ជាតិ
ផ្អាកសកម្មភាពអ្នកនយោបាយ រឹតតែជារឿងព្រួយបារម្ភលើសពីការរំលាយបក្សសង្គ្រោះជាតិ
× ភ្នំពេញ៖ ការរំលាយគណបក្សសង្គ្រោះជាតិ មិនមែនជាទីបញ្ចប់នៃជីវិតនយោបាយរបស់ក្រុមអ្នកនយោបាយបក្សប្រឆាំងឡើយ។ រឿងធ្ងន់ធ្ងរជាងនេះ គឺការផ្អាកសកម្មភាពនយោបាយរបស់ថ្នាក់ដឹកនាំគណបក្សប្រឆាំង។
បើសិនជាគណបក្សសង្គ្រោះជាតិត្រូវបានរំលាយចោល ក្រោមអំណាចនៃសាលដីកាបិទផ្លូវតវ៉ារបស់តុលាការកំពូលមែននោះ វាពិតជារឿងអកុសលមួយសម្រាប់ក្រុមអ្នកនយោបាយខាងប្រឆាំងរួមទាំងអ្នកគាំទ្រផងដែរ។ ប៉ុន្តែ បើគេមើលឲ្យជ្រៅបន្តិចទៀតនោះ គេនឹងរឹតតែបារម្ភអំពីវាសនារបស់ក្រុមអ្នកនយោបាយរបស់គណបក្សសង្គ្រោះជាតិ ដែលប្រឈមនឹងការផ្អាកសកម្មភាពនយោបាយ។
មាត្រា៤៥ ត្រង់កថាខណ្ឌទី៣ នៃច្បាប់ស្តីពីគណបក្សនយោបាយចែងថា៖« [….] ក្នុងករណី ដែលគណបក្សនយោបាយត្រូវបានរំលាយ តុលាការ[កំពូល] អាចសម្រេចហាមឃាត់ការធ្វើសកម្មភាពនយោបាយរបស់ថ្នាក់ដឹកនាំនៃគណបក្សនយោបាយនោះ សម្រាប់រយៈពេល ៥ឆ្នាំ»។
គ្រាន់តែថា មាត្រាខាងលើពុំបានចែងនោះទេថា ពាក្យ«ថ្នាក់ដឹកនាំគណបក្ស» ត្រូវកំណត់ត្រឹមឋានៈ ឬតំណែងអ្វីឲ្យពិតប្រាកដ។
គេត្រូវព្រួយបារម្ភដល់ការផ្អាកសកម្មភាពរបស់អ្នកនយោបាយ ពីព្រោះសូម្បីតែពាក្យបណ្តឹងរបស់ក្រសួងមហាផ្ទៃ ក៏បានទាមទារយ៉ាងដូច្នេះដែរ។
នៅព្រឹកថ្ងៃទី៦ ខែតុលា ឆ្នាំ២០១៧ សហមេធាវី៥រូប ដែលទទួលសិទ្ធិពីក្រសួងមហាផ្ទៃ បានយកបណ្តឹងសុំឲ្យរំលាយគណបក្សសង្គ្រោះជាតិ ទៅជូនតុលាការកំពូល។ ក្នុងបណ្តឹងនោះ ក្រសួងមហាផ្ទៃ បានទាមទារពីចំណុចធំៗ គឺទីមួយ សុំឲ្យរំលាយគណបក្សសង្គ្រោះជាតិ ហើយទី២ គឺសុំឲ្យផ្អាកសកម្មភាពនយោបាយរបស់ថ្នាក់ដឹកនាំគណបក្សនេះរយៈពេល៥ឆ្នាំ។
អ្នកដែលដាក់សំណើរសុំឲ្យក្រសួងមហាផ្ទៃ ធ្វើបណ្តឹងទៅតុលាការកំពូល រំលាយគណបក្សសង្គ្រោះជាតិ គឺគណបក្សហ្វ៊ុនស៊ិនប៉ិចរបស់សម្តេចក្រុមព្រះ នរោត្តម រណឫទ្ធិ និងគណបក្សយុវជនកម្ពុជារបស់លោក ពេជ្រ ស្រស់។ គណបក្សហ្វ៊ុនស៊ិនប៉ិច និងគណបក្សយុវជនកម្ពុជា លើកហេតុផលស្រដៀងគ្នាថា ឯកឧត្តម កឹម សុខា បានជាប់សង្ស័យក្នុងអំពើក្បត់ជាតិ ដែលមិនគួរលើកលែងឲ្យបាន រួមទាំងគណបក្សសង្គ្រោះជាតិទាំងមូលផងដែរ៕
© រក្សាសិទ្ធិដោយ thmeythmey.com