ឌូទើតេ សន្យា «តមសម្ដី» ពេលចូលគាល់អធិរាជជប៉ុន

អន្តរជាតិ

ឌូទើតេ សន្យា «តមសម្ដី» ពេលចូលគាល់អធិរាជជប៉ុន

30, Oct 2017 , 9:59 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីហ្វីលីពីន រ៉ូឌ្រីហ្គោ ឌូទើតេ បានប្រកាសថា លោកនឹងប្រយ័ត្នប្រយែងពាក្យសម្ដីក្នុងការពេលចូលគាល់អធិរាជជប៉ុន អាគីហ៊ីតុ ។ លោក ឌូទើតេ បានចាកចេញពីហ្វីលីពីននៅថ្ងៃទី២៩ ខែតុលា ដើម្បីបំពេញទស្សនកិច្ចរយៈពេលបីថ្ងៃនៅជប៉ុន មុនជំនួបតំបន់ដ៏ធំនៅខែក្រោយ ហើយទំនងជាមានគោលដៅស្វែងរកជំនួយសាងសង់ទីក្រុងម៉ារ៉ាវីឡើងវិញផងដែរ ក្រោយរំដោះទីក្រុងនេះពីដៃក្រុមជ្រុលនិយម Maute រួចមក។

ចរិតនិយាយស្ដីខ្លាំងៗ ចូលចិត្តប្រើប្រាស់ពាក្យមិនសមរម្យ និងមានអាកប្បកិរិយាមិនសូវគោរពគេឯងរបស់ប្រធានាធិបតីហ្វីលីពីន រ៉ូឌ្រីហ្គោ ឌូទើតេ ធ្វើឲ្យមន្ត្រីជប៉ុនបារម្ភខ្លាំង ព្រោះខ្លាចលោកបញ្ចេញទង្វើមិនសមប្រកប ពេលចូលគាល់អធិរាជ អាគីហ៊ីតុ ។ យ៉ាងណាមិញ លោក ឌូទើតេ ដែលចង់ឲ្យទំនាក់ទំនងទ្វេភាគីល្អប្រសើរនោះ បានសន្យាថា លោកនឹងមិននិយាយអ្វីប៉ះពាល់ដល់អធិរាជ ដែលត្រូវបានប្រជាជនជប៉ុនគោរពយ៉ាងខ្លាំង។

ក្នុងសន្និសីទសារព័ត៌មាននៅថ្ងៃទី២៩ ខែតុលា មុនចាកចេញទៅកាន់ជប៉ុន លោក ឌូទើតេ បញ្ជាក់ថា លោកនឹងបិទមាត់របស់លោក និងមិននិយាយអ្វីក្រៅពីពាំនាំការជូនពររបស់ប្រជាជនហ្វីលីពីនចំពោះអធិរាជជប៉ុនឡើយ។ បើតាមសារព័ត៌មាន Rappler ប្រធានាធិបតីហ្វីលីពីន ចាត់ទុកជំនួបជាមួយអធិរាជ អាគីហ៊ីតុ ជាកិត្តិយសសម្រាប់លោក ព្រោះអធិរាជអង្គនេះនឹងដាក់រាជ្យនៅពេលខាងមុខ ហើយម្យ៉ាងទៀតកាលពីទស្សនកិច្ចលើកមុន លោកក៏មិនអាចជួបព្រះចៅអាគីហ៊ីតុ ដែរ។

កាលពីទស្សនកិច្ចលើកទីមួយនៅជប៉ុនក្នុងខែតុលា ឆ្នាំ២០១៦ លោក ឌូទើតេ ក៏មានគម្រោងចូលគាល់ព្រះចៅ អាគីហ៊ីតុ ដែរ ប៉ុន្តែក៏ត្រូវបានលុបចោលវិញ ដោយសារការចូលទិវង្គតរបស់ព្រះអង្គម្ចាស់មីកាសា ដែលជាព្រះបិតុលា។ យ៉ាងណាមិញ ក្នុងដំណើរទស្សនកិច្ចលើកទីពីរនេះ ការព្រួយបារម្ភនៅតែមាន ព្រោះគេអាចចាំបានថា លោក ឌូទើតេ បានទំពារស្ករកៅស៊ូចំពោះមុខប្រធានាធិបតីចិន ស៊ី ជិនភីង ដែលត្រូវបានចាត់ទុកជាទង្វើមិនសមរម្យ។

ដោយឡែកក្នុងទស្សនកិច្ចនេះដែរ លោក ឌូទើតេ ក៏នឹងជួបជាមួយនាយករដ្ឋមន្ត្រី ស៊ិនហ្សូ អាបេ ដើម្បីពិភាក្សាបញ្ហាតំបន់ និងកិច្ចសហប្រតិបត្តិការទ្វេភាគី។ ទស្សនកិច្ចរបស់លោក ឌូទើតេ ពេលនេះ ធ្វើឡើងមុនការមកដល់កិច្ចប្រជុំអាស៊ាន និងកិច្ចប្រជុំពាក់ព័ន្ធផ្សេងទៀត។ បញ្ហាសន្តិសុខតំបន់ និងនុយក្លេអ៊ែរកូរ៉េខាងជើង ទំនងជារបៀបវារៈសំខាន់នៃកិច្ចប្រជុំប្រចាំឆ្នាំដ៏ធំនេះ ហើយលោក ឌូទើតេ នឹងយកបញ្ហានេះជជែកជាមួយលោក អាប ដែរ។

ក្រៅពីនេះ ប្រធានាធិបតីហ្វីលីពីន ក៏អាចស្នើសុំជំនួយពីជប៉ុនក្នុងការស្ដារទីក្រុងម៉ារ៉ាវីឡើងវិញ បន្ទាប់ពីរំដោះបានថ្មីៗនេះ ខណៈដែលរដ្ឋាភិបាលក្រុងតូក្យូបានផ្ដល់ជំនួយហិរញ្ញវត្ថុជាច្រើនរួចមកហើយនោះ។ ទោះជាមិនរំពឹងថា ជប៉ុននឹងជួយដោះស្រាយបញ្ហាទាំងអស់នៅម៉ារ៉ាវីក្ដី លោក ឌូទើតេ អះអាងថា ជប៉ុននឹងជួយស្ដារបញ្ហាទាំងនេះ ព្រោះហ្វីលីពីនពិតជាត្រូវការជំនួយខ្លាំងសម្រាប់កសាងហេដ្ឋារចនាសម្ព័ន្ធនៅទីក្រុងដ៏ខ្ទេចខ្ទាំមួយនេះ៕