អន្តរជាតិ
សមាជិកអាស៊ានប្រាំបី ព្រមទទួលទីម័រខាងកើត នៅឡើយតែសិង្ហបុរី និងមីយ៉ាន់ម៉ា
× ទីម័រខាងកើត ប្តេជ្ញាពង្រឹងសមត្ថភាពរបស់ខ្លួនដើម្បីក្លាយជាសមាជិកពេញសិទ្ធិរបស់សមាគមប្រជាជាតិអាស៊ីអាគ្នេយ៍ ។ រដ្ឋាភិបាលក្រុងឌីលី ថែមទាំងមានទំនុកខ្ពស់ក្នុងការអាចក្លាយជាសមាជិកអង្គការតំបន់នេះ នាពេលខាងមុខ បើទោះបីជាមិនទាន់ទទួលបានការគាំទ្រជាឯកច្ឆន្ទពីសមាជិកចាស់ទាំងអស់ក៏ដោយ ។
លោកនាយករដ្ឋមន្ត្រីទីម័រខាងកើត Mari Alkatiri នៅថ្ងៃ២៦ តុលា បានអះអាងថា ទីម័រខាងកើត ទទួលបានការគាំទ្រយ៉ាងពេញទំហឹងពីឥណ្ឌូណេស៊ី ម៉ាឡេស៊ី និងបណ្តាសមាជិកអាស៊ានផ្សេងទៀតក្នុងការក្លាយជាសមាជិកអាស៊ាន លើកលែងតែសិង្ហបុរី និងមីយ៉ាន់ម៉ាប៉ុណ្ណោះ។ រដ្ឋាភិបាលទីម័រខាងកើត កំពុងតែបន្តនីតិវិធីចរចាបន្ថែម។ នេះបើយោងតាមការចុះផ្សាយរបស់សារព័ត៌មាន Bangkok Post ។
លោកនាយករដ្ឋមន្ត្រីរដ្ឋវ័យក្មេងជាងគេរបស់អាស៊ីគ្នេយ៍ដដែលនោះ ក៏បានបន្ថែមទៀតយ៉ាងដូច្នេះថា៖« ទីម័រខាងកើត នឹងព្យាយាមឲ្យអស់ពីសមត្ថភាពដើម្បីបានចូលរួមជាមួយនឹងអាស៊ាន ហើយខ្ញុំ ជឿជាក់ថា ឆាប់ៗនេះ ទីម័រខាងកើត នឹងក្លាយជាសមាជិកពេញលេញរបស់អាស៊ានហើយ»។
សូមជម្រាបផងដែរថា សមាគមប្រជាជាតិអាស៊ីអាគ្នេយ៍ ឬហៅកាត់ថា អាស៊ាន បានបង្កើតឡើងជាផ្លូវការនៅឆ្នាំ១៩៦៧ ។ មកទល់ជាពេលនេះ អង្គការអន្តររដ្ឋាភិបាលមួយនេះ មានសមាជិកសរុបទាំងអស់១០ប្រទេស រួមមាន ព្រុយណេ កម្ពុជា ឥណ្ឌូណេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម ។
ទីម័រខាងកើត បានទទួលឯករាជ្យ និងក្លាយជាសមាជិកអង្គការសហប្រជាជាតិនៅឆ្នាំ២០០២ ។ រដ្ឋដែលពឹងផ្អែកលើប្រេងមួយនេះ បានដាក់សំណើដើម្បីទទួលបានសមាជិកភាព អាស៊ាននៅឆ្នាំ២០១១ ។ រយៈពេល៦ឆ្នាំមកនេះ ទីម័រខាងកើត កំពុងស្ថិតក្រោមការវាយតម្លៃ របស់គណៈកម្មាធិការអាស៊ាន ថាតើ ទីម័រខាងកើត មានលក្ខណៈពេញលេញ ឬនៅសម្រាប់ការក្លាយសមាជិកកូនពៅអាស៊ានឬនៅ ៕
Tag:
ទីម័រខាងកើត
អាស៊ាន
© រក្សាសិទ្ធិដោយ thmeythmey.com