ប្រធានាធិបតីកូរ៉េខាងត្បូង ប្រកាសមិនទទួលស្គាល់កូរ៉េខាងជើងជា «រដ្ឋនុយក្លេអ៊ែរ»

អន្តរជាតិ

ប្រធានាធិបតីកូរ៉េខាងត្បូង ប្រកាសមិនទទួលស្គាល់កូរ៉េខាងជើងជា «រដ្ឋនុយក្លេអ៊ែរ»

01, Nov 2017 , 9:20 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី១ ខែវិច្ឆិកា បានប្រកាសថា កូរ៉េខាងត្បូងនឹងមិនទទួលស្គាល់កូរ៉េខាងជើងជា «រដ្ឋនុយក្លេអ៊ែរ» ឡើយ ហើយរដ្ឋាភិបាលលោកនឹងប្រើប្រាស់គ្រប់មធ្យោបាយដើម្បីរំសាយនុយក្លេអ៊ែរពីឧបទ្វីបកូរ៉េ។ ជាមួយគ្នានេះ លោក មូន ចេអ៊ីន ក៏បានប្ដេជ្ញាចិត្តដែរថា ក្រុងសេអ៊ូលនឹងមិនផលិតនុយក្លេអ៊ែរដូចក្រុងព្យុងយ៉ាង ឬទទួលយកអាវុធពីបរទេសឡើយ ទោះមានការគំរាមកំហែងលើខ្លួនក្ដី។

ការសាកល្បងគ្រាប់នុយក្លេអ៊ែរ និងការបាញ់មីស៊ីលដែលអាចបំពាក់អាវុធមួយនេះពីសំណាក់កូរ៉េខាងជើង ពិតជាធ្វើឲ្យអាមេរិក និងកូរ៉េខាងត្បូងនៅមិនស្ងប់ចិត្តឡើយ។ នៅកូរ៉េខាងត្បូង បណ្ដាអ្នកនយោបាយ និងប្រព័ន្ធផ្សព្វផ្សាយបានលើកឡើងពីក្ដីបារម្ភចំពោះសន្តិសុខជាតិ ប្រឈមមុខការគំរាមកំហែងឥតឈប់ឈរនេះ ហើយបានស្នើឲ្យមានការពង្រាយអាវុធនុយក្លេអ៊ែរយុទ្ធសាស្ត្ររបស់អាមេរិកលើទឹកដីកូរ៉េខាងត្បូងឡើងវិញផង។

យ៉ាងណាមិញ លោកប្រធានាធិបតី មូន ចេអ៊ីន បានប្រកាសជំហរដាច់ខាតថា លោកមិនអនុញ្ញាតឲ្យកូរ៉េខាងត្បូងមាននុយក្លេអ៊ែរឡើយ។ ថ្លែងក្នុងកិច្ចប្រជុំសភានៅថ្ងៃទី១ ខែវិច្ឆិកា លោក មូន ចេអ៊ីន បញ្ជាក់ច្បាស់ៗថា ផ្អែកតាមសេចក្ដីប្រកាសរួមស្ដីពីការរំសាយនុយក្លេអ៊ែររវាងកូរ៉េទាំងពីរ កូរ៉េខាងត្បូងមិនទទួលស្គាល់កូរ៉េខាងជើងជារដ្ឋនុយក្លេអ៊ែរឡើយ ហើយកូរ៉េខាងត្បូងក៏មិនផលិត ឬក៏ស្តុកទុកនុយក្លេអ៊ែរក្នុងឃ្លាំងដែរ។

ជាមួយគ្នានោះដែរ លោក មូន ចេអ៊ីន ក៏លើកពីការប្ដេជ្ញាចិត្តក្នុងការនាំយកសន្តិភាពសម្រាប់ឧបទ្វីបកូរ៉េ ហើយអន្តរាគមន៍យោធាណាមួយ ត្រូវតែមានការយល់ព្រមពីកូរ៉េខាងត្បូងសិន។ ការលើកឡើងបែបនេះ ហាក់ដូចជាការឆ្លើយតបនឹងការផ្លោងពាក្យសម្ដីដាក់គ្នារវាងអាមេរិក និងកូរ៉េខាងជើង រហូតដល់ប្រធានាធិបតី ដូណាល់ ត្រាំ គំរាមកម្ទេចក្រុងព្យុងយ៉ាងថែមទៀត។ បើតាមលោក មូន អនាគតឧបទ្វីបកូរ៉េ ទុកឲ្យប្រជាជនកូរ៉េជាអ្នកសម្រេចខ្លួនឯង។

«យើងមិនចង់ឲ្យប្រវត្តិសាស្ត្រឈឺចាប់ដូចជាការគ្រប់គ្រងរបស់ជប៉ុន និងការបែងចែកទឹកដីសម័យសង្គ្រាមកើតឡើងម្ដងទៀតឡើយ ព្រោះវាសនារបស់ប្រទេសកូរ៉េត្រូវបានចាត់ចែងដោយមិនមានការគោរពឆន្ទះប្រជាជនកូរ៉េទេ»។ នេះជាការសង្កត់ធ្ងន់របស់ប្រធានាធិបតីកូរ៉េខាងត្បូង ដែលបានបន្តថា រដ្ឋាភិបាលលោកដែលកើតចេញចំពេលគ្រោះថ្នាក់ នឹងព្យាយាមរក្សាស្ថិរភាពតំបន់ឲ្យបាន។ នេះបើតាមការផ្សាយរបស់ទីភ្នាក់ងារព័ត៌មាន Xinhua ។

ជុំវិញដំណោះស្រាយវិបត្តិនុយក្លេអ៊ែរកូរ៉េខាងជើងវិញ ច្រកចេញនៃបញ្ហានៅតែមិនទាន់រកឃើញនៅឡើយ ខណៈដែលរបបដឹកនាំកូរ៉េខាងជើងហាក់គ្មានបំណងចរចាអ្វីទាំងអស់ និងថែមទាំងបដិសេធអង្គុយចរចាលើកម្មវិធីនុយក្លេអ៊ែរទៅទៀត។ ឯរដ្ឋបាលក្រុងវ៉ាស៊ិនតោនវិញ ក៏មានជំហរមិនស្របគ្នាដែរ ដោយប្រមុខការទូត និងការពារជាតិ នៅតែប្រកាន់ជំហរចរចា តែលោក ត្រាំ ចង់ប្រើធម៌ក្ដៅលើកូរ៉េខាងជើងជាង៕