របបសឹកថៃ៖ យីងឡាក់ លែងប្រើប្រាស់លិខិតឆ្លងដែនជនជាតិថៃដើម្បីធ្វើដំណើរបានទៀតហើយ

អន្តរជាតិ

របបសឹកថៃ៖ យីងឡាក់ លែងប្រើប្រាស់លិខិតឆ្លងដែនជនជាតិថៃដើម្បីធ្វើដំណើរបានទៀតហើយ

31, Oct 2017 , 10:19 pm

រូបភាព

ដោយ:

រដ្ឋាភិបាលសឹកថៃ បានលុបចោលលិខិតឆ្លងដែនទាំងបួន ដែលកំពុងតែប្រើប្រាស់ដោយអតីតនាយករដ្ឋមន្ត្រីថៃលោកស្រី យីងឡាក់ ស៊ីនណាវ៉ាត់ ។ នេះជាចំណាត់ការថ្មីមួយបន្ថែមទៀតដែលត្រូវបានដាក់ចេញដើម្បីប្រឆាំងនឹងលោកស្រី យីងឡាក់ បន្ទាប់ពីលោកស្រី មិនបង្ហាញខ្លួនតាមដីកាកោះរបស់តុលាការ។

លិខិតឆ្លងដែនទាំងបួន ដែលកាន់កាប់ដោយអតីតនាយករដ្ឋមន្ត្រី យីងឡាក់ ស៊ីនណាវ៉ាត់ ត្រូវបានបញ្ចប់សុពលភាពដោយក្រសួងការបរទេសថៃរួចហើយ ។ នេះ គឺជាការអះអាងរបស់អ្នកនាំពាក្យក្រសួងការបរទេសថៃ លោក Busadee ដែលត្រូវបានចុះផ្សាយដោយសារព័ត៌មានថៃ The Nation នៅថ្ងៃ៣១ តុលា ។

អ្នកនាំពាក្យ បានពន្យល់ថា ការលុបចោលនេះ ធ្វើឡើងតាមសំណើរបស់ប៉ូលិសថៃ ហើយលិខិតឆ្លងដែនទាំងបួននោះ មានពីរជាលិខិតឆ្លងដែនធម្មតា និងពីរផ្សេងទៀតជាលិខិតឆ្លងដែនការទូត ។

អ្នកនាំពាក្យដដែល បានសង្កត់ធ្ងន់ទៀតថា ពីពេលនេះតទៅ លោកស្រី យីងឡាក់ មិនអាចប្រើប្រាស់លិខិតឆ្លងដែនជនជាតិថៃដើម្បីធ្វើដំណើរបានទៀតឡើយ ហើយរដ្ឋាភិបាលថៃ ក៏បានណែនាំពីចំណាត់ការរបស់ខ្លួនទៅគ្រប់បណ្តាស្ថានទូតថៃទូទាំងពិភពលោករួចហើយដែរ។

សូមរម្លឹកបន្តិចដែរថា នៅថ្ងៃទី២៧ កញ្ញា តុលាការកំពូលថៃបានកាត់ទោសកំបាំងមុខលើសំណុំរឿងរបស់អតីតនាយករដ្ឋមន្ត្រី យីងឡាក់ ដោយសម្រេចឲ្យជាប់ពន្ធនាគារ៥ឆ្នាំពីបទធ្វេសប្រហែសក្នុងការដឹកនាំដែលធ្វើឲ្យរដ្ឋខាតបង់ទឹកប្រាក់រាប់លានដុល្លារដោយសារកម្មវិធីស្រូវអង្កររដ្ឋ។

គេនៅមិនទាន់ដឹងច្បាស់ថា លោកស្រីអតីតនាយករដ្ឋមន្ត្រី កំពុងតែស្នាក់នៅទីក្រុងឌូបៃ ឬទីក្រុងឡុងដ៍ ដូចតាមសារព័ត៌មានមួយចំនួនចុះផ្សាយឡើយ។ វាកាន់តែស្មុគស្មាញ បន្ទាប់ពីរបបសឹកបញ្ចប់សុពលភាពលិខិតឆ្លងដែនទាំងបួនរបស់លោកស្រី ដោយគេមិនដឹងថាលោកស្រីនឹងប្រើប្រាស់លិខិតឆ្លងដែនបរទេសឬយ៉ាងណានោះទេ៕