អន្តរជាតិ
នាយករដ្ឋមន្ត្រីកាណាដា មកទស្សនកិច្ចវៀតណាម និងចូលរួមកិច្ចប្រជុំអាស៊ាននៅហ្វីលីពីន
× នាយករដ្ឋមន្ត្រីកាណាដា លោក ចាស្ទីន ទ្រូដូ (Justin Trudeau)បានប្រកាសថា លោកនឹងបំពេញទស្សនកិច្ចផ្លូវការនៅវៀតណាម និងហ្វីលីពីនចាប់ពីថ្ងៃ ៦ ខែវិច្ឆិកានេះ។ នៅវៀតណាម លោកនឹងជួបជាមួយមេដឹកនាំវៀតណាម និងចូលរួមកិច្ចប្រជុំ APEC ហើយបន្តដំណើរទៅហ្វីលីពីនដើម្បីចូលរួមកិច្ចប្រជុំកំពូលអាស៊ានលើកទី ៣១ ថែមទៀត។
ចាប់ពីថ្ងៃ ៦ ដល់ថ្ងៃ ១៤ ខែវិច្ឆិកានេះ លោក ចាស្ទីន ទ្រូដូ នឹងចាប់ផ្តើមដំណើរទស្សនកិច្ចរបស់ខ្លួនកាន់តំបន់អាស៊ី។ លោកនឹងបំពេញទស្សនកិច្ចផ្លូវការនៅវៀតណាម និងចូលរួមក្នុងកិច្ចប្រជុំវេទិកាកិច្ចសហប្រតិបត្តិការសេដ្ឋកិច្ច អាស៊ីប៉ាស៊ីហ្វិក។
«ទំនាក់ទំនងរវាងកាណាដាជាមួយវៀតណាមរឹងមាំដោយសារចំណងមិត្តភាពរវាងប្រជាជននិងប្រជាជន ហើយទំនាក់ទំនងនោះរីកចម្រើនលូតលាស់លឿនក្នុងរយៈពេល ៤០ឆ្នាំកន្លងមក។ ខ្ញុំទន្ទឹងរង់ចាំជួយជាមួយមេដឹកនាំវៀតណាម ដើម្បីជំរុញការអភិវឌ្ឍអភិបាលកិច្ច និងសិទិ្ធមនុស្សរួមទាំងពង្រឹងទំនាក់ទំនងទ្វេភាគីសេដ្ឋកិច្ច វិនិយោគ និងបង្កើតឱកាសសម្រាប់ប្រជាជនយើង»។ នេះជាសម្តីរបស់លោក ចាស្ទីន ទ្រូដូ ដែលស្រង់ដោយទីភ្នាក់ងារព័ត៌មានចិន ស៊ីនហួ។
ពេលបំពេញទស្សនកិច្ចផ្លូវការលោក ទ្រូដូ នឹងជួបពិភាក្សាជាមួយប្រធានាធិបតីវៀតណាម Tran Dai Quang នាយករដ្ឋមន្ត្រី Nguyen Xuan Phuc ប្រធានសភា Nguyen Thi Kim Ngan និងលេខាធិការបក្សកុម្មុយនីស្តវៀតណាម Nguyen Phu Trong។
ក្រៅពីជួបមេដឹកនាំនយោបាយ លោក ទ្រូដូ ក៏នឹងបន្តដំណើរទៅកាន់ក្រុងហូជីមិញ ដើម្បីជួបជាមួយបណ្តាអ្នកជំនួញធំៗ និងចូលរួមកិច្ចពិភាក្សាជាមួយនិស្សិតសាកលវិទ្យាល័យ Ton Duc Thang ផង។ បន្ទាប់មកទៀតលោកបន្តដំណើរទៅកាន់ក្រុង ដាណាង ដើមីចូលរួមក្នុងកិច្ចប្រជុំកំពូលវេទិកាសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC )។
ក្រោយចប់កិច្ចប្រជុំ មេដឹកនាំកាណាដា រូបនេះនឹងបន្តដំណើរទៅកាន់ប្រទេសហ្វីលីពីន ដើម្បីចូលរួមក្នុងកិច្ចប្រជុំកំពូលអាស៊ានលើកទី ៣១។ បើតាមទីភ្នាក់ងារព័ត៌មានចិនដដែល លោក ទ្រូដូ នឹងចូលរួមក្នុងកិច្ចប្រជុំអាស៊ានកាណាដាដើម្បីរម្លឹកខួបលើកទី ៤០ នៃការបង្កើតទំនាក់ទំនងរួមគ្នារវាងភាគីទាំងពីរ។ ក្នុងកិច្ចប្រជុំនេះ មេដឹកនាំអាស៊ាន និងកាណាដា នឹងពិភាក្សានិងស្វែងរកវិធីសាស្ត្រដើម្បីពង្រឹងទំនាក់ទំនងនិងកិច្ចសហប្រតិបត្តិការទ្វេភាគីផង។
ក្រៅពីនេះ កាលពីខែសីហាកន្លងទៅ រដ្ឋាភិបាលហ្វីលីពីនបានប្រកាសថា ប្រធានាធិបតីរ៉ូឌ្រីហ្គោ ឌូទើតេ បានផ្ញើលិខិតអញ្ជើញផ្លូវការដើម្បីអញ្ជើញលោកនាយករដ្ឋមន្ត្រី ចាស្ទីន ទ្រូដូ ឲ្យមកចូលរួមកិច្ចប្រជុំកំពូលអាស៊ីបូព៌ាន ក្នុងនាមជាភ្ញៀវរបស់ប្រធានអាស៊ាន។
តាមពិតទៅ កាណាដាបានបន្តស្វះស្វែងរកឱកាសដើម្បីក្លាយជាសមាជិកកិច្ចប្រជុំកំពូលអាស៊ីបូព៌ា និងកិច្ចប្រជុំរដ្ឋមន្ត្រីការពារជាតិបូក តាំងពីយូរមកហើយ ហើយហ្វីលីពីនយល់ថា វាជាពេលល្អដែលត្រូវអញ្ជើញមេដឹកនាំប្រទេសមហាអំណាចមួយនេះឲ្យមកចូលរួមកិច្ចប្រជុំនៅខាងមុខផង។ ក្រៅពី កាណាដា លោក ឌូទើតេ ក៏បានអញ្ជើញប្រធានក្រុមប្រឹក្សាអឺរ៉ុបលោក Donald Tusk មកចូលរួមកិច្ចប្រជុំខាងលើក្នុងនាមជាភ្ញៀវរបស់ប្រធានអាស៊ានដែរ។៕
Tag:
ចាស្ទីន ទ្រូដូ
វៀតណាម
ហ្វីលីពីន
អាស៊ាន
© រក្សាសិទ្ធិដោយ thmeythmey.com