អន្តរជាតិ
ចិនត្រៀមទទួលលោក ត្រាំ លើសពីទស្សនកិច្ចផ្លូវរដ្ឋធម្មតា
× ចេញពីជប៉ុន និងកូរ៉េខាងត្បូង ប្រធានាធិបតីអាមេរិក ដូណាល់ ត្រាំ នឹងបន្តដំណើរទៅកាន់ប្រទេសអាស៊ីមួយទៀត គឺចិន។ នៅពេលនេះ ចិនកំពុងញាប់ដៃញាប់ជើងក្នុងការរៀបចំកម្មវិធីដំណើររបស់លោក ត្រាំ ដែលជាមេដឹកនាំបរទេសទីមួយទៅទស្សនកិច្ចនៅចិនចាប់តាំងពីការបញ្ចប់មហាសន្និបាតបក្សកុម្មុយនីស្តលើកទី១៩ រួចមក។ មន្ត្រីចិនប្រកាសថា លោក ត្រាំ នឹងត្រូវបានទទួលលើសពីទស្សនកិច្ចផ្លូវរដ្ឋធម្មតាទៅទៀត។
ប្រធានាធិបតីអាមេរិក ដូណាល់ ត្រាំ គ្រោងទៅដល់ចិននៅថ្ងៃទី៨ ខែវិច្ឆិកា ក្នុងដំណើរទស្សនកិច្ចបីថ្ងៃដែលជាផ្នែកមួយនៃទស្សនកិច្ចរយៈពេលវែងនៅតំបន់អាស៊ី។ លោក ត្រាំ ជាប្រមុខរដ្ឋបរទេសដំបូងគេ ដែលធ្វើទស្សនកិច្ចនៅចិន ក្រោយមហាសន្និបាតបក្សកុម្មុយនីស្តកាលពីខែតុលា។ បញ្ហានុយក្លេអ៊ែរកូរ៉េខាងជើង ទំនាក់ទំនងនិងកិច្ចសហប្រតិបត្តិការទ្វេភាគី គឺជារបៀបវារៈសំខាន់នៃទស្សនកិច្ចដ៏សំខាន់លើកនេះ។
អ្វីគួរឲ្យចាប់អារម្មណ៍នោះ រដ្ឋាភិបាលចិនកំពុងរៀបចំកម្មវិធីទស្សនកិច្ចរបស់លោក ត្រាំ ឲ្យសក្តិសមបំផុត និងលើសពីទស្សនកិច្ចផ្លូវរដ្ឋធម្មតា ដើម្បីឆ្លើយតបនឹងបដិសណ្ឋារកិច្ចដែលប្រធានាធិបតីអាមេរិកទទួលប្រធានាធិបតីចិន ស៊ី ជិនភីង នៅ Mar-a-Lago រដ្ឋ Florida កាលពីខែមេសា។ បើតាមទីភ្នាក់ងារព័ត៌មានរដ្ឋចិន Xinhua អគ្គរដ្ឋទូតចិនប្រចាំអាមេរិកលោក Cui Tiankai និយាយថា ចិនចង់បានទស្សនកិច្ចលោក ត្រាំ លើសពីទស្សនកិច្ចសព្វមួយដង។
បន្ថែមពីលើកម្រាលផ្លូវពណ៌ក្រហម និងការត្រួតពលយោធានោះ ក្រុងប៉េកាំងក៏រៀបចំជំនួបទល់មុខមិនផ្លូវការនិងសម្ងាត់រវាងលោក ត្រាំ និងលោក ស៊ី ដើម្បីផ្ដល់ឱកាសមេដឹកនាំទាំងពីរជជែកគ្នាលើប្រធានបទរសើបៗ ដោយស្មោះត្រង់ និងដោយផ្ទាល់។ នេះបើតាមការបញ្ជាក់របស់អ្នកនាំពាក្យក្រសួងការបរទេសចិន Hua Chunying នៅថ្ងៃទី៧ ខែវិច្ឆិកា ដែលបន្តថា ចិនចាត់ទុកទស្សនកិច្ចលោក ត្រាំ ជារឿងសំខាន់បំផុត។
សូមបញ្ជាក់ថា ទំនាក់ទំនងរវាងចិន និងអាមេរិក មានលក្ខណៈល្អប្រសើរខ្លាំងក្រោយលោក ត្រាំ ចូលកាន់តំណែងនៅដើមឆ្នាំនេះ ប៉ុន្តែទំនាក់ទំនងនេះនៅជួបបញ្ហាខ្លះដូចជាសំណុំរឿងនុយក្លេអ៊ែរនៅឧបទ្វីបកូរ៉េជាដើម។ រដ្ឋបាលប្រធានាធិបតីអាមេរិកតែងទទូចឲ្យចិនដាក់បន្ទុកឲ្យបានខ្លាំងលើកូរ៉េខាងជើងដើម្បីបង្ខំឲ្យរដ្ឋកុម្មុយនីស្តមួយនេះបោះបង់កម្មវិធីនុយក្លេអ៊ែររបស់ខ្លួន។ ប៉ុន្តែចិនហាក់មិនអើពើនឹងសំណើនេះទេ និងប្រាប់ឲ្យប្រទេសផ្សេងចេញមុខខ្លះផង។
គេរំពឹងទស្សនកិច្ចរបស់លោក ត្រាំ នៅទឹកដី នឹងបើកទំព័រថ្មីនៃទំនាក់ទំនងទ្វេភាគីក្នុងយុគសម័យថ្មី ក្រោមនយោបាយ «America First » របស់លោក ត្រាំ និងនយោបាយបើកចំហររបស់លោក ស៊ី ដែលទើបជាប់ឆ្នោតជាអគ្គលេខាធិការបក្សកុម្មុយនីស្តចិន៥ឆ្នាំទៀត។ ជាមហាអំណាចទីមួយ និងទីពីររបស់ពិភពលោក ដំណើរទៅមុខ ឬថយក្រោយនៃចំណងការទូតរវាងអាមេរិក និងចិនប្រាកដជាបង្កផលប៉ះពាល់ខ្លាំងដល់នយោបាយពិភពលោកទាំងមូល៕
Tag:
អាស៊ី
ចិន
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com