ជាតិ
អាជ្ញាធរប្រាប់ឲ្យឈប់ទិញ-លក់អាវដែលមានអក្សរ «Police» និង «Army»
× ភ្នំពេញ៖ សាលារាជធានីភ្នំពេញបានអំពាវនាវដល់ប្រជាពលរដ្ឋ ទាំងអស់ឲ្យឈប់ទិញសម្លៀកបំពាក់ ឬសម្ភារៈផ្សេងៗ ដែលពាក់ព័ន្ធនិងសមត្ថកិច្ច ឬកងកម្លាំងប៉ូលីស។ លើសពីនេះទៅទៀតសាលារាជធានី ក៏បានអំពាវនាវឲ្យអាជីវករទាំងអស់បញ្ឈប់ការលក់សម្លៀកបំពាក់ ដែលស្រដៀងគ្នាទៅនិងនគរបាលជាតិ។ ការអំពាវនាវនេះបន្ទាប់ពីសមត្ថកិច្ចបានឃាត់ខ្លួនអ្នក ដែលបានពាក់អាវមានពាក្យថា Police និង Army ទាំងក្មេង ទាំងចាស់ ប្រមាណ១០០នាក់ មិនឲ្យចូលកម្សាន្ត ក្នុងន័យថែរក្សាសុវត្ថិភាព។
បើតាមការផ្សាយរបស់ Fresh News អភិបាលរាជធានីភ្នំពេញ លោកឃួង ស្រេង បានអំពាវនាវដល់ប្រជាពលរដ្ឋឲ្យបញ្ឈប់ការទិញសម្លៀកបំពាក់ និងឧបករណ៍ ដែលពាក់ព័ន្ធនិងកងកម្លាំងនគរបាល កងកម្លាំងប្រដាប់អាវុធហត្ថ និងកងកម្លាំងយោធា ដើម្បីចៀសវាងការប្រើប្រាស់ ហើយពាក់ព័ន្ធនឹងផ្លូវច្បាប់។ មិនតែប៉ុណ្ណោះលោកអភិបាលរាជធានីភ្នំពេញក៏បានអំពាវនាវដល់ដល់អាជីវករទាំងអស់ ឬអ្នកនាំចូលសម្លៀកបំពាក់ឲ្យបញ្ឈប់ការលក់ និងនាំចូលសម្លៀកបំពាក់ និងឧបករណ៍ទាំងនេះ ព្រោះការលក់សម្ភារៈទាំងនេះអាចនឹងមានទោសតាមផ្លូវច្បាប់។
ការថ្លែងបែបនេះ បន្ទាប់ពីកងកម្លាំងការពារសន្តិសុខសណ្ដាប់ធ្លាប់បានឃាត់ខ្លួនមនុស្សជាង១០០នាក់ ដែលមកពីតំបន់ខុសគ្នាមកចូលរួមពិធីបុណ្យអុំទូក នៅយប់ថ្ងៃទី២នៃពិធីបុណ្យអុំទូក ហើយបានពាក់អាវដែលមានសរសេរថា Police និង Army ។
ស្នងការនគរបាលរាជធានីភ្នំពេញលោកជួន សុវណ្ណ បានឲ្យដឹងផងដែរថា ការឃាត់ខ្លួននេះ ដោយសារព្រួយបារម្ភពីសុវត្ថិភាព ខ្លាចក្រែងមានជនខិលខូច បន្លំខ្លួនធ្វើជាប៉ូលីស ហើយប្រព្រឹត្តបទល្មើសផ្សេងៗនៅក្នុងកម្មវិធីបុណ្យ។
អ្នកដែលបានពាក់អាវ នោះបានលើកឡើងថា ពួកគាត់ពាក់អាវនេះមិនមានបំណងអ្វីនោះទេ គ្រាន់តែអាវនេះជាប្រភេទអាវរងា ហើយមេឃត្រជាក់ទើបពួកគាត់ទិញវាយកមកពាក់។
ក្រោយពីកងកម្លាំងសន្តិសុខបានឃាត់ខ្លួនប្រជាពលរដ្ឋទាំងនោះមួយរយៈ ក៏បានដោះលែងវិញ តែបានដកហូតអាវមិនឲ្យពាក់ទៅចូលរួមកម្មវិធីបុណ្យអុំទូកទៀតនោះទេ៕
Tag:
អុំទូក
សុវត្ថិភាព
ប៉ូលីស
សន្តិសុខ
© រក្សាសិទ្ធិដោយ thmeythmey.com