ជាតិ
បទយកការណ៍ / បទសម្ភាសន៍
ជំនាញប្រភេទណា ទាមទារជំនាញទន់ខ្លាំង និងជំនាញណា ដែលចាំបាច់ត្រូវមានជំនាញរឹងឲ្យខ្លាំងជាង?
× លោក ឃីម សុខហេង អ្នកឯកទេសផ្នែកអភិវឌ្ឍន៍មនុស្ស និងជាស្ថាបនិកវិទ្យាស្ថានសិក្សាដើម្បីជោគជ័យ បានគូសបញ្ជាក់ថា ជំនាញទន់ និងជំនាញរឹង មានសារៈសំខាន់ណាស់ក្នុងជីវភាពរស់នៅរបស់បុគ្គលម្នាក់ៗ។ បើតាម លោក សុខហេង ដដែល មនុស្សដែលមានចំណេះជំនាញបច្ចេកទេស ឬជំនាញរឹង គួបផ្សំនឹងមានជំនាញទន់រឹងមាំទៀតនោះ ជីវិតរបស់ពួកគេមានលទ្ធភាពជោគជ័យ និងការស្រឡាញ់ចូលចិត្តច្រើនជាងបុគ្គលដែលមានជំនាញរឹងតែមួយមុខ។ ដើម្បីឲ្យការរស់នៅប្រសើរ តើចំណេះជំនាញប្រភេទណា ដែលទាមទារត្រូវមានជំនាញទន់ខ្លាំង និងតើជំនាញប្រភេទណា ដែលចាំបាច់ត្រូវមានជំនាញរឹងឲ្យខ្លាំងជាង?
ដើម្បីជ្រាបលម្អិត សូមអញ្ជើញអានបទសម្ភាស រវាងលោក ទីន សុខលីម អ្នកកាសែតនៃសារព័ត៌មានអេឡិចត្រូនិកthmeythmey.com និងលោក ឃីម សុខហេង ស្ថាបនិកវិទ្យាស្ថានសិក្សាដើម្បីជោគជ័យដូចតទៅ៖
លោក ទីន សុខលីម៖ ខ្ញុំចង់ឲ្យលោក ឃីម សុខហេង ពន្យល់ថា តើអ្វីជាជំនាញទន់?
លោក ឃីម សុខហេង៖ ជំនាញទន់ ដែលជាភាសាខ្មែរយើង ថាជំនាញទន់ និងនៅលើពិភពលោកគេស្គាល់ថា People Skills ។ ជំនាញទន់នេះ ជាជំនាញមួយដែលមានសារៈសំខាន់ ដែលទាក់ទងទៅនឹងការគិតរបស់មនុស្ស លទ្ធភាពដែលធ្វើឲ្យគេចូលចិត្តយើង ក្នុងនាមជាបុគ្គល អ្នកដឹកនាំ និងជាដៃគូជីវិត។ ជំនាញទន់នេះដែរ ដើរតួយ៉ាងសំខាន់ណាស់ ដើម្បីជំរុញការរីកចម្រើនរបស់បុគ្គល ឈានទៅរកសេចក្តីសុខ និងសុភមង្គលនៅក្នុងជីវិត។
លោក ទីន សុខលីម៖ លោក សុខហេង តើជំនាញSoft Skillsនេះ សិក្សាពីអ្វីខ្លះ?
លោក ឃីម សុខហេង៖ ជំនាញទន់ គឺទី១ រៀនអភិវឌ្ឍន៍ការគិត ដែលយើងដឹងហើយថា អភិវឌ្ឍន៍គំនិត គឺជីវិតកាន់តែប្រសើរឡើង។ ជំនាញក្នុងការគិតនេះ មែនទែនទៅ គ្មានសាលាណាមួយ ដែលបើកបង្រៀនគិត រៀនទៅដឹងតែពូកែការគិតនោះទេ ប៉ុន្តែជំនាញទន់ ជាជំនាញដែលបង្ហាញយើង ពីដំណើរឈានទៅរកការគិតរីកចម្រើន។ ទី២ គឺទាក់ទងនឹងការអប់រំចិត្ត និងការគ្រប់គ្រងខ្លួនឯង គ្រប់គ្រងអារម្មរណ៍ឆេវឆាវ ដែលចំណុចនេះសំខាន់ ដូចដែលធ្លាប់ឃើញថា មនុស្សខ្លះចេះជំនាញបច្ចេកទេស ប៉ុន្តែមិនចេះគ្រប់គ្រងកំហឹងខ្លួនឯង។ ទី៣ គឺទាក់ទងនឹងការពង្រឹងបុគ្គលិកលក្ខណៈរបស់យើង មានន័យថា ការធ្វើខ្លួនយើង ឲ្យទាក់ទាញ ឲ្យគេពេញចិត្ត។ មនុស្សនេះ គឺធ្វើការឆាប់ឡើងតំណែង ប៉ុន្តែមិនមែនជិះជាន់គេដើម្បីឡើងតំណែងទេ ប៉ុន្តែគឺប្រើសមត្ថភាពជំនាញទំនាក់ទំនងរបស់គាត់។ មួយទៀត គឺរៀនពង្រឹងភាពជាអ្នកដឹកនាំ ពោលកាលដែលយើងចេះធ្វើការងារជាក្រុម ចេះកៀរគរមនុស្សឲ្យធ្វើការជាមួយគ្នា សម្រេចគោលដៅរួម ទាល់តែអ្នកនោះមានជំនាញទន់នៅក្នុងខ្លួន គឺភាពជាអ្នកដឹកនាំនេះឯង។ នៅកម្ពុជាបច្ចុប្បន្ន ការបង្រៀនជំនាញទន់នេះ កាន់តែមានភាពល្បីល្បាញ ដោយសាររបត់នៃសកលភាវូបនីយកម្ម ការប្រកួតប្រជែង ដែលទាមទាឲ្យមនុស្សចេះទាំងជំនាញបច្ចេកទេស ការទំនាក់ទំនង ការគិត ការគ្រប់គ្រង មានភាពជាអ្នកដឹកនាំ ដែលជាជំនាញទន់នេះ។
លោក ទីន សុខលីម៖ សម្រាប់លោក ឃីម សុខហេង អ្វីជាភាពផ្ទុយគ្នា រវាងជំនាញទន់ និងជំនាញរឹង ឬ Soft Skills និងHard Skills?
លោក ឃីម សុខហេង៖ ជំនាញរឹង គឺសំដៅទៅលើជំនាញបច្ចេកទេស ដែលយើងរៀន ដូចជាវិទ្យាសាស្ត្រពិត ទាក់ទងនឹងរូប គីមី គណិតវិទ្យា គណនេយ្យ ឬទាក់ទងនឹងបច្ចេកទេស ដូចជាអេឡិចត្រូនិក អគ្គិសនីជាដើម។ ជំនាញទន់គឺទាក់ទងនឹងជំនាញមនុស្ស ជំនាញក្នុងការគិត ការធ្វើការជាមួយមនុស្ស។ យើងអាចនិយាយបានថា ក្រៅពីការគិត និងការធ្វើការជាមួយមនុស្ស គឹជាជំនាញដែលដឹកនាំ ឲ្យសម្របខ្លួន ក្នុងបរិបទនៃការផ្លាស់ប្តូរ។ អ៊ីចឹង វាទាមទាឲ្យយើងមានការគិតស៊ីជម្រៅប្រកបដោយយុទ្ធសាស្ត្រ។ បើយើងធ្វើការជាមួយបច្ចេកទេស គឺយើងផ្អែកលើតក្ក ឬភាពពិតជាក់ស្តែង(Logic)។ ឧទាហរណ៍ ម៉ូតូខូចប៊ូហ្ស៊ី ដោះតែប៊ូហ្ស៊ីចេញ យើងអាចដាក់ប៊ូហ្ស៊ីថ្មីបាន ហើយវាអាចឆេះ ប៉ុន្តែបើមនុស្សមានបញ្ហា យើងត្រូវការជំនាញទន់ ដើម្បីអាចរកដំណោះស្រាយបាន។ ឧទាហរណ៍ មនុស្ស២នាក់ មានផ្លូវអារម្មណ៍ ឬទំនាស់ផលប្រយោជន៍ជាមួយគ្នា ប្រការនេះ ទាមទាឲ្យយើងមានជំនាញ ក្នុងការគិតប្រកបដោយការច្នៃប្រឌិតថ្មី និងប្លែក ហើយអាចដោះស្រាយបញ្ហាមនុស្សបាន។
លោក ទីន សុខលីម៖ លោកឃីម សុខហេង លោកជាអ្នកឯកទេសអភិវឌ្ឍន៍មនុស្សស្រាប់ តើរវាងជំនាញរឹង និងជំនាញទន់ មួយណាសំខាន់ជាងសម្រាប់និស្សិត?
លោក ឃីម សុខហេង៖ មនុស្សដែលពូកែច្រៀង និងធ្វើឲ្យគេចូលចិត្តក្នុងវិស័យសិល្បៈ គឺមិនប្រាកដថាទៅស្លឆ្លាញ់ទេ ក៏មិនប្រាកដថាទៅជួលជុលឡានកើតដែរ។ អ្នកខ្លះពូកែធ្វើឲ្យគេសប្បាយ ធ្វើឲ្យគេចូលចិត្តនៅលើឆាក ប៉ុន្តែមានបុគ្គលមួយទៀត ធ្វើឲ្យគេសប្បាយ និងរីករាយ ដោយសារហូបម្ហូបរបស់គាត់ធ្វើ។ អ៊ីចឹង ជំនាញទាំង២នេះ គឺសំខាន់ដូចគ្នា។ តើមួយណាល្អ សម្រាប់បុគ្គលបែបណា? គឺទាល់តែយើងដឹងថាបុគ្គលនោះ មានគោលដៅចង់ធ្វើអ្វី ហើយថាតើដើម្បីសម្រេចគោលដៅរបស់គាត់នោះ តើជំនាញដែលពាក់ព័ន្ធមានអ្វីខ្លះ?
លោក ទីន សុខលីម៖ តើលោក ឃីម សុខហេង អាចពន្យល់បន្ថែមបានទេ តើជំនាញមួយណា ល្អសម្រាប់បុគ្គលប្រភេទណា?
លោក ឃីម សុខហេង៖ ប្រសិនបើគាត់ចង់ក្លាយ ទៅជាអ្នកបច្ចេកទេស គឺគាត់ត្រូវរៀនជំនាញបច្ចេកទេស។ ឧទាហរណ៍ បើខ្ញុំចង់ក្លាយទៅជាជាងជួសជុលឡាន ប្រាកដណាស់ គឺខ្ញុំត្រូវរៀនជួសជុលឡាន រៀនតោន បាញ់ថ្នាំ មើលគ្រឿង ឬរៀនខាងប្រព័ន្ធភ្លើង។ ប៉ុន្តែជំនាញទន់ គឺសំខាន់ដូចជាអ្នកដែលចង់ក្លាយទៅជាអ្នកលក់។ អ្នកលក់ ក្រៅពីយល់ដឹងពីផលិតផល ត្រូវមានជំនាញទំនាក់ទំនង ត្រូវមានចរិតដើម្បីធ្វើឲ្យគេចូលចិត្តគាត់ ត្រូវការភាពបត់បែន ការប្រាស្រ័យទាក់ទង និងចំណេះដឹងទូទៅច្រើន។ អ៊ីចឹងគាត់ត្រូវការជំនាញទន់នៅក្នុងខ្លួន។ ពិសេស អ្នកដែលចង់ក្លាយជាអ្នកដឹកនាំគេ ពីព្រោះអ្នកដឹកនាំ គឺធ្វើការជាមួយមនុស្ស មិនមែនធ្វើការតែជាមួយបច្ចេកទេសទេ។ ដូច្នេះតំណែងកាន់តែខ្ពស់ ត្រូវការជំនាញ ទន់កាន់តែខ្លាំង។
លោក ទីន សុខលីម៖ បុគ្គលម្នាក់មានជំនាញរឹងខ្លាំង ជាងជំនាញទន់ រីឯម្នាក់ទៀតមានជំនាញទន់ ខ្លាំងជាងជំនាញរឹងវិញ តើរវាងបុគ្គលទាំង២នេះ ម្នាក់ណាជោគជ័យក្នុងការងារជាង?
លោក ឃីម សុខហេង៖ យើងត្រូវពិចារណាបែបនេះវិញ ប្រសិនបើយើងចេះ ជំនាញបច្ចេកទេស ឬជំនាញរឹង យើងអាចក្លាយទៅជា ជាងដ៏ជោគជ័យ អាចក្លាយជាបុគ្គលិកជំនាញដែលល្អ។ ប៉ុន្តែសុំពិចារណាថា បើយើងចេះបច្ចេកទេស យើងអាចត្រឹមជាងដែលល្អ យើងរស់ស្រួលមួយជីវិត ប៉ុន្តែបើយើងចេះជំនាញទន់ថែមទៀត យើងមិនធ្វើជាងទេ គឺយើងអាចធ្វើមេជាងបាន។ ឧទាហរណ៍ បើខ្ញុំចេះស្លឆ្ងាញ់ ខ្ញុំអាចក្លាយជាចុងភៅ តែបើខ្ញុំមិនចេះគិត គ្មានជំនាញសហគ្រិនភាព ខ្ញុំមិនអាចទៅបើកហាងបានទេ ពីព្រោះចេះស្លតែមួយមុខហ្នឹង។ ដូច្នេះកុំភ្លេចថា បើយើងចេះ ជំនាញរឹង ឬជំនាញបច្ចេកទេស យើងខ្សោយការគិត មិនទាន់ចេះជំនាញទន់ នោះយើងត្រូវបង្ខំចិត្តធ្វើការឲ្យអ្នកចេះ ជំនាញទន់។ អ្នកជំនាញទន់ កាន់តែជោគជ័យ នៅពេលដែលគាត់ចេះគិត ហើយចេះប្រើប្រាស់ធនធានសម្ភារ និងមនុស្ស ដែលចេះជំនាញបច្ចេកទេសនេះឲ្យធ្វើការតាមជំនាញ។
លោក ទីន សុខលីម៖ រវាងបុគ្គលដែលពូកែ ជំនាញទន់ និងបុគ្គលពូកែជំនាញរឹង បុគ្គលណាជួយឲ្យស្ថាប័នរីកចម្រើនខ្លាំងជាង ហើយអ្វីខ្លះជាគុណសម្បត្តិ និងគុណវិបត្តិរវាងបុគ្គលទាំង២ នៅកន្លែងធ្វើការ?
លោក ឃីម សុខហេង៖ ប្រសិនបើសួរសំណួរនេះ ក្នុងនាមសហគ្រិន ជាអគ្គនាយកក្រុមហ៊ុន គឺបុគ្គលទាំងនេះ គឺសុទ្ធតែសំខាន់ទាំងអស់។ ពាក្យខ្មែរយើងនិយាយថា ឈើវៀចធ្វើកង់ ឈើត្រង់ធ្វើកាំ អាក្រញេញក្រញង់ ធ្វើអុសដុត។ ឧទាហរណ៍ក្រុមហ៊ុនដែលរីកចម្រើន គឺយើងគិតតួអង្គ ដូចជាគណនេយ្យករ គឺអ្នកបច្ចេកទេស ដែលកត់ត្រារាល់ចំណូលចំណាយរបស់ក្រុមហ៊ុន។ អ្នកដែលចេះព័ត៌មានវិទ្យា មនុស្សនេះយើងមិនសូវតម្រូវឲ្យគាត់ ចេះជំនាញមនុស្ស ឬទំនាក់ទំនងអ្វីច្រើនទេ ឲ្យតែគាត់ចេះព័ត៌មានវិទ្យាច្បាស់។យើងមិនត្រូវការមនុស្សនេះ ពូកែជំនាញទន់ទេ ប៉ុន្តែបើគាត់ នៅក្នុងផ្នែកទំនាក់ទំនងអតិថិជន អ្នកទទួលអតិថិជន គឺត្រូវការរួសរាយរាក់ទាក់ ប្រជាប្រិយ គាត់បានសម្តី។ ប្រសិនបើគាត់ ជាប្រធានផ្នែកទីផ្សារទៀតនោះគាត់ត្រូវពូកែទំនាក់ទំនងថែមទៀត។ អ៊ីចឹង មនុស្សទាំង២នេះ សំខាន់ដូចគ្នា ប៉ុន្តែក៏ស្ថិតលើអ្នកដឹកនាំ គាត់ត្រូវចេះគិតមួយទៀត គឺតើជំនាញមួយណា ត្រូវពូកែអ្វីខ្លះ? អ៊ីចឹងស្ថាប័នមួយជោគជ័យ ត្រូវការទាំងជំនាញរឹង និងជំនាញទន់។
លោក ទីន សុខលីម៖ តើបុគ្គលម្នាក់ៗ ត្រូវប្រើជំនាញទន់ឲ្យមានប្រសិទ្ធភាព ក្នុងជីវិតជាក់ស្តែងបែបណា?
លោក ឃីម សុខហេង៖ ជំនាញទន់ ក៏ទាក់ទងនឹងការរស់នៅប្រចាំថ្ងៃដែរ។ យើងឃើញថា សុជីវធម៌ នៃការរស់នៅរបស់យុវជនខ្មែរសំខាន់ណាស់។ គាត់ចេះដឹងពីច្បាប់ចរាចរណ៍ នោះមានន័យថាគាត់មានជំនាញរឹង និងជំនាញបច្ចេកទេស ប៉ុន្តែបើគាត់មិនគោរពច្បាប់ចរាចរណ៍ មានន័យថាគាត់មិនចេះ ជំនាញទន់។ ឥរិយាបថនៃការចោលសំរាមក៏ដូចគ្នា បើគាត់បោះសំរាមចូលក្នុងធុងសំរាមនោះគាត់មានជំនាញរឹង ប៉ុន្តែបើបោះសំរាមខុសធុង មានន័យថាអ្នកហ្នឹងគឺខ្សោយជំនាញទន់។ ជួបចាស់ទុំមិនឱនលំទោន មិន ញញឹម មិនជម្រាបសួរ នេះជាសុជីវធម៌នៃការរស់នៅ ជាទំនៀមទម្លាប់ប្រពៃណីខ្មែរយើងតើ ប៉ុន្តែគ្រាន់តែយុវជនយើងជំនាន់ឥឡូវ ច្រើនតែប្រហែស៕
Tag:
ឃីម សុខហេង
ជំនាញទន់
ជំនាញរឹង
© រក្សាសិទ្ធិដោយ thmeythmey.com