អត្ថបទពាណិជ្ជកម្ម
ក្រុមហ៊ុនគ្រីសអេនើជី ប្តេជ្ញាអភិវឌ្ឍអណ្តូងប្រេងកាតអប្សរានៅកម្ពុជា
× ប្រទេសសិង្ហបុរី ថ្ងៃទី ២០ ខែតុលា ឆ្នាំ២០១៧៖ ក្រុមហ៊ុន គ្រីសអេនើជី អិលធីឌី (តទៅនេះហៅថា “គ្រីសអេនើជី” ឬ “ក្រុមហ៊ុន”) ដែលជាក្រុមហ៊ុនរុករកប្រេង និងឧស្ម័នឯករាជ្យ មានសេចក្តីរីករាយក្នុងការប្រកាសថា ក្រុមហ៊ុនបានធ្វើការសម្រេចចិត្តចុងក្រោយលើការវិនិយោគ “FID” ដើម្បីចាប់ផ្ដើមអនុវត្តដំណាក់កាលដំបូង ក្នុងការអភិវឌ្ឍតំបន់អណ្តូងប្រេងកាតអប្សរា ដែលជាគម្រោងអភិវឌ្ឍន៏អ៊ីដ្រូកាបូនដំបូងគេបង្អស់ នៅក្នុងព្រះរាជាណាចក្រកម្ពុជា ។
ដំណាក់កាល 1A នៃការអភិវឌ្ឍអណ្តូងប្រេងកាតអប្សរា ដែលស្ថិតនៅក្នុងប្លុក A កម្ពុជា ក្នុងឈូងសមុទ្រថៃ គ្រោងនឹងបង្កើតផ្លាតហ្វមក្បាលអណ្តូងផលិតកម្មដែលបញ្ជាពីចម្ងាយមួយ ទ្រទ្រង់ដល់អណ្តូងបូមប្រេងចំនួន ២៤ ដែលបញ្ជូនសន្ទនីយ៍ (fluid) ដែលបូមបាន ក្នុងបរិមាណ ៣ ម៉ឺនបារែលក្នុងមួយថ្ងៃ ទៅកាន់នាវាផលិតកម្មមួយ ដែលមានសមត្ថភាពប្រព្រឹត្តិកម្មប្រេង ដោយញែកយកឧស្ម័ន ប្រេង និងទឹកចេញពីគ្នា ។ ប្រេងដែលញែកបាន នឹងត្រូវបញ្ជូនតាមបំពង់បង្ហូរប្រេងប្រវែង ១,៥ គីឡូម៉ែត្រ ទៅកាន់នាវាបណ្តែតផ្ទុក និងផ្ទេរប្រេងអចិន្ត្រៃយ៍មួយ ។
លោក Kelvin Tang នាយកប្រតិបត្តិរបស់ក្រុមហ៊ុន គ្រីសអេនើជី និងជាប្រធានក្រុមហ៊ុនគ្រីសអេនើជី ប្រចាំប្រទេសកម្ពុជា បានកត់សម្គាល់ថា៖ “សេចក្តីសម្រេចចិត្តវិនិយោគចុងក្រោយ គឺជាការបោះជំហានមួយទៀត ក្នុងការដើរទៅមុខសម្រាប់ការអភិវឌ្ឍអណ្តូងប្រេងកាតអប្សរាទៅតាមពេលវេលាដែលបានកំណត់ទុក ក្រោយពី-មានការចុះហត្ថលេខាជាផ្លូវការលើកិច្ចព្រមព្រៀងប្រេងកាត ដែលបានធ្វើឡើងកាលពីចុងខែសីហាកន្លងទៅនេះ។ ក្រុមការងារបច្ចេកទេស និងផ្នែកប្រតិបត្តិការរបស់យើង កំពុងរៀបចំការដាក់ដេញថ្លៃចាំបាច់សម្រាប់ការផ្គត់ផ្គង់ ឧបករណ៍ បរិក្ខារ និងសេវាកម្មផ្សេងៗ ។ ទន្ទឹមគ្នានេះដែរ ការពិភាក្សាជាមួយភាគីដែលមានចំណាប់អារម្មណ៍ចង់ចូលរួមក្នុងគម្រោងថ្មីនេះក៏កំពុងប្រព្រឹត្តិទៅ ដើម្បីធ្វើយ៉ាងណាកាត់បន្ថយហានិភ័យលើផ្នែកប្រតិបត្តិការ និងការប្រើប្រាស់ទុនរបស់ក្រុមហ៊ុន”។
ក្រុមហ៊ុនគ្រីសអេនើជី គឺជាប្រតិបតិ្តករ ក្នុងប្លុក A កម្ពុជា ដែលកាន់កាប់ភាគហ៊ុន ៩៥% ។ តំណាងឲ្យរាជរដ្ឋាភិបាលកម្ពុជា អគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធ នៃក្រសួងសេដ្ឋកិច្ច និងហិរញ្ញវត្ថុ កាន់កាប់ភាគហ៊ុនចំនួន ៥% ។
តំបន់កិច្ចសន្យាប្លុក A កម្ពុជា មានទំហំ ៣,០៨៣ គីឡូម៉ែត្រការ៉េ ដែលស្ថិតនៅក្នុងអាងសមុទ្រខ្មែរ ក្នុងតំបន់ឈូងសមុទ្រថៃ ដែលមានជម្រៅទឹកចន្លោះពី ៥០ម៉ែត្រ ទៅ ៨០ម៉ែត្រ ។ បណ្តុំប្រេងនៅក្នុងប្លុក A នៃប្រទេស - កម្ពុជា មានទំហំតូច និងស្ថិតនៅរាយប៉ាយក្នុងតំបន់ភូមិសាស្ត្រដ៏ធំដែលទាមទារពេលវាលា និងមូលនិធិច្រើនដើម្បីអភិវឌ្ឍឲ្យបានពេញលេញ ។ លើសពីនេះទៀត ផលិតកម្មប្រេងក្នុងអាងសមុទ្រខ្មែរ មិនទាន់ដែលកើតឡើងជាក់ស្តែងនៅឡើយទេ ។
ដោយសារហេតុផលទាំងនេះ និងហេតុផលជាច្រើនទៀត ទើបយើងនៅមានភាពមិន-ច្បាស់លាស់ទាក់ទិននឹងអត្រាផលិតកម្មរយៈពេលវែង បរិមាណប្រេងដែលមានពិតប្រាកដ និងលទ្ធភាពជោគជ័យនៃអាជីវកម្ម ដូច្នេះហើយទើបយើងធ្វើការអភិវឌ្ឍជាដំណាក់កាលៗដើម្បីកាត់បន្ថយហានិភ័យ ។ នៅពេលដែលផ្លាតហ្វមក្នុងដំណាក់កាលដំបូង 1A ដំណើរការពេញលេញ យើងនឹងត្រូវការពេលវេលាខ្លះដើម្បីពិនិត្យតាមដានលទ្ធផលការផលិតប្រេងមុនពេលយើងធ្វើការសម្រេចចិត្តអភិវឌ្ឍទៅដំណាក់កាល 1B ដែលពេលនោះយើងរំពឹងថានឹងមានផ្លាតហ្វមបីបន្ថែមទៀតផលិតទៅកាន់ឋាបនៈភ័ណ្ឌរបស់ដំណាក់កាល 1A ។ នៅដំណាក់កាល 1C យើងអាចនឹងបន្ថែមផ្លាតហ្វមរហូតដល់ទៅប្រាំមួយទៀត ពោលគឺសរុបមានផ្លាតហ្វម ចំនួន ១០ ដើម្បីធ្វើការអភិវឌ្ឍអណ្តូងប្រេងអប្សរាឲ្យបានពេញលេញ។
កញ្ចប់ព័ត៌មានទាំងស្រុងស្ដីពីការអភិវឌ្ឍអណ្តូងប្រេងអប្សរារបស់ប្លុក A កម្ពុជា គឺអាចរកបានតាមរយៈ https://krisenergy.com/operations/cambodia/info-pack-block-a/ (ឯកសារជាភាសាខ្មែរអាចទទួលបានតាមការស្នើសុំ) ហើយវីដេអូជាភាសាអង់គ្លេស និងភាសាខ្មែរ អាចទស្សនាបានតាមរយៈ https://krisenergy.com/videos/apsara/ ។
អំពីក្រុមហ៊ុន គ្រីសអេនើជី (KrisEnergy)
ក្រុមហ៊ុន គ្រីសអេនើជី អិលធីឌី គឺជាក្រុមហ៊ុនឯករាជ្យមួយដែលផ្តោតសំខាន់លើការរុករក ការអភិវឌ្ឍ និងផលិតប្រេងកាត និងឧស្ម័ន នៅក្នុងអាងនៃតំបន់អាស៊ីអាគ្នេយ៍ ។ តាំងពីក្រុមហ៊ុនត្រូវបានបង្កើតឡើងក្នុង - ឆ្នាំ ២០០៩ មក យើងបានបង្កើតបានផលប័ត្រ ទៅលើតំបន់កិច្ចសន្យាចំនួន ១៦ នៅប្រទេសបង់ក្លាដេស ប្រទេសកម្ពុជា ប្រទេសឥណ្ឌូនេស៊ី ប្រទេសថៃ និងប្រទេសវៀតណាម ដែលយើងបានធ្វើការរុករក និងផលិត ។ យើងធ្វើប្រតិបត្តិការក្នុងប្លុកចំនួន ១០ ។
ភាគហ៊ុនរបស់ក្រុមហ៊ុន គ្រីសអេនើជី មានលក់នៅលើតារាងគោលនៃទីផ្សារពាណិជ្ជកម្មមូលបត្រសិង្ហបុរីផងដែរ ដោយមានលេខកូតសម្គាល់ SK3។ សម្រាប់ព័ត៌មានបន្ថែម សូមចូលទៅកាន់គេហទំព័រ www.krisenergy.com ។
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com