អន្តរជាតិ
បងធំអាស៊ានឥណ្ឌូណេស៊ី មិនទទួលស្គាល់ការប្រកាសឯករាជ្យរបស់តំបន់Catalonia ពីអេស្ប៉ាញ
× រដ្ឋាភិបាលក្រុងហ្សាការតា បានប្រកាសមិនទទួលស្គាល់ផែនការប្រកាសឯករាជ្យរបស់ Catalonia ចេញពីប្រទេសអេស្ប៉ាញឡើយ ។ នេះជាសេចក្តីថ្លែងការណ៍ដំបូងហើយរបស់រដ្ឋអាស៊ានពាក់ព័ន្ធនឹងបញ្ហាដែលកំពុងតែកើតឡើងនៅក្នុងតំបន់អឺរ៉ុប ។
ក្រសួងការបរទេសឥណ្ឌូណេស៊ី នៅថ្ងៃ២៨ តុលា កន្លងទៅបានចេញសេចក្តីថ្លែងការណ៍មួយផ្លូវការតាមរយៈគណនី Twitter របស់ខ្លួនដោយបានប្រកាសមិនទទួលស្គាល់ការប៉ុនប៉ងផ្តាច់ខ្លួនរបស់ តំបន់ស្វយ័ត Catalonia ពីប្រទេសអេស្ប៉ាញ។
បើតាមគណនី Twitter ផ្លូវការរបស់ក្រសួងការបរទេសឥណ្ឌូណេស៊ី ឥណ្ឌូណេស៊ីបានបញ្ជាក់យ៉ាងដូច្នេះថា៖« Catalonia គឺជាផ្នែកមួយរបស់អេស្ប៉ាញ ។ ឥណ្ឌូណេស៊ី នឹងមិនទទួលស្គាល់ចំពោះឯករាជ្យរបស់ Catalonia ឡើយ »។
សូមរម្លឹកផងដែរថា នៅថ្ងៃ០១ តុលាកន្លងទៅ លោក Carles Puigdemont បានដឹកនាំឲ្យមានការធ្វើប្រជាមតិមួយផ្តាច់ខ្លួនតំបន់ Catalonia ចេញពីអេស្ប៉ាញ ។ ប្រជាជនតំបន់ Catalonia ៩០ភាគរយបោះឆ្នោតគាំទ្រការផ្តាច់ខ្លួនក្នុងប្រជាមតិ ដែលរដ្ឋាភិបាលអេស្ប៉ាញចាត់ទុកជាទង្វើខុសច្បាប់។
ខណៈនោះដែរ អ្នកបោះឆ្នោតចំនួន១៧៦៥៦៥នាក់ផ្សេងទៀតបានសម្រេចបោះឆ្នោតបដិសេធការផ្តាច់ខ្លួនក្នុងប្រជាមតិនោះ ហើយវាមានការផ្ទុះហិង្សាដែលធ្វើឲ្យមនុស្សរាប់រយនាក់រងរបួសផង។
បើក្រឡេកមកតំបន់អាស៊ានវិញ វាមានតែឥណ្ឌូណេស៊ី ដែលជារដ្ឋធំជាងគេរបស់អាស៊ាននោះទេមកទល់ពេលនេះ ដែលបានចេញសេចក្តីថ្លែងការណ៍មិនទទួលស្គាល់ការប្រកាសឯករាជ្យរបស់តំបន់ Catalonia នោះ។ អាស៊ាន មិនទាន់មានសេចក្តីថ្លែងការណ៍ណាមួយជុំវិញបញ្ហាដែលកំពុងតែកើតនៅក្នុងតំបន់អឺរ៉ុបនោះឡើយ ៕
© រក្សាសិទ្ធិដោយ thmeythmey.com