អន្តរជាតិ
ហ្វីលីពីន៖ មេដឹកនាំពិភពលោក ២១ និងប្រមុខ UN នឹងចូលរួមប្រជុំកំពូលអាស៊ានសប្តាហ៍ក្រោយ
× មេដឹកនាំប្រទេស ២១ និងប្រមុខអង្គការសហប្រជាជាតិនឹងអញ្ជើញមកចូលរួមកិច្ចប្រជុំកំពូលអាស៊ានលើកទី ៣១ នៅប្រទេសហ្វីលីពីននៅសប្តាហ៍ក្រោយនេះ។ ទីម័រខាងកើតនឹងបញ្ជូនប្រតិភូតំណាងរបស់ខ្លួនក្នុងនាមជាភ្ងៀវកិត្តិយសមកចូលរួមក្នុងកិច្ចប្រជុំផងដែរ។
ប្រធានក្រុមប្រឹក្សាជាតិហ្វីលីពីនទទួលបន្ទុករៀបរៀបចំកិច្ចប្រជុំកំពូលអាស៊ាន Marciano Paynor បានប្រាប់អ្នកសារព័ត៌មានថា មេដឹកនាំចំនួន ២១ រួមជាមួយប្រមុខអង្គការសហប្រជាជាតិលោក Antonio Guterres នឹងមានវត្តមានក្នុងកិច្ចប្រជុំកំពូលអាស៊ានលើកទី ៣១ នៅហ្វីលីពីនសប្តាហ៍ក្រោយ។
បើតាមសារព័ត៌មាន Philippine Star លោក Marciano Paynor បានបញ្ជាក់ថា មកដល់ពេលនេះមិនទាន់មានការផ្តល់ព័ត៌មានថា មេដឹកនាំទាំង ២២ រូបនេះនឹងមិនចូលរួមក្នុងកិច្ចប្រជុំឡើយ។ ហើយប្រទេសទីម័រខាងកើត នឹងបញ្ជូនអ្នកតំណាងរបស់ខ្លួនមកចូលរួមក្នុងនាមជាភ្ងៀវផងដែរ។
«ដរាបណាមេដឹកនាំទាំងនោះមិនបានរាយការណ៍ប្រាប់ជាមុនថា គេមិនបានមកចូលរួមទេ យើងអាចសន្និដ្ឋានបានថា ពួកគេនឹងមកចូលរួមជាធម្មតា។ ដូច្នេះមេដឹកនាំអាស៊ានទាំង ១០ រួមជាមួយសមាជិកកិច្ចប្រជុំអាស៊ីបូព៌ា ៨ រួមជាមួយប្រទេសពីរទៀតដែលរៀបចំពិធីខួបលើកទី ៤០នៃទំនាក់ទ្វេភាគីជាមួយអាស៊ាន មានសហភាពអឺរ៉ុប និងកាណា »។ នេះជាសម្តីរបស់លោក Marciano Paynor។
កិច្ចប្រជុំកំពូលអាស៊ានលើកទី ៣១ នេះនឹងត្រូវរៀបចំឡើងព្រមៗគ្នានៅក្នុងទីក្រុងម៉ានីល ផង និងនៅមូលដ្ឋានយោធា Clark នៅខេត្ត Pampanga ផងដែរពីថ្ងៃ ១១ ដល់ថ្ងៃ ១៤ ខែវិច្ឆិកា។ ដៃគូសន្ទនាអាស៊ានមានចិន ឥណ្ឌា អូស្ត្រាលី កាណាដា សហភាពអឺរ៉ុប ជប៉ុន នូវែលសេឡង់ រុស្ស៊ី កូរ៉េខាងត្បូង និងអាមេរិកនឹងចូលរួមក្នុងការរៀបចំកម្មវិធីនេះដែរ។
ប្រធានាធិបតីអាមេរិក ដូណាល់ ត្រាំ នឹងអញ្ជើញទៅដល់ហ្វីលីពីននៅថ្ងៃ ១២ខែវិច្ឆិកាបន្ទាប់ពីចាកចេញពីវៀតណាម។ លោកនឹងជួបជាមួយមេដឹកនាំអាស៊ាននិងដៃគូសន្ទនាអាស៊ាននៅក្នុងកម្មវិធីលាងសាយភោជន៍ពិសេសដើម្បីប្រារព្ធខួបលើកទី ៥០នៃការបង្កើតអាស៊ាន។ លោក ត្រាំ ក៏នឹងបន្តជួបជជែកទ្វេភាគីជាមួយលោក ឌូទើតេ នៅក្នុងពេលទស្សនកិច្ចនៅហ្វីលីពីនផងដែរ។
សូមបញ្ជាក់ថា កិច្ចប្រជុំអាស៊ាននឹងត្រូវរៀបចំឡើងពីថ្ងៃ ៩ ដល់ថ្ងៃ១៤ ខែវិច្ឆិកា។ វិមានប្រធានាធិបតីហ្វីលីពីនបានប្រកាស កំណត់យកថ្ងៃ ១៣ ដល់ថ្ងៃ ១៥ ខែវិច្ឆិកា ជាថ្ងៃឈប់សម្រាកពិសេសនៅកណ្តាលរដ្ឋធានីម៉ានីល ខេត្ត Pampanga និង Bulacan ដើម្បីសម្រួលដល់កិច្ចប្រជុំអស៊ាន៕
Tag:
ហ្វីលីពីន
អាស៊ាន
Marciano Paynor
© រក្សាសិទ្ធិដោយ thmeythmey.com