អន្តរជាតិ
ទស្សនកិច្ចរយៈពេលវែងរបស់លោក ត្រាំ នៅអាស៊ីបង្ហាញពីការប្តេជ្ញាចិត្តរបស់អាមេរិកចំពោះតំបន់ រូបភាព៖ South China Morning Post
× មន្ត្រីជាន់ខ្ពស់អាមេរិកបានលើកឡើងថា ប្រធានាធិបតី ដូណាល់ ត្រាំ នឹងចូលរួមក្នុងពិធីលាងសាយភោជន៍ ពិធីអបអរខួបលើកទី ៥០ នៃការបង្កើតអាស៊ាន និងជួបពិភាក្សាជាមួយមេដឹកនាំសមាជិកកិច្ចប្រជុំកំពូលអាស៊ីបូព៌ាទាំងអស់ពេលលោកស្ថិតនៅហ្វីលីពីនថ្ងៃ ១២ ខែវិច្ឆិកាផង។ វាជាដំណើរទស្សនកិច្ចប្រវត្តិសាស្ត្ររយៈពេលវែងបំផុតមួយរបស់ប្រធានាធិបតីអាមេរិក ក្នុងរយៈពេលជាង ២៥ឆ្នាំ ហើយវាក៏ឆ្លុះបញ្ចាំងពីជំហរមិនងាករេរបស់អាមេរិកក្នុងការប្រាស្រ័យទាក់ទងជាមួយតំបន់អាស៊ីផង។
ក្នុងសន្និសីទសារព័ត៌មានតាមទូរសព្ទថ្ងៃចន្ទទី ៣០ ខែតុលា ឧបការីរងប្រធានាធិបតីអាមេរិក និងជានាយកទទួលបន្ទុកកិច្ចការងារអាស៊ីបូព៌ាលោក Matt Pottinger បានបញ្ជាក់ថា លោក ត្រាំ នឹងចូលរួមក្នុងកិច្ចប្រជុំសំខាន់ៗ និង វេទិកាប្រារព្ធខួបអាស៊ានលើកទី ៥០ ជាមួយមេដឹកនាំតំបន់ទាំងអស់ផងពេលលោកមកដល់ក្រុងម៉ានីលថ្ងៃ ១២ វិច្ឆិកា។
ពេលសួរពីអវត្តមានប្រធានាធិបតី ត្រាំ ក្នុងកិច្ចប្រជុំអាស៊ីបូព៌ា (EAS) ក្នុងពេលបំពេញទស្សនកិច្ចនៅហ្វីលីពីន លោក Matt Pottinger បានពន្យល់ថា គេមិនគួរនិយាយថា ប្រធានាធិបតី ត្រាំ មិនចូលរួមក្នុងកិច្ចប្រជុំកំពូលអាស៊ីបូព៌ាឡើយ។
«ប្រធានាធិបតីនឹងអញ្ជើញមកដល់ក្រុងម៉ានីលនៅថ្ងៃ ១២ វិច្ឆិកា ដោយលោកចូលរួមក្នុងពិធីលាងសាយភោជន៍រួមជាមួយមេដឹកនាំសមាជិកកិច្ចប្រជុំអាស៊ីបូព៌ា រួមទាំងចូលរួមក្នុងពិធីសំខាន់ៗផ្សេងទៀត។ ខ្ញុំមិនគិតថា លោក ប្រធានាធិបតីមិនចូលរួមក្នុងកិច្ចប្រជុំអាស៊ីបូព៌ាឡើយ»។ នេះជាការសម្តីរបស់លោក Matt Pottinger ឆ្លើតបនឹងសារព័ត៌មានថ្មីៗ។
កាលពីសប្តាហ៍មុន រដ្ឋមន្ត្រីការបរទេសហ្វីលីពីនលោក Alan Peter Cayetano បានប្រាប់អ្នកសារព័ត៌មានថា ប្រធានាធិបតី ត្រាំ នឹងចូលរួមកិច្ចប្រជុំអាមេរិកអាស៊ាន និងការប្រារព្ធខួបលើកទី ៥០ នៃការបង្កើតអាស៊ានផងដែរក្នុងពេលដែលលោកស្ថិតនៅហ្វីលីពីនថ្ងៃ ១២ និងថ្ងៃ ១៣ វិច្ឆិកានោះ។ ប៉ុន្តែបើកិច្ចប្រជុំអាស៊ីបូព៌ា ត្រូវរៀបចំឡើងថ្ងៃ ១៤ វិច្ឆិកាតាមការកំណត់នោះ លោក ត្រាំ មិនអាចចូលរួមបានឡើយ។
«ការសម្រេចចិត្តចុងក្រោយនោះគឺថា លោក ត្រាំ នឹងមកទស្សនកិច្ចនៅហ្វីលីពីននៅថ្ងៃ ១២ និង ១៣ ខែវិច្ឆិកា។ បើសិនជាកិច្ចប្រជុំអាស៊ីបូព៌ានៅត្រូវរៀបចំថ្ងៃ ១៤ ខែវិច្ឆិកាដដែល លោក ត្រាំ មិនអាចបន្ថែមពេលមួយថ្ងៃទៀតដើម្បីចូលរួមឡើយព្រោះដំណើរទស្សនកិច្ចរបស់លោកវាមានរយៈពេលវែងរួចហើយ»។ រដ្ឋមន្ត្រីការបរទេសហ្វីលីពីនបានថ្លែងដូច្នេះ។
ការប្តេជ្ញាចិត្តរបស់អាមេរិកចំពោះតំបន់អាស៊ីជំនាន់លោក ត្រាំ មិនប្រែប្រួលឡើយ
ដោយឡែក ព័ត៌មានដែលពាក់ព័ន្ធការមិនចូលរួមកិច្ចប្រជុំអាស៊ីបូព៌ារបស់ប្រធានាធិបតី ត្រាំ បានក្លាយប្រធានបទក្តៅ ហើយមានការវាយតម្លៃថា អវត្តមានលោកត្រាំ បញ្ជាក់ថា រដ្ឋបាលនេះមិនចាប់អារម្មណ៍តំបន់អាស៊ីឡើយ។
ពាក់ព័ន្ធការលើកឡើងបែបនេះ ឧបការីរងរបស់ប្រធានាធិបតីលោក Matt Pottinger កត់សម្គាល់ថា វាមានការរឿងជជែកតគ្នាជាបន្តបន្ទាប់ពីភាពមិនច្បាស់លាស់នៃគោលនយោបាយរបស់រដ្ឋបាលអាមេរិកថ្មីចំពោះតំបន់។ ប៉ុន្តែលោកយល់ថា វាមិនឆ្លុះបញ្ចាំងពីការពិតជាក់ស្តែងឡើយ ហើយទស្សនកិច្ចលោក ត្រាំ មកអាស៊ីនេះជាទស្សនកិច្ចប្រវត្តិសាស្ត្រមួយមិនធ្លាប់ជាង២៥ឆ្នាំហើយ។ វាក៏បង្ហាញឲ្យឃើញពីការយកចិត្តទុកដាក់របស់អាមេរិកចំពោះតំបន់អាស៊ីអាគ្នេយ៍ដូចគ្នា។
«តាមពិតទៅនេះជាដំណើរទស្សនកិច្ចរយៈពេលវែងបំផុតមួយរបស់ប្រធានាធិបតីអាមេរិកដែលមិនធ្លាប់មានក្នុងរយៈពេលជាង២៥ឆ្នាំ មកហើយ។ លោក ដូណាល់ ត្រាំ អញ្ជើញទៅ Danang ដោយចូលរួមក្នុងកិច្ចប្រជុំ APEC និងទៅហាណូយដើម្បីបំពេញទស្សនកិច្ចផ្លូវការ។ បន្តមកទៀតលោកបន្តមកចូលរួមកិច្ចប្រជុំកំពូលអាស៊ាន អាមេរិក (US-ASEAN Summit) ចូលរួមក្នុងការប្រារព្ធខួបលើកទី ៤០ នៃការបង្កើតទំនាក់ទំនងរវាងអាស៊ាន និងអាមេរិក រួមជាមួយខួបលើកទី៥០របស់អាស៊ាននៅម៉ានីលទៀត»។ លោក Pottinger បានបន្ថែមដូច្នេះ។
មកដល់បច្ចុប្បន្ន រដ្ឋបាលលោក ដូណាល់ ត្រាំ កំពុងត្រួតពិនិត្យឡើងវិញ និងកែសម្រួលគោលនយោបាយការបរទេស និងយុទ្ធសាស្ត្ររបស់ខ្លួនមកកាន់តំបន់អាស៊ី ធ្វើយ៉ាងណាឲ្យខុសប្លែកពីគោលនយោបាយការបរទេសពង្រឹងឥទ្ធិពលអាមេរិកឡើងវិញនៅអាស៊ី (Asia Pivot) របស់លោក បារ៉ាក់ អូបាម៉ានោះ។ គេមិនទាន់ដឹងច្បាស់ថាគោលនយោបាយថ្មីនេះខុសប្លែកបែបណាពីគោលនយោបាយរដ្ឋបាលមុនឡើយ។
សូមបញ្ជាក់ប្រធានាធិបតី ដូណាល់ ត្រាំ នឹងចាប់ផ្តើមដំណើរទស្សនកិច្ចមកកាន់តំបន់អាស៊ីជាលើកដំបូងនៅថ្ងៃ ៣ វិច្ឆិកាខាងមុខ។ ដំណើរទស្សនកិច្ចរបស់លោក ត្រាំ ផ្តើមនៅប្រទេសជប៉ុន មុនបន្តទៅកូរ៉េខាងត្បូង ចិន វៀតណាម និងហ្វីលីពីន។ រដ្ឋហាវ៉ៃជាគោលដៅចុងក្រោយនៃដំណើរទស្សនកិច្ចរបស់លោក ត្រាំ៕
Tag:
ដូណាល់ ត្រាំ
Matt Pottinger
អាស៊ាន
© រក្សាសិទ្ធិដោយ thmeythmey.com