តៃវ៉ាន់នឹងបន្តពង្រឹងវិស័យការពារជាតិ ខណៈចិនបន្តព្រមានកម្ចាត់រាល់ការប៉ុនប៉ុងផ្តាច់ខ្លួន

អន្តរជាតិ

តៃវ៉ាន់នឹងបន្តពង្រឹងវិស័យការពារជាតិ ខណៈចិនបន្តព្រមានកម្ចាត់រាល់ការប៉ុនប៉ុងផ្តាច់ខ្លួន

31, Oct 2017 , 11:05 am

រូបភាព

រូបភាព៖ The Wire

ដោយ:

ពេលស្ថិតនៅរដ្ឋហាវ៉ៃ ប្រធានាធិបតីកោះតៃវ៉ាន់អះអាងថា តៃវ៉ាន់នឹងបន្តបង្កើនការចំណាយលើវិស័យការពារជាតិ ដែលជាតម្រូវការអាទិភាពរបស់ខ្លួន។ ប្រធានាធិបតីរូបនេះ ថែមបានអរគុណអាមេរិក ដែលបានចូលរួមធានាសន្តិភាព និងសន្តិសុខនៅក្នុងតំបន់ប៉ាស៊ីហ្វិកផងដែរ ។

« យើងពិតជារីករាយណាស់ចំពោះការចូលរួមរក្សាសន្តិភាព និងស្ថិរភាពរបស់អាមេរិកសម្រាប់តំបន់អាស៊ីប៉ាហ្វិក ហើយតាមរយៈជំនួបជាមួយនឹងអាមេរិក យើងកាន់តែយល់ច្បាស់ពីតម្រូវការក្នុងការបង្កើនការវិនិយោគនៅក្នុងវិស័យការពារជាតិ»។ នេះជាសម្តីប្រធានាធិបតីតៃវ៉ាន់ Tsai Ing-wen ដែលស្រង់ដោយទីភ្នាក់ងារព័ត៌មាន Reuters ចុះផ្សាយថ្ងៃ៣០ តុលា ។

តាមប្រភពព័ត៌មានដដែល លោកស្រីប្រធានាធិបតី ក៏បានប្រាប់ក្រុមអ្នកស្រាវជ្រាវអាមេរិក នៅរដ្ឋហាវៃ កន្លែងលោកស្រីត្រូវឆ្លងកាត់មុនបំពេញទស្សនកិច្ចទៅកាន់ប្រទេសកល្យាណមិត្តថា តៃវ៉ាន់ កន្លងមកបានបង្កើនការចំណាយលើវិស័យការពារយ៉ាងប្រុងប្រយ័ត្នបំផុត ហើយ តៃវ៉ាន់ ក៏នឹងបន្តធ្វើបែបនេះដើម្បីសុវត្ថិភាពរបស់ខ្លួនផងដែរ ។

សូមជម្រាបផងដែរ លោកស្រីប្រធានាធិបតីតៃវ៉ាន់ បាននិងកំពុងតែធ្វើដំណើរបំពេញទស្សនកិច្ចទៅកាន់រដ្ឋកោះចំនួនបីដែលជាកល្យាណមិត្តរបស់ខ្លួននៅក្នុងតំបន់ប៉ាស៊ីហ្វិកដើម្បីពង្រឹងកិច្ចសហប្រតិបត្តិការរបស់ខ្លួន ។ រដ្ឋទាំងនោះរួមមាន កោះសាធារណរដ្ឋម៉ាហ្សាល់ កោះសូឡូមុន និងកោះទូវ៉ាលូ ។

អ្វីដែលគួរឲ្យកត់សម្គាល់នោះ ការថ្លែងការណ៍ពាក់ព័ន្ធនឹងការបង្កើនការចំណាយលើវិស័យការពាតិរបស់មេដឹកនាំតៃវ៉ាន់ ហាក់ដូចជាសារមួយទៅកាន់ចិន ដែលបន្តគំរាមកំហែងខ្លួនយ៉ាងដូច្នេះឯង ។ ក្នុងមហាសន្និបាតបក្សកុម្មុយនីសចិនសប្តាហ៍មុន លោកប្រធានាធិបតី ស៊ី ជិនភីង បានព្រមានកោះតៃវ៉ាន់ធ្ងន់ៗថា ចិននឹងចាត់វិធានគ្រប់បែបយ៉ាងដើម្បីកម្ទេច និងបញ្ឈប់ចលនា និងការប៉ុនប៉ងប្រកាសឯករាជ្យពីចិនទៀតផង ៕