អន្តរជាតិ
ចិន ជឿថា អេស្ប៉ាញមានសមត្ថភាពបង្រួបបង្រួមជាតិ ក្រោយតំបន់ Catalonia ប្រកាសឯករាជ្យ
× រដ្ឋាភិបាលក្រុងប៉េកាំង បានបង្ហាញការគាំទ្រចំពោះការប្រឹងប្រែងរបស់រដ្ឋាភិបាលអេស្ប៉ាញក្នុងការបង្រួបបង្រួមជាតិ ខណៈពេលអេស្ប៉ាញដើរដល់ចំណុចរង្គោះរង្គើរផ្ទៃក្នុងមួយ ។ ដោយហៅបញ្ហានៅCatalonia ជាបញ្ហាផ្ទៃក្នុង ក្រុងប៉េកាំងមិនគាំទ្រការប្រកាសផ្តាច់ខ្លួនចេញគ្រប់រូបភាព ។
នៅពេលដែលអ្នកសារព័ត៌មាន សួរថាតើចិន មានការយល់ឃើញ និងចំណាប់អារម្មណ៍យ៉ាងចំពោះបញ្ហាដែលកំពុងតែកើតឡើងនៅក្នុងអេស្ប៉ាញ ក្រុងប៉េកាំង មិនធ្វើអត្ថាធិប្បាយឡើយ ដោយបានចាត់ទុកបញ្ហាទាំងនោះ គឺជារឿងកិច្ចការផ្ទៃក្នុងប៉ុណ្ណោះ។
ក្នុងសន្និសីទសារព័ត៌មានប្រចាំថ្ងៃនៅថ្ងៃ៣០ តុលា អ្នកនាំពាក្យក្រសួងការបរទេសចិន លោកស្រី Hua Chunying បានអះអាងយ៉ាងដូច្នេះថា៖« យើងគិតថា វាជារឿងកិច្ចការផ្ទៃក្នុងរបស់អេស្ប៉ាញ ។ យើងយល់ និងគាំទ្រការខិតខំរដ្ឋាភិបាលនេះក្នុងការបង្រួបបង្រួមជាតិ សាមគ្គីភាព ជាតិសាសន៍ និងបូរណភាពទឹកដី ។
ក្រុងប៉េកាំង មិនគាំទ្ររាល់សកម្មភាពផ្តាច់ខ្លួនចេញ និងការបំពានច្បាប់គ្រប់រូបភាព។ តែយ៉ាងណាក៏ដោយ ចិនជឿជាក់ថា អេស្ប៉ាញមានសមត្ថភាពគ្រប់គ្រាន់ក្នុងការរក្សាសណ្តាប់ធ្នាប់សង្គម និងធានាពីសិទ្ធិនិងផលប្រយោជន៍របស់ពលរដ្ឋផងដែរ ។
សូមរម្លឹកផងដែរថា នៅថ្ងៃ០១ តុលាកន្លងទៅ លោក Carles Puigdemont បានដឹកនាំឲ្យមានការធ្វើប្រជាមតិមួយផ្តាច់ខ្លួនតំបន់ Catalonia ចេញពីអេស្ប៉ាញ ។ ប្រជាជនតំបន់ Catalonia ៩០ភាគរយបោះឆ្នោតគាំទ្រការផ្តាច់ខ្លួនក្នុងប្រជាមតិ ដែលរដ្ឋាភិបាលអេស្ប៉ាញចាត់ទុកជាទង្វើខុសច្បាប់។
មកទល់ពេលនេះ ការប៉ុនប៉ងផ្តាច់ខ្លួនចេញពីអេស្ប៉ាញ ទំនងជាគ្មានលទ្ធផលអ្វីឡើយ ដ្បិតរដ្ឋាភិបាលអេស្ប៉ាញ ទើបបានសម្រេចប្រើប្រាស់អំណាចរបស់ខ្លួនបញ្ចប់ការផ្តល់ស្វ័យភាពដល់តំបន់ Catalonia នៅចុងសប្តាហ៍នេះ ក្រោយពេលដែលសភាតំបន់ Catalonia បានសម្រេចបោះឆ្នោតប្រកាសឯករាជ្យពីអេស្ប៉ាញនោះ ៕
Tag:
ចិន
អេស្ប៉ាញ
Catalonia
© រក្សាសិទ្ធិដោយ thmeythmey.com