កំណាព្យបទពាក្យ ៧
+ ត្រីឆ្អើរស្រួយស្រឹប ក្ដឹបអំពិល
វាតវង់ហ៊ោគឹល ព្រិលនេត្រា
ស្រស់ៗបន្លែ សាច់មច្ឆា
សុទ្ធសឹងអាហារ ការពារកាយ។
+ ចិញ្ច្រាំប្រហុក បុកក្រសាំង
អណ្ដែងទន់អាំង ទឹកត្រីស្វាយ
ម្ជូរគ្រឿងសណ្ដាន់ ត្រី សណ្ដាយ
ប្រហិតស្លាតក្រាយ បាយសែនឆ្ងាញ់។
+ ច្រកែងអាំងសាប ក្រាបបាតចាន
ជួបជុំសន្ដាន បានត្រីក្រាញ់
ត្រពាំងអូរបឹង បង់សំណាញ់
ជំរើសចំរាញ់ រកត្រីល្អ ។
+ ប្រហើរននោង ជ្រក់ក្រៅឆ្នាំង
កកូរត្រីឆ្លាំង លីងអង្ករ
ឆាក្ដៅអន្ទង់ ត្រីរ៉ស់ ខ
អ្នកមានអ្នកក្រ ត្រូវគ្រប់គ្នា។
+ ត្រីងៀតប្រៃផ្អែម ថែមគ្រឿងគ្រៅ
ម្ជូរស្រែម្រះ ព្រៅត្រី ក្អែកភ្លា
ស្ងោរជ្រក់ត្រីឆ្កោក រ៉ូទីទា
បង្កងបង្គា ឱជារស។
+ ត្រីគ្រំចំហុយ ទឹកត្រីផ្អែម
សណ្ដែកដីក្លែម ក្រពះពោះ
ញុំាក្រោមដើមឈើ ឬមាត់ជ្រោះ
ឆ្លៀតស្ដាប់ទឹកឈ្លោះ នឹងដុំថ្ម។
+ សម្បូរសប្បាយ សម្បើមណាស់
ម្ហូបខ្មែស្អេកស្កះ ច្រើនដំណ
ដូនតាបុព្វេ កេរបន្ត
ភ្ញៀវទេសចរ ជាប់ចាប់ចិត្ត។
(អត្ថបទរបស់អ្នកនិពន្ធ ចាប ពូក)