ស្ថានទូតចិនបើកស្ថានកុងស៊ុលរបស់ខ្លួននៅខេត្តសៀមរាប

ជាតិ

ស្ថានទូតចិនបើកស្ថានកុងស៊ុលរបស់ខ្លួននៅខេត្តសៀមរាប

27, Nov 2017 , 4:42 pm

រូបភាព

រូបពីហ្វេសប៊ុក អភិបាលខេត្តសៀមរាប

ដោយ: អុីសា រ៉ហានី (Isa Rohany)

សៀមរាប៖ ស្ថានទូតនៃសាធារណរដ្ឋប្រជាមានិតចិនប្រចាំកម្ពុជា បានបើកសម្ពោធការិយាល័យស្ថានកុងស៊ុល នៅខេត្តសៀមរាបជាផ្លូវការ នៅល្ងាចថ្ងៃទី២៦ ខែវិច្ឆិកា ឆ្នាំ២០១៧។ ស្ថានកុងស៊ុលនេះ បានលេចចេញជារូបរាង ក្រោយជំនួបកំពូលរវាង សម្តេច ហ៊ុន សែន និងប្រធានាធិបតី លោក ស៊ី ជីងពីន កាលពី២០១៦កន្លងទៅ។

ក្នុងពិធីសម្ពោធនោះ គេឃើញមានវត្តមានលោក លោក លី ធុជ ទទួលបន្ទុកបេសកកម្មពិសេស តំណាងរាជរដ្ឋាភិបាល លោក XIONG BO ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន និង អភិបាលខេត្តសៀមរាប។ល។

ថ្លែងក្នុងពិធីនោះ លោក លី ធុជ បានលើកឡើងថា ស្ថានកុងស៊ុលនេះ គឺជាសក្ខីភាពបញ្ជាក់ពីទំព័រប្រវត្តិសាស្ត្រថ្មីមួយបន្ថែមទៀត ក្នុងដំណើរទំនាក់ទំនងជាមិត្តភាពដ៏រឹងមាំរវាងប្រទេសចិន និងកម្ពុជា។ ស្ថានកុងស៊ុលនេះ ក៏ដើម្បីពង្រឹងទំនាក់ទំនង ពិសេសអភិវឌ្ឍន៍លើវិស័យទេសចរណ៍ រវាងប្រទេសទាំងពីរផងដែរ។

ក្នុងសន្ទរកថារបស់លោក លី ធុជ ដែលធ្វើនៅសណ្ឋាគារសុខាសៀមរាប ស្ថានកុងស៊ុលប្រចាំនៅខេត្តសៀមរាប មានតួនាទីជាប្រវត្តិសាស្ត្រ ជាមជ្ឈមណ្ឌលនៃកិច្ចសហប្រតិបត្តិការវិស័យនយោបាយ ការទូត សេដ្ឋកិច្ច សង្គមកិច្ច និងជាពិសេស ផ្សព្វផ្សាយរវាងប្រទេសទាំងពីរ។

គួររម្លឹកថា យោងតាមរបាយការណ៍ក្រសួងទេសចរណ៍ក្នុងឆ្នាំ២០១៦ មានទេសចរជនជាតិចិន ចំនួន ជាង៨សែននាក់ ដែលមកកម្សាន្តនៅកម្ពុជា។ ក្នុងនោះ តាមការរំពឹងទុក នៅឆ្នាំ២០២០ ចំនួនទេសចរជនជាតិចិន អាចនឹងកើនដល់ជាង ២លាននាក់៕