អន្តរជាតិ
ប្រទេសណាខ្លះ ដែលប្រើប្រាស់ ប្រាក់អឺរ៉ូ ជារូបិយវត្ថុផ្លូវការ ?
× អឺរ៉ូ គឺជារូបិយវត្ថុមួយរបស់បណ្តាប្រទេសនៅក្នុងតំបន់អឺរ៉ុប ។ ការប្រើប្រាស់រូបិយវត្ថុអឺរ៉ូ ក៏ជាសក្ខីកម្មមួយ ដែលបង្ហាញពីជោគជ័យនៃសមាហរកម្មរបស់សហភាពអឺរ៉ុប ដែលអាចឈានដល់គោលដៅមួយនៃការប្រើប្រាស់រូបិយវត្ថុរួមនៅក្នុងតំបន់ ដែលពិតជាបានផ្តល់សារៈសំខាន់ជាច្រើនលើវិស័យសេដ្ឋកិច្ច និងពាណិជ្ជកម្ម ។
តាមពិតទៅសមាជិកសហភាពអឺរ៉ុបទាំងអស់មានចំនួន២៨ប្រទេស ក៏ប៉ុន្តែ មានតែសមាជិក១៩ប្រទេសប៉ុណ្ណោះ ដែលបានព្រមព្រៀងប្រើប្រាស់រូបិយវត្ថុ អឺរ៉ូ ជារូបិយវត្ថុផ្លូវការរបស់ប្រទេស ហើយប្រទេសសមាជិកទាំង១៩នេះផងដែរ ក៏ត្រូវបានហៅថា តំបន់អឺរ៉ូ ។
ការប្រើប្រាស់រូបិយវត្ថុជាសមូហភាពរបស់ប្រទេសទាំង១៩នៃសមាជិកសហភាពអឺរ៉ុប មានផលប្រយោជន៍ជាច្រើន ដូចជា ការលុបបំបាត់នៃការឡើងចុះអត្រាប្តូរប្រាក់, ផ្តល់ភាពងាយស្រួលសម្រាប់ក្រុមហ៊ុនមកវិនិយោគលើពាណិជ្ជកម្មឆ្លងដែន, សេដ្ឋកិច្ច កាន់តែមានលំនឹង ហើយប្រជាជន ក៏កាន់តែមានភាពងាយស្រួលក្នុងការទិញលក់ និងធ្វើដំណើរកម្សាន្តតាមបណ្តាប្រទេសក្នុងតំបន់ ។ សម្រាប់ក្របខណ្ឌអន្តរជាតិវិញនោះ វា កាន់តែធ្វើឲ្យ សហភាពអឺរ៉ុប កាន់តែមានឥទ្ធិពល ។
ខាងក្រោមនេះ គឺជាប្រទេសសមាជិកសហភាពអឺរ៉ុបទាំង១៩ប្រទេស ដែលប្រើប្រាស់ ប្រាក់ អឺរ៉ូ ជារូបិយវត្ថុផ្លូវការ ៖
១. អូទ្រីស ២. ប៊ែលហ្ស៊ិក ៣. ស៊ីប ៤. អេស្តូនី ៥. ហ្វាំងឡង់ ៦. បារាំង ៧. អាល្លឺម៉ង់ ៨. ក្រិក ៩. អៀរឡង់ ១០. អ៊ីតាលី ១១. ឡេតូនី ១២. លីទុយអានី ១៣. លុចសំបូ ១៤. ម៉ាល់ត៌
១៥. ហូឡង់ ១៦. ព័រទុយហ្គាល់ ១៧. ស្លូវ៉ាគី ១៨. ស្លូវេនី និង ១៩. អេស្ប៉ាញ ៕
© រក្សាសិទ្ធិដោយ thmeythmey.com