ជាតិ
នយោបាយជាតិ
ការកែច្បាប់ ដើម្បីយកកៅអីនៃបក្ស ដែលត្រូវរំលាយ ទៅឲ្យបក្សដទៃ ឆ្លងផុតការយល់ព្រមពីគ្រប់ស្ថាប័នហើយ លោក អ៊ុនឈុនលឹម ប្រធានក្រុមប្រឹក្សាធម្មនុញ្ញ (កណ្តាល) ដឹកនាំកិច្ចប្រជុំនៅថ្ងៃទី២៤ ខែតុលា ឆ្នាំ២0១៧ ដើម្បីពិនិត្យនិងអនុម័តលើសេចក្តីស្នើសុំឲ្យកែច្បាប់ចំនួន៤ ទាក់ទងនឹងការយកអាសនៈនៃគណបក្ស ដែលត្រូវរំលាយ ទៅឲ្យគណបក្សដទៃ។ រូបភាពពីក្រុមប្រឹក្សាធម្មនុញ្ញ
× ភ្នំពេញ៖ សេចក្តីស្នើសុំឲ្យកែច្បាប់ចំនួន៤ ដែលមានខ្លឹមសារជារួមថា«បើបក្សណាមួយ ត្រូវបានរំលាយ រាល់អាសនៈនៃគណបក្សនោះ ត្រូវបែងចែកទៅឲ្យគណបក្សដទៃ» ត្រូវបានក្រុមប្រក្សាធម្មនុញ្ញ បើកកិច្ចប្រជុំ ហើយអនុម័តគាំទ្រ នៅថ្ងៃទី២៤ ខែតុលា ឆ្នាំ២0១៧នេះ។ ក្រុមប្រឹក្សាធម្មនុញ្ញបញ្ជាក់ថា សេចក្តីស្នើច្បាប់ទាំងនោះ គឺស្របនឹងរដ្ឋធម្មនុញ្ញ។
ក្រុមប្រឹក្សាធម្មនុញ្ញ ជាស្ថាប័នចុងក្រោយ ដែលមានដែនសមត្ថកិច្ចក្នុងការពិនិត្យសេចក្តីស្នើសុំឲ្យកែច្បាប់ទាំង៤ បន្ទាប់ពីឆ្លងកាត់ការអនុម័តជាបន្តបន្ទាប់ពីរដ្ឋសភានិងព្រឹទ្ធសភា។ ជានីតិវិធី ក្រោយរដ្ឋសភា ព្រឹទ្ធសភា និងក្រុមប្រឹក្សាធម្មនុញ្ញ ពិនិត្យនិងអនុម័តចប់សព្វគ្រប់ សេចក្តីស្នើសុំឲ្យកែច្បាប់ទាំង៤នេះ ត្រូវថ្វាយទៅព្រះមហាក្សត្រ ដើម្បីព្រះអង្គឡាយព្រះហស្ត ឲ្យប្រើប្រាស់ជាផ្លូវការ។
ច្បាប់ទាំង៤ ដែលត្រូវបានកែប្រែក្រោមគំនិតផ្តួចផ្តើមរបស់ក្រុមតំណាងរាស្ត្រគណបក្សប្រជាជនកម្ពុជា រួមមាន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ច្បាប់ស្តីពីការបោះឆ្នោតជ្រើសតាំងក្រុមប្រឹក្សាឃុំ សង្កាត់ និងច្បាប់ស្តីពីការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌ៕
© រក្សាសិទ្ធិដោយ thmeythmey.com