផុត ឬ សុំអន្តរាគមន៍ទៅថ្នាក់ស្រុក ដើម្បីចុះបង្ក្រាបអ្នកប្រព្រឹត្តបទល្មើសនេសាទ។
លោកថ្លែងយ៉ាងដូច្នេះថា៖ «សូមបងប្អូនទាក់ទងអាជ្ញាធរមូលដ្ឋាន នគរបាល និងថ្នាក់ស្រុក ដើម្បីចាត់វិធានការក្នុងបទល្មើសជាក់ស្តែង ហើយខ្ញុំនឹងបញ្ជាទៅបញ្ជាការឯកភាព ឬអធិការដ្ឋាន ដើម្បីជួយបងប្អូនក្នុងការបង្ក្រាបបទល្មើស»។
ទាក់ទងនឹងបញ្ហានេះ លោក ឱម សាវ៉ាត នាយប្រតិបត្តិសម្ព័ន្ធភាពដើម្បីអភិរក្សធនធានជលផល(Fact) ដែលជាបណ្តុំអង្គការជាតិ និងអន្តរជាតិ ធ្វើការងារលើវិស័យជលផល បានថ្លែងប្រាប់ព័ត៌មានថ្មីៗថា មូលហេតុដែលធ្វើឲ្យបទល្មើសនេសាទនៅតែបន្តកើតមានឡើង គឺបណ្តាលមកពីការអនុវត្តន៍ច្បាប់នៅមានកម្រិត និងអំពើពុករលួយនៅមូលដ្ឋាន។
សូមស្តាប់ការពន្យល់របស់លោក ឱម សាវ៉ាត ដូចតទៅ៖
បើតាមលោក ឱម សាវ៉ាត បច្ចុប្បន្ន សហគមន៍នេសាទនៅទូទាំងប្រទេសមានចំនួន៥១៦។ លោកអះអាងថា វិធានការបង្កើតជាសហគមន៍នេសាទ គឺអាចមានប្រសិទ្ធភាពច្រើន ពីព្រោះ ពួកគេ បានបង្កើតក្រុមល្បាត ដើម្បីឃ្លាំមើលបទល្មើសនេសាទ ដែលវាជាកាត់បន្ថយបទល្មើសនេសាទផងដែរ។ លោកបន្ថែមថា យុទ្ធសាស្ត្រមួយចំនួនទៀត ដូចជា ការបណ្តុះបណ្តាល និងរៀបចំសហគមន៍នេសាទឲ្យចេះកែច្នៃផលិតផលមច្ឆជាតិ បង្កើតក្រុមសន្សំ និងបង្រៀនពួកគេឲ្យបង្កើតជាតំបន់អេកូទេសចរណ៍ធម្មជាតិ គឺសុទ្ធសឹងជាវិធីជួយពួកគេ កុំឲ្យពឹងផ្អែកទាំងស្រុងលើផលនេសាទ ដែលអាច កាត់បន្ថយបទល្មើសនេសាទ បានមួយកម្រិតទៀត។
យោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ការនាំចេញផលនេសាទស្រស់រយៈពេល៥ខែដើមឆ្នាំ២០១៧ មានចំនួន៤,០៨០តោន ថយចុះ១២០តោន បើធៀបនឹងរយៈពេលដូចគ្នាកាលពីឆ្នាំមុន ខណៈការនាំចេញផលនេសាទកែច្នៃ ក្នុងរយៈពេល៥ខែឆ្នាំ២០១៧ មាន២,៣០០តោន ថយចុះចំនួន១០០តោន បើប្រៀបធៀបនឹងរយៈពេលដូចគ្នាកាលពីឆ្នាំ២០១៦៕
© រក្សាសិទ្ធិដោយ thmeythmey.com