សម្ដេចប៉ាប ហ្វ្រង់ស៊ីស ចាប់ផ្ដើមទស្សនកិច្ចនៅមីយ៉ាន់ម៉ានិងបង់ក្លាដែស

អន្តរជាតិ

សម្ដេចប៉ាប ហ្វ្រង់ស៊ីស ចាប់ផ្ដើមទស្សនកិច្ចនៅមីយ៉ាន់ម៉ានិងបង់ក្លាដែស

27, Nov 2017 , 10:48 am

រូបភាព

ដោយ: តន ចាន់រិទ្ធារ៉ា

ប្រមុខបុរីវ៉ាទីកង់ សម្ដេចប៉ាប ហ្វ្រង់ស៊ីស កំពុងស្ថិតក្នុងដំណើរឆ្ពោះទៅកាន់មីយ៉ាន់ម៉ា និងបង់ក្លាដែស ជាទីដែលជនមូស្លីមរ៉ូហ៊ីងយ៉ារាប់សែននាក់កំពុងរងទុក្ខបុកម្នេញ។ ជនភាគតិចរ៉ូហ៊ីងយ៉ាបានបន្តភៀសខ្លួនចូលទឹកដីបង់ក្លាដែសដើម្បីគេចពីប្រតិបត្តិការហិង្សារបស់យោធានៅឯរដ្ឋ Rakhine ភាគខាងជើងមីយ៉ាន់ម៉ា ស្របពេលដែលដំណោះស្រាយរកមិនទាន់ឃើញនៅឡើយ។ គេរំពឹងថា ទស្សនកិច្ចរបស់សម្ដេចប៉ាបពេលនេះ នឹងជួយសម្រួលស្ថានភាពនៃវិបត្តិមនុស្សធម៌នេះបាន។

សម្ដេចប៉ាប ហ្វ្រង់ស៊ីស បានចាកចេញពីទីក្រុងរ៉ូមនៅថ្ងៃទី២៦ ខែវិច្ឆិកា ដើម្បីទស្សនកិច្ច៦ថ្ងៃប្រទេសអាស៊ីចំនួនពីរ គឺមីយ៉ាន់ម៉ា និងបង់ក្លាដែស។ ប្រមុខសាសនាគ្រិស្តកាតូលិកអង្គនេះ គ្រោងទៅដល់ទីក្រុងយ៉ាំងហ្គោននៅថ្ងៃទី២៧ ខែវិច្ឆិកា ដើម្បីជួបជាមួយថ្នាក់ដឹកនាំមីយ៉ាន់ម៉ា និងគ្រិស្តសាសនិករាប់ម៉ឺននាក់ទៀត។ ចេញពីមីយ៉ាន់ម៉ា ទើបព្រះអង្គបន្តដំណើរទៅកាន់បង់ក្លាដែស ដែលប្រជាជនភាគច្រើនគោរពសាសនាឥស្លាម។

ទស្សនកិច្ចរបស់សម្ដេចប៉ាប ហ្វ្រង់ស៊ីស នៅប្រទេសទាំងពីរនេះ ធ្វើឡើងចំពេលដែលវិបត្តិរ៉ូហ៊ីងយ៉ារកច្រកចេញមិនទាន់ឃើញ ហើយជនភាគតិចមូស្លីមមួយក្រុមនេះនៅតែបន្តរងគ្រោះដដែល។ វត្តមានរបស់មេដឹកនាំគ្រិស្តសាសនាដ៏ធំនេះ នឹងជួយលើកទឹកចិត្តដល់ការប្រឹងប្រែងបញ្ចប់បញ្ហាមនុស្សធម៌ ដែលបង្ខំឲ្យជនមូស្លីមរ៉ូហ៊ីងយ៉ារត់ចាកចោលផ្ទះសម្បែងរបស់ខ្លួន និងត្រូវរស់នៅក្នុងជំរំតោកយ៉ាកតាមព្រំដែនរវាងមីយ៉ាន់ម៉ា និងបង់ក្លាដែស។

នៅមីយ៉ាន់ម៉ា សម្ដេចប៉ាប ហ្វ្រង់ស៊ីស នឹងជួបជាមួយទីប្រឹក្សារដ្ឋលោកស្រី អ៊ុងសាន ស៊ូជី និងអគ្គមេបញ្ជាការកងទ័ព មីន អ៊ុងឡាំង ផង។ រដ្ឋាភិបាលរបស់លោកស្រី ស៊ូជី រងការរិះគន់ខ្លាំងដោយសារមិនអាចទប់ស្កាត់ប្រតិបត្តិការរបស់យោធាបាន ដ្បិតលោកស្រីគ្មានអំណាចបញ្ជាកងទ័ព។ ឯកងទ័ពវិញក៏មិនសូវស្ដាប់មេដឹកនាំស៊ីវិលដែរ ហើយចេះតែបង្កសកម្មភាពរបស់ខ្លួន ធ្វើឲ្យជនរ៉ូហ៊ីងយ៉ាជាង៦សែននាក់ត្រូវភៀសខ្លួននោះ។

បើតាមទីភ្នាក់ងារព័ត៌មាន AFP មន្ត្រីជំនិតរបស់សម្ដេចប៉ាបនិយាយថា ព្រះអង្គនឹងជំរុញឲ្យមានការផ្សះផ្សា និងការចរចារវាងភាគីទាំងសងខាងដើម្បីដោះស្រាយបញ្ហានេះ។ ប៉ុន្តែនៅមុនទស្សនកិច្ចនេះ ព្រះអង្គត្រូវបានមេដឹកនាំគ្រិស្តសាសនានៅមីយ៉ាន់ម៉ាផ្ដល់យោបល់ខ្លះៗ ជាពិសេសមិនត្រូវប្រើប្រាស់ពាក្យ «រ៉ូហ៊ីងយ៉ា» ឡើយ ព្រោះអាចនាំឲ្យមានការមិនសប្បាយចិត្តពីប្រជាជនទូទៅ ដែលជាអ្នកគោរពពុទ្ធសាសនា។

ដំណើរទៅកាន់ប្រទេសកាន់ពុទ្ធសាសនា និងឥស្លាមដ៏ធំទាំងពីរនេះ គឺជាទស្សនកិច្ចក្រៅប្រទេសលើកទី២១ របស់សម្ដេចប៉ាប។ បើរាប់ទាំងលើកនេះទៀត សម្ដេចប៉ាបអង្គនេះបានទៅដល់ប្រទេសចំនួន៣១ហើយ។ តាំងពីក្លាយជាមេដឹកនាំសាសនាដែលមានអ្នកគោរពច្រើនជាងគេក្នុងឆ្នាំ២០១៤ សម្ដេចប៉ាប ហ្វ្រង់ស៊ីស បានដាក់គោលដៅអាទិភាពមួយ គឺការទៅជួបអ្នកដើរតាមគ្រិស្តសាសនានៅតាមតំបន់ងាយរងគ្រោះ៕