អន្តរជាតិ
នៅចិន អ្នកមិនគោរពភ្លេងជាតិប្រឈមជាប់គុក៣ឆ្នាំ
× សភាប្រជាជនចិន ដែលជាស្ថាប័ននីតិបញ្ញត្តិកំពូល កំពុងពិចារណាដាក់ទោសធ្ងន់ធ្ងរលើបុគ្គលទាំងឡាយដែលមិនគោរពភ្លេងជាតិ។ ក្នុងសេចក្ដីស្នើវិសោធនកម្មច្បាប់ព្រហ្មទណ្ឌ ជនណាដែលបំពានភ្លេងជាតិអាចប្រឈមមុខនឹងការជាប់ទោសពន្ធនាគារដល់ទៅបីឆ្នាំឯណោះ។ បើតាមច្បាប់ស្ដីពីភ្លេងជាតិ អ្នកដែលបំពានអាចជាប់ឃុំនៅប៉ុស្តិ៍ប៉ូលិសរយៈពេល១៥ថ្ងៃប៉ុណ្ណោះ ហើយកំពុងត្រូវបានអនុវត្តក្នុងទឹកដីចិនទាំងអស់ រាប់ទាំងហុងកុង និងម៉ាកាវផង។
សភាប្រជាជនចិនកំពុងគិតគូរធ្វើវិសោធនកម្មច្បាប់ព្រហ្មទណ្ឌរបស់ខ្លួនដើម្បីបញ្ចូលមាត្រាថ្មីជុំវិញការដាក់ទោសបុគ្គលដែលមិនគោរពភ្លេងជាតិ។ សេចក្ដីស្នើច្បាប់ថ្មីមួយស្ដីពីការកែប្រែច្បាប់ព្រហ្មទណ្ឌបានទៅដល់ដៃគណៈកម្មាធិការអចិន្ត្រៃយ៍សភាដើម្បីពិភាក្សាក្នុងកិច្ចប្រជុំរៀងរាល់ពីរខែម្ដងដែលចាប់ផ្ដើមនៅថ្ងៃទី៣០ ខែតុលា។ ប៉ុន្តែគេមិនទាន់ដឹងច្បាស់ថាសេចក្ដីស្នើច្បាប់នេះត្រូវបានអនុម័តពេលណាឡើយ តែត្រូវទទួលទោសធ្ងន់ធ្ងរជាងមុន។
បើតាមទីភ្នាក់ងារព័ត៌មានរដ្ឋចិន Xinhua លោក Wang Chaoying អនុប្រធានគណៈកម្មការកិច្ចការច្បាប់និយាយថា ច្បាប់ព្រហ្មទណ្ឌបានចែងទម្ងន់ទោសនៃការបំពានទង់ជាតិ និងសញ្ញាជាតិរួចហើយ ហើយពេលនេះទោសនៃការមិនគោរពភ្លេងជាតិនឹងត្រូវដាក់បញ្ចូលដូចគ្នាដែរ។ សេចក្ដីស្នើច្បាប់វិសោធនកម្មបញ្ជាក់ថា ទោសនៃការមិនគោរពភ្លេងជាតិមានដូចជាការដកហូតសិទ្ធិនយោបាយ ការស្ថិតក្រោមការតាមដាន ការជាប់ឃុំ ឬក៏ដល់ថ្នាក់ជាប់ពន្ធនាគារឯណោះ។
ជុំវិញរឿងនេះ កាលពីខែកញ្ញា សភាចិនក៏ទើបតែអនុម័តច្បាប់ស្ដីពីភ្លេងជាតិ ដែលកំណត់ពីការប្រើប្រាស់ភ្លេងជាតិឲ្យបានត្រឹមត្រូវ។ អ្នកដែលកែប្រែទំនុកច្រៀង ច្រៀង ឬចាក់ភ្លេងជាតិក្នុងផ្លូវមិនសមរម្យនៅតាមទីសាធារណៈ នឹងត្រូវឃុំខ្លួនរយៈពេល១៥ថ្ងៃ ហើយអាចត្រូវជាប់ទោសឧក្រិដ្ឋទៀតផង។ ដោយសារហេតុនេះ ទើបសភាចិនពិចារណាកែប្រែច្បាប់ព្រហ្មទណ្ឌដើម្បីបញ្ចូលទោសមួយនេះ សំដៅដាក់ទោសបុគ្គលដែលបំពាន។
វិសាលភាពនៃការអនុវត្តច្បាប់ខាងលើ គ្របដណ្ដប់លើទឹកដីចិនទាំងអស់រាប់ទាំងតំបន់រដ្ឋបាលពិសេសហុងកុង និងម៉ាកាវផង។ នៅហុងកុង ការអនុវត្តច្បាប់នេះបង្កជាការព្រួយបារម្ភយ៉ាងខ្លាំងពីសំណាក់ប្រជាជនក្នុងតំបន់ ដោយចាត់ទុកជានេះជាការជ្រៀតជ្រែកចូលកិច្ចការផ្ទៃក្នុងហុងកុងពីសំណាក់ក្រុងប៉េកាំង។ នេះក៏ព្រោះតែហុងកុងជាតំបន់ស្វយ័តពិសេសមានប្រព័ន្ធរដ្ឋបាលខ្លួនឯង ទោះជាស្ថិតក្រោមការគ្រប់គ្រងរបស់ចិនតាមរយៈ «ប្រទេសមួយ ប្រព័ន្ធពីរ» ក្ដី។
គេអាចចាំបានថា ក្នុងឆ្នាំ២០១៥ អ្នកគាំទ្រក្រុមកីឡាបាល់ទាត់ហុងកុងបានស្រែកឌឺដងដាក់ភ្លេងជាតិចិន «March of the Volunteers» អំឡុងពេលការប្រកួតជម្រុះពានរង្វាន់ពិភពលោក។ សហព័ន្ធកីឡាបាល់ទាត់ពិភពលោក FIFA ក៏បានពិន័យហុងកុងជុំវិញទង្វើរបស់អ្នកគាំទ្ររបស់ខ្លួន។ ភ្លេងនេះក្លាយជាភ្លេងជាតិផ្លូវការនៅឆ្នាំ១៩៤៩ ស្របពេលសាធារណរដ្ឋប្រជាមានិតចិនត្រូវបានបង្កើតឡើងដូចគ្នា៕
© រក្សាសិទ្ធិដោយ thmeythmey.com