លោក មូហ្កាបេ ៖ ខ្ញុំលាលែងដោយស្ម័គ្រចិត្ត និងដើម្បីផ្ទេរអំណាចដោយរលូន

អន្តរជាតិ

លោក មូហ្កាបេ ៖ ខ្ញុំលាលែងដោយស្ម័គ្រចិត្ត និងដើម្បីផ្ទេរអំណាចដោយរលូន

22, Nov 2017 , 10:24 am

រូបភាព

លោក Robert Mugabe នៅមុនការលាលែងតំណែងប្រធានាធិបតីស៊ីមបាវ៉េ ក្រោយដឹកនាំអស់៣៧ឆ្នាំ។ រូបថត AFP

ដោយ: តន ចាន់រិទ្ធារ៉ា

នៅទីបំផុតលោក រ៉ូបឺត មូហ្កាបេ បានចុះចេញពីតំណែងប្រធានាធិបតីស៊ីមបាវ៉េហើយនៅថ្ងៃទី២១ ខែវិច្ឆិកា បន្ទាប់ពីកាន់តំណែងនេះអស់រយៈពេល៣៧ឆ្នាំមក។ ការលាលែងតំណែងនេះ ត្រូវគេមើលឃើញថា ធ្វើឡើងដោយបង្ខំ ព្រោះលោក មូហ្កាបេ បាត់បង់ការគាំទ្រអស់ទៅហើយ មិនថាក្នុងជួរបក្សកាន់អំណាចរបស់លោក ឬនៅក្នុងកងទ័ពឡើយ។ ប្រជាជនស៊ីមបាវ៉េបានាំគ្នារាំច្រៀងពេញដងវិថីក្នុងរដ្ឋធានីហារ៉ារ៉េ និងចាត់ទុកជាការចាប់ផ្ដើមសករាជថ្មីផង។

មេដឹកនាំវ័យ៩៣ឆ្នាំ រ៉ូបឺត មូហ្កាបេ បានដាក់ពាក្យលាលែងតំណែងប្រធានាធិបតីទៅកាន់ប្រធានសភា ដែលនេះជាការបញ្ចប់ការក្ដាប់អំណាចរយៈពេល៣៧ឆ្នាំ។ ការអបអរ និងក្ដីរីករាយបានផ្ទុះឡើងពេញបន្ទប់ប្រជុំសភា ខណៈដែលប្រធានសភាលោក Jacob Mudenda បានអានលិខិតលាលែងរបស់លោក មូហ្កាបេ ។ បើតាមលិខិតលាលែនេះ លោក មូហ្កាបេ និយាយថា លោកលាលែងពីតំណែងដោយស្ម័គ្រចិត្ត។

«ការសម្រេចចិត្តលាលែងនេះ គឺជាការស្ម័គ្រចិត្តរបស់ខ្លួនខ្ញុំ និងដែលកើតចេញពីការព្រួយបារម្ភរបស់ខ្ញុំលើជីវភាពរបស់ប្រជាជនស៊ីមបាវ៉េ ក៏ដូចជាបំណងរបស់ខ្ញុំក្នុងការធានាពីការផ្ទេរអំណាចដោយរលូន សន្តិភាព និងអហិង្សា ដើម្បីការពារសន្តិសុខជាតិ សន្តិភាព និងស្ថិរភាព»។ នេះជាអត្ថន័យក្នុងលិខិតលាលែងរបស់លោក មូហ្កាបេ និងផ្សាយដោយសារព័ត៌មាន Al Jazeera ។ លោក មូហ្កាបេ បន្តថា ការលាលែងរបស់លោកមានប្រសិទ្ធភាពភា្លមៗតែម្ដង។

ពលរដ្ឋស៊ីមបាវ៉េ អបអរក្រោយលោក មូហ្កាបេ ចុះចេញពីតំណែង។ រូបថត AFP

ការប្រកាសនេះធ្វើឡើង ខណៈដែលសភាក៏បានចាប់ផ្ដើមដំណើការបោះឆ្នោតទម្លាក់លោក មូហ្កាបេ ចេញពីតំណែងដែរ។ សមាជិកសភាបក្សកាន់អំណាច Zanu-PF ដែលលោក មូហ្កាបេ ជាអ្នកបង្កើតដោយផ្ទាល់ដៃ បានដាក់សំណើសុំចាប់ផ្ដើមនីតិវិធីបោះឆ្នោតទម្លាក់រូបលោក ខណៈដែលសមាជិកសភាបក្សប្រឆាំងក៏គាំទ្រខ្លាំងដែរ។ ប៉ុន្តែលោក មូហ្កាបេ បានសម្រេចចិត្តចាកចេញ មុនសភាបោះឆ្នោតទម្លាក់ទៅទៀត។

អ្វីគួរឲ្យចាប់អារម្មណ៍ ទោះជាលោក មូហ្កាបេ អះអាងថា លោកលាលែងដោយស្ម័គ្រចិត្តក្ដី នេះគ្រាន់តែជាការនិយាយយកលេសប៉ុណ្ណោះ ដ្បិតលោក ត្រូវបានមេយោធាឃុំខ្លួនក្នុងផ្ទះជាច្រើនថ្ងៃ ហើយរងសម្ពាធឲ្យចុះចេញនោះ។ ក្នុងពេលនេះ លោក មូហ្កាបេ បានចរចាជាមួយក្រុមយោធាលើការផ្ទេរអំណាច ដោយយោធាសន្យាសិទ្ធិសេរីភាពរបស់លោក និងគ្រួសារ រក្សាទ្រព្យសម្បត្តិ និងមិនមានការកាត់ទោសណាមួយឡើយ។

ក្រោយការលាលែងរបស់លោក មូហ្កាបេ បក្សកាន់អំណាច Zanu-PF បានប្រកាសថា អតីតអនុប្រធានាធិបតី Emmerson Mnangagwa ដែលត្រូវលោក មូហ្កាបេ បណ្ដេញចេញពីតំណែង នឹងក្លាយជាអ្នកស្នងតំណែងជំនួស។ លោក Mnangagwa កំពុងស្ថិតនៅបរទេស ហើយជាមេដឹកនាំដែលទទួលបានគាំទ្រពីក្រុមយោធាផងដែរ។ ការបញ្ចប់តំណែងលោក Mnangagwa នេះហើយ ដែលនាំឲ្យមានការអន្តរាគមន៍យោធា និងឈានដល់ការចុះចេញរបស់លោក មូហ្កាបេ ៕