អន្តរជាតិ
ម៉ាល់ឌីវ៖ Passport Card អាចប្រើជាលិខិតឆ្លងដែន អត្តសញ្ញាណបណ្ណ បណ្ណបើកបរ កាតធនាគារ...
× កោះម៉ាល់ឌីវ ទើបបង្ហាញប្រភេទ ID Card ថ្មី ដែលអាចប្រើប្រាស់បានគ្រប់បែបយ៉ាង ក្នុងនោះមានដូចជា MasterCard អត្តសញ្ញាណបណ្ណ បណ្ណបើកបរ បណ្ណសុខភាព និងបណ្ណធានារ៉ាប់រង ហើយអ្វីដែលកាន់តែពិសេសបំផុតនោះ គឺវាត្រូវបានប្រើប្រាស់ធ្វើជាលិខិតឆ្លងដែនសម្រាប់ការធ្វើដំណើរផងដែរ។
ពលរដ្ឋ ម៉ាល់ឌីវ មិនចាំបាច់កាន់កាតច្រើនតាមខ្លួននោះឡើយ។ យោងតាមគេហទំព័រនាយកដ្ឋានអន្តោប្រវេសន៍ម៉ាល់ឌីវ លោក Abdulla Yameen Abdul Gayoom ប្រធានាធិបតីនៃប្រទេសដែនកោះមួយនេះ បានសម្ពោធដាក់ឲ្យប្រើប្រាស់ «Passport Card» ដែលជាប្រភេទកាតប្រើប្រាស់បានច្រើនមុខងារ។
ក្រោមកិច្ចសហការរវាងនាយកដ្ឋានអន្តោប្រវេសន៍ម៉ាល់ឌីវ និងក្រុមហ៊ុនអាល្លឺម៉ង់ Dermalog ព្រមទាំងមានការទទួលស្គាល់ពី Bank of Maldives ក្រុមហ៊ុន MasterCard ម៉ាល់ឌីវ ក្លាយជាប្រទេសទីមួយដែលប្រើ «Passport Card» សម្រាប់សេវាកម្ម e-services ក៏ដូចជា e-transport។
Passport Card កើតចេញពីគំនិតច្នៃប្រឌិតដ៏ថ្មីបំផុតមួយដែលធ្វើឡើងពីបន្ទះប្រភេទ Polycarbonate ហើយអាចមានសុពលភាពប្រើប្រាស់រហូតដល់ទៅ១០ឆ្នាំ ខណៈបច្ចុប្បន្នបណ្ណធនាគារទូទៅមានសុពលភាពត្រឹម៣ឆ្នាំប៉ុណ្ណោះ។
ក្រៅពីមានមុខងារជាបណ្ណធនាគារ Passport Card ក៏ត្រូវប្រើប្រាស់ជា បណ្ណបើកបរ បណ្ណសុខភាព ឬបណ្ណធានារ៉ាប់រង ផងដែរ។ អ្វីដែលពិសេសជាងនេះ វាជា «លិខិតឆ្លងដែន» ទំនើបមួយ ដែលអាចប្រើការបាននៅតាមច្រកអេឡិចត្រូនិច ដោយមិនចាំបាច់មានការបោះត្រាលើសៀវភៅ។
លោក Mohamed Anwar មន្ត្រីនាយកដ្ឋានអន្តោប្រវេសន៍ម៉ាល់ឌីវ បានលើកឡើងថា៖ «ច្រកទ្វារគឺបើកចំហរសម្រាប់នាយកដ្ឋាននានារបស់រដ្ឋ និងក្រុមហ៊ុនឯកជន ក្នុងការប្រើប្រាស់ Passport Card ដ៏ទំនើបរបស់យើង»៕
Tag:
ម៉ាល់ឌីវ
Passport Card
© រក្សាសិទ្ធិដោយ thmeythmey.com