អន្តរជាតិ
ទឹកដីបារាំង New Caledonia ត្រៀមធ្វើប្រជាមតិប្រកាសឯករាជ្យឆ្នាំ២០១៨
× ទឹកដីស្ថិតក្រោមការគ្រប់គ្រងរបស់បារាំង New Caledonia ត្រៀមខ្លួនធ្វើប្រជាមតិដើម្បីប្រកាសឯករាជ្យជាផ្លូវការនៅឆ្នាំ ២០១៨ខាងមុខ។ ការប្រកាសពីគម្រោងប្រជាមតិនេះធ្វើក្រោយមានការចរចាគ្នាជោគជ័យរវាងមេដឹកនាំបារាំង និងតំណាងកោះប៉ាស៊ីហ្វិកនេះកាលពីចុងសប្តាហ៍មុន។
កោះរបស់បារាំង New Caledonia ដែលស្ថិតនៅចម្ងាយប្រហែល ៧៥០ ម៉ាល៍ពីអូស្ត្រាលីនោះនឹងរៀបចំប្រជាមតិដើម្បីកំណត់ជោគវាសនា និងស្វ័យភាពរបស់ខ្លួននៅឆ្នាំ ២០១៨ខាងមុខ។
សារព័ត៌មាន The Guardian បានផ្សាយថា ការប្រកាសពីគម្រោងធ្វើប្រជាមតិរបស់កោះប៉ាស៊ីហ្វិកកើតឡើងក្រោយកិច្ចរចារវាងមន្ត្រីរដ្ឋាភិបាលបារាំង និងតំណាងកោះនេះនៅក្រុងប៉ារីសចុងសប្តាហ៍កន្លងទៅ។ ភាគីទាំងពីរឯកភាពគ្នា ដោយអនុញ្ញាតឲ្យមានការធ្វើប្រជាមតិដោយស្របច្បាប់មួយសម្រាប់ឆ្នាំ ២០១៨។
នាយករដ្ឋមន្ត្រីបារាំងលោក Edouard Philippe បានថ្លែងថា ការចរចាគ្នាកន្លងមកបានចេញជាលទ្ធផលដោយមានការបង្កើតដំណោះស្រាយនយោបាយ។ លោកក៏បញ្ជាក់ផងដែរថា លោកនឹងទៅបំពេញទស្សនកិច្ចនៅកោះ New Caledonia នៅចុងខែវិច្ឆិកាផងដែរ។
បច្ចុប្បន្នកោះ New Caledonia មានប្រជាជនសរុប ២៧៥០០០នាក់ ដោយក្នុងចំណោមនោះមាន ៤៥ភាគរយជាជនជាតិភាគតិច Kanaks។ បើសិនប្រជាជនភាគច្រើននៃទឹកដីនេះជ្រើសរើសសិទ្ធិស្វ័យសម្រេច កោះ New Caledonia នឹងក្លាយជារដ្ឋឯករាជ្យមួយផង។
បើមានការប្រកាសឯករាជ្យមែន វានឹងក្លាយជាទឹកដីរបស់បារាំងដំបូងបំផុតដែលចាកចេញពីការគ្រប់គ្រងរបស់បារាំង រាប់ចាប់ពីពេលដែលប្រទេស ជីប៊ូទី ប្រកាសឯករាជ្យឆ្នាំ ១៩៧៧ និងកោះប៉ាស៊ីហ្វិកខាងត្បូង Vanuatu ប្រកាសឯករាជ្យឆ្នាំ ១៩៨០នោះ។
យ៉ាងណាក៏ដោយ ប្រធានាធិបតីបារាំង អេម៉ានុយអែល ម៉ាក្រុងធ្លាប់និយាយថា លោកចង់ឃើញទឹកដី New Caledonia បន្តស្ថិតនៅជាផ្នែកមួយរបស់បារាំង ហើយបារាំងជាអ្នកជួយរក្សាស្ថិរភាពនិងការអភិវឌ្ឍនៃកោះនេះផង។ ប៉ុន្តែទឹកដីនេះកន្លងមកបន្តប្រឈមបញ្ហាច្រើនជាពិសេសអត្រាអ្នកគ្មានការងារច្រើន បញ្ហាអប់រំ កំណើនបទឧក្រិដ្ឋជាដើមផងដែរ។
សូមបញ្ជាក់ថា កោះ New Caledonia ត្រូវបានដាក់ឈ្មោះបែបនេះដោយនាវិកអង់គ្លេស James Cook ឆ្នាំ ១៧៧៤ ប៉ុន្តែនៅឆ្នាំ ១៨៥៣ កោះនេះត្រូវបានព្រះចៅ ណាប៉ូលេអុងទី បី ដណ្តើមយក និងដាក់ទឹកដីនេះក្រោមអាណាព្យាបាលបារាំងតែម្តង។ ប្រទេសនេះត្រូវបានគេស្គាល់ថា ជាដែនកោះមួយក្នុងចំណោមទឹកដីដែលសម្បូរដោយរ៉ែនីកែលជាងគេលើលោក៕
Tag:
New Caledonia
បារាំង
© រក្សាសិទ្ធិដោយ thmeythmey.com