ពូទីន ទៅអ៊ីរ៉ង់ដើម្បីពិភាក្សាពីផែនទីសន្តិភាពស៊ីរី និងកិច្ចព្រមព្រៀងនុយក្លេអ៊ែរអ៊ីរ៉ង់

អន្តរជាតិ

ពូទីន ទៅអ៊ីរ៉ង់ដើម្បីពិភាក្សាពីផែនទីសន្តិភាពស៊ីរី និងកិច្ចព្រមព្រៀងនុយក្លេអ៊ែរអ៊ីរ៉ង់

02, Nov 2017 , 10:59 pm

រូបភាព

ដោយ: សៅ ផលនិស្ស័យ (Sao Phal Niseiy)

លោក វ្ល៉ាឌីមៀ ពូទីន អញ្ជើញទៅទស្សនកិច្ចនៅប្រទេសអ៊ីរ៉ង់នៅថ្ងៃពុធ ទី ១ ខែវិច្ឆិកា ដោយលោកបានជួបពិភាក្សាជាមួយមេដឹកនាំអ៊ីរ៉ងផង។ ផែនទីកិច្ចព្រមព្រៀងសន្តិភាពស៊ីរី និងបញ្ហាកិច្ចព្រមព្រៀងនុយក្លេអ៊ែរអ៊ីរ៉ង់ត្រូវបានមេដឹកនាំទាំងពីរលើកមកពិភាក្សាផងដែរ។

ថ្ងៃទី ១ ខែវិច្ឆិកា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានជួបពិភាក្សាជាមួយប្រធានាធិបតីអ៊ីរ៉ង់លោក Hassan Rouhani ដោយផ្តោតសំខាន់លើបញ្ហាសំខាន់ជាច្រើនទាំងទំនាក់ទំនងទ្វេភាគី រួមទាំងបញ្ហាសន្តិសុខតំបន់ដូចជាសង្គ្រាមស៊ីរី និងកិច្ចព្រមព្រៀងនុយក្លេអ៊ែរផងដែរ។

យោងតាមទីភ្នាក់ងារព័ត៌មាន AFP ក្នុងពេលជំនួបពិភាក្សានេះ លោក ពូទីន និងលោក Rouhani បានជជែកពីបញ្ហាផែនទីសនិ្តភាពនៅស៊ីរី រួមជាមួយបញ្ហាកិច្ចព្រមព្រៀងនុយក្លេអ៊ែរអ៊ីរ៉ង់ផងដែរ។ បន្ទាប់ពីជួបជាមួយប្រធានាធិបតីអ៊ីរ៉ង់ លោក ពូទីន ក៏ជួបជាមួយមេដឹកនាំកំពូលអ៊ីរ៉ង់ Ayatollah Ali Khamenei ដែរ។

ពាក់ព័ន្ធបញ្ហាស៊ីរី បើតាមការបញ្ជាក់របស់វិមានប្រធានាធិបតីរុស្ស៊ី លោក ពូទីន និងមេដឹកនាំអ៊ីរ៉ង់ផ្តោតសំខាន់លើការជំរុញឲ្យមានការចូលតុចរចារវាងរបបដឹកនាំស៊ីរី និងក្រុមប្រឆាំងដើម្បីឈានទៅបង្កើតដំណោះស្រាយនយោបាយ។ កាលពីថ្មីៗនេះ រុស្ស៊ី អ៊ីរ៉ង់ និងតួកគី បានសន្យាចាប់ជំរុញភាគីឲ្យបង្កើតដំណោះស្រាយនយោបាយ ក្រោយការចរចានៅទឹកដីកាហ្សាក់ស្ថានកាលពីថ្ងៃអង្គារទី ៣១ ខែតុលា។

អ៊ីរ៉ង់ និងរុស្ស៊ីជាខ្នងបង្អែកដ៏រឹងមាំរបស់របបដឹកនាំស៊ីរី រួមជាមួយតួកគីដែលជាខ្នងបង្អែកក្រុមប្រឆាំងផងដែរនោះបានប្រឹងប្រែងយ៉ាងខ្លាំងកន្លងមកដើម្បីជំរុញឲ្យភាគីជម្លោះចូលតុចរចា និងចាប់ផ្តើមបញ្ចប់ការប្រយុទ្ធ។ ក្នុងឆ្នាំនេះកិច្ចចរចាជាច្រើនជំហានត្រូវបានរៀបចំឡើងក្រោមការជ្រោមជ្រែងពីសំណាក់ភាគីទាំងបី ហើយវាមានការឯកភាពគ្នាបង្កើតតំបន់គ្មានការប្រយុទ្ធគ្នានៅតំបន់ជាច្រើនទូទាំងប្រទេសស៊ីរី។

ក្រៅពីបញ្ហាស៊ីរី លោក ពូទីន ក៏ពិភាក្សាពីបញ្ហាកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ដែលបង្កើតឡើងដោយមហាអំណាចប្រាំ បូកអាល្លឺម៉ង់ផងដែរ។កិច្ចព្រមព្រៀងនេះហើយដែលធានាឲ្យមានការដកទណ្ឌកម្មប្រឆាំងអ៊ីរ៉ង់ភាគច្រើនកន្លងមកនោះ។

ប៉ុន្តែបច្ចុប្បន្នកិច្ចព្រមព្រៀងនេះស្ថិតក្រោមសម្ពាធរបស់ប្រធានាធិបតីអាមេរិកដូណាល់ ត្រាំ ដោយលោកមិនព្រមទទួលស្គាល់ និងគាំទ្រកិច្ចព្រមព្រៀងនេះឡើយកន្លងមក ហើយគំរាមលុបចោលកិច្ចព្រមព្រៀងនេះទៀត។យ៉ាងណាមិញ លោក ពូទីន បង្ហាញជំហរគាំទ្រកិច្ចព្រមព្រៀងនេះ ប្រឆាំងនឹងការសម្រេចចិត្តរបស់អាមេរិក។

សូមបញ្ជាក់ថា នេះ ជាដំណើទស្សនកិច្ចលើកទីពីរហើយរបស់លោក ពូទីន មកកាន់ប្រទេសអ៊ីរ៉ង់នេះ។ ទស្សនកិច្ចលើកទីមួយធ្វើឡើងកាលពីឆ្នាំ ២០១៥ កន្លងមកនោះ ៕