អន្តរជាតិ
ថាក់ស៊ីន ត្រៀមប្តឹងបកព្រះរាជអាជ្ញាថៃ ដែលចង់ចោទប្រកាន់លោកពីបទប្រមាថព្រះមហាក្សត្រ
× ទំនងជាទ្រាំលែងបានជាមួយនឹងការបន្តធ្វើទុកបុកម្នេញតាមរយៈប្រព័ន្ធតុលាការ អតីតនាយករដ្ឋមន្ត្រីថៃ លោកថាក់ស៊ីន ស៊ីណាវ៉ាត់ បានចេញមុខការពារខ្លួន ពីការចោទប្រកាន់របស់តំណាងស្ថាប័នយុត្តិធម៌ថៃ ។ អតីតនាយករដ្ឋមន្ត្រីរូបនេះ ថែមទាំងឲ្យមេធាវីរបស់លោក ដាក់បណ្តឹងប្រឆាំងទៀតផង ។
លោក ថាក់ស៊ីន ស៊ីណាវ៉ាត នៅយប់ថ្ងៃ៨ តុលា បានផ្ញើសារតាមរយៈគណនី Twitter របស់លោកថា លោក កំពុងពិចារណាវិធានការផ្នែកច្បាប់តបតនឹងជនទាំងឡាយណា ដែលបានយកឈ្មោះរបស់លោកទៅភ្ជាប់នឹងបទល្មើសដែលប្រមាថព្រះមហាក្សត្រថៃ ។ នេះបើយោងតាមការចុះផ្សាយរបស់សារព័ត៌មានថៃ Bangkok Post ។
លោកអតីតនាយករដ្ឋមន្ត្រី ក៏បានបញ្ជាក់យ៉ាងដូច្នេះថា៖« ខ្ញុំសូមអះអាងថា ខ្ញុំពិតជាមិនបានស្គាល់បុគ្គលនោះទេ ហើយខ្ញុំក៏មិនធ្លាប់ទាំងគិតពីការបំពានលើស្ថាប័នព្រះមហាក្សត្រដែរ»។
សូមរម្លឹកបន្តិចដែរថា នៅថ្ងៃ០៦ តុលាកន្លងទៅ អគ្គព្រះរាជអាជ្ញាថៃ លោក Khemchai Chutiwong បានអះអាងថា អតីតនាយករដ្ឋមន្ត្រីថៃលោក ថាក់ស៊ីន ស៊ីណាវ៉ាត់ ប្រឈមនឹងវិធានការផ្លូវច្បាប់ជាច្រើន រាប់បញ្ចូលទាំងបទល្មើសប្រមាថព្រះមហាក្សត្រថៃ។ លោកអះអាងបែប ជាមួយនឹងការសន្យាផងដែរថា លោកនឹងសើរើបណ្តឹងជាច្រើនប្រឆាំងនឹងលោកថាក់ស៊ីន ដែលត្រូវបានព្យួរតាំងពីលោកអតីតនាយករដ្ឋមន្ត្រីរូបនេះភៀសខ្លួនក្រៅប្រទេស ។
យ៉ាងណាក៏ដោយ តាមរយៈសារព័ត៌មាន Bangkok Post ដដែល ប្រភពស្និទ្ធនឹងលោកថាក់ស៊ីន បានអះអាងថា អតីតនាយករដ្ឋមន្ត្រី បានណែនាំឲ្យមេធាវីរបស់លោកដាក់បណ្តឹងប្រឆាំងនឹងព្រះរាជអាជ្ញា នៅថ្ងៃព្រហស្បតិ៍ខាងមុខនេះដែរ។
សូមបញ្ជាក់ថាលោក ថាក់ស៊ីន ត្រូវបានគេទម្លាក់ចេញពីតំណែង ដោយរដ្ឋប្រហារយោធានៅឆ្នាំ២០០៦។ ក្រោយមក លោកត្រូវបានតុលាការថៃចោទប្រកាន់ពីបទល្មើសព្រហ្មទណ្ឌទៀតផង៕
Tag:
ថៃ
អាស៊ាន
ថាក់ស៊ីន ស៊ីណាវ៉ាត់
© រក្សាសិទ្ធិដោយ thmeythmey.com