របបសឹកថៃ ទទូចឲ្យប្រទេសដៃគូជូនដំណឹងពាក់ព័ន្ធនឹងការស្នាក់នៅរបស់លោកស្រី យីង ឡាក់

អន្តរជាតិ

របបសឹកថៃ ទទូចឲ្យប្រទេសដៃគូជូនដំណឹងពាក់ព័ន្ធនឹងការស្នាក់នៅរបស់លោកស្រី យីង ឡាក់

01, Nov 2017 , 9:59 pm

រូបភាព

ដោយ:

រដ្ឋាភិបាលរបបសឹកថៃ បានអះអាងថា មកទល់ពេលនេះ មិនទាន់មានការរាយការណ៍ណាបញ្ជាក់ពីទីកន្លែងដែលអតីតនាយករដ្ឋមន្ត្រីថៃ លោកស្រី យីងឡាក់ ស្នាក់នៅឡើយ ហើយលោកស្រី ក៏មិនទាន់ទទួលបានសិទ្ធិជ្រកពីបណ្តាប្រទេសណាមួយផងដែរ ។

រដ្ឋមន្ត្រីការបរទេសថៃលោក Don Pramudwinai នៅថ្ងៃ៣១ តុលា បានថ្លែងឲ្យដឹង ថា រដ្ឋាភិបាលអង់គ្លេស បានជូនដល់ដំណឹងដល់រដ្ឋាភិបាលថៃ ថា ក្នុងករណីលោកស្រី យីងឡាក់ ពិតជាបានស្នាក់នៅអង់គ្លេសមែន នោះវា គ្រាន់តែការស្នាក់នៅធម្មតានោះទេ ពោលគឺមិនជាប់ពាក់ព័ន្ធនឹងការសុំសិទ្ធិជ្រកកោនអ្វីឡើយ ។ នេះបើយោងតាមការចុះផ្សាយរបស់សារព័ត៌មានថៃ The Nation ។

លោករដ្ឋមន្ត្រី លើកឡើងបែបនេះ ដើម្បីជាការឆ្លើយតប និងបំភ្លឺទៅនឹងសំណួររបស់អ្នកសារព័ត៌មាន ដែលបានសួរថាតើអតីតនាយករដ្ឋមន្ត្រីថៃ លោកស្រីយីងឡាក់ ស៊ីនណាវ៉ាត់ ពិតជាទទួលបានសិទ្ធិជ្រកកោននយោបាយពីអង់គ្លេសមែនឬយ៉ាងណា ។

សូមរម្លឹកបន្តិចដែរថា នៅចុងខែកញ្ញាកន្លងទៅ តុលាការកំពូលថៃ បានកាត់ទោសកំបាំងមុខលើសំណុំរឿងរបស់អតីតនាយករដ្ឋមន្ត្រី យីងឡាក់ ដោយសម្រេចឲ្យជាប់ពន្ធនាគារ៥ឆ្នាំពីបទធ្វេសប្រហែសក្នុងការដឹកនាំដែលធ្វើឲ្យរដ្ឋខាតបង់ទឹកប្រាក់រាប់លានដុល្លារដោយសារកម្មវិធីស្រូវអង្កររដ្ឋ។

នៅថ្ងៃ៣១ តុលាដដែលនោះ អ្នកនាំពាក្យរដ្ឋាភិបាលថៃ ក៏បានអះអាងដែរថា លោកស្រី យីងឡាក់ មិនអាចប្រើប្រាស់លិខិតឆ្លងដែនជនជាតិថៃដើម្បីធ្វើដំណើរបានទៀតឡើយ ពោលគឺ លិខិតឆ្លងដែនរបស់លោកស្រី ត្រូវបានបញ្ចប់សុពលភាពហើយ ។ ហើយរដ្ឋាភិបាលថៃ ក៏បានណែនាំពីចំណាត់ការរបស់ខ្លួនទៅគ្រប់បណ្តាស្ថានទូតថៃទូទាំងពិភពលោករួចហើយដែរ។ ចំណាត់ការនេះ គឺជាចំណាត់ការក្តៅមួយ ដែលបិទផ្លូវលោកស្រី មិនឲ្យធ្វើដំណើរទៅណាបាន ពោលគឺ លោកស្រី យីងឡាក់ អាចធ្វើដំណើរឆ្លងប្រទេសបានលុះត្រាតែលោកស្រី មានលិខិតឆ្លងដែនបរទេសផ្សេងទៀត ។

ជុំវិញសំណុំរឿងអតីតនាយករដ្ឋមន្ត្រីថៃនេះដែរ ប្រមុខរបបសឹកថៃលោកឧត្តមសេនីយ៍ ប្រាយុទ្ធ ចន្ទ អូចា ក៏បានថ្លែងក្នុងនៅក្នុងសន្និសីទប្រចាំសបា្តហ៍របស់លោកដែរថា អាជ្ញាធរថៃ នៅមិនទាន់ទទួលព័ត៌មានពាក់ព័ន្ធនឹងទីកន្លែងដែលលោកស្រីយីងឡាក់ ស្នាក់នៅពិតប្រាកដឡើយ ។ លោកនាយករដ្ឋមន្ត្រី ក៏បានទទូចឲ្យប្រទេសដៃគូផ្តល់ដំណឹងឲ្យថៃពីទីកន្លែងដែលលោកស្រីយីងឡាក់ស្នាក់នៅ ដើម្បីផ្តល់លទ្ធភាពឲ្យរដ្ឋាភិបាលថៃ អាចអនុវត្តច្បាប់របស់ខ្លួន ៕