អន្តរជាតិ
កូរ៉េខាងជើងរំឭករដ្ឋអាហ្វ្រិករឿងជំនួយពីអតីតកាល មេដឹកនាំលំដាប់ទីពីររបស់កូរ៉េខាងជើង គីម យ៉ុងណាម ពេលទស្សនកិច្ចនៅហ្គីណេអេក្វាទ័រ (រូបភាព៖ The Wall Street Journal)
× ស្របពេលដែលអាមេរិកកំពុងប្រមែរប្រមូលរដ្ឋអាហ្វ្រិកឲ្យដាក់ទណ្ឌកម្ម ឬផ្ដាច់ទំនាក់ទំនងជាមួយកូរ៉េខាងជើង សារព័ត៌មានកូរ៉េខាងជើងក៏បានចេញផ្សាយអត្ថបទមួយជុំវិញការផ្ដល់ជំនួយសន្ធឹកសន្ធាប់ពីកូរ៉េខាងជើងទៅឲ្យរដ្ឋអាហ្វ្រិកមួយចំនួនពីអតីតកាល។ កូរ៉េខាងជើង ដែលកាន់តែឯកោលើឆាកអន្តរជាតិ នៅមានសេសសល់មិត្តភក្តិខ្លះនៅទ្វីបអាហ្វ្រិកដែលធ្វើកិច្ចសហប្រតិបត្តិការលើវិស័យសេដ្ឋកិច្ច និងយោធា។
ទន្ទឹមនឹងការដាក់ទណ្ឌកម្មឯកតោភាគីផង និងទណ្ឌកម្មតាមក្រុមប្រឹក្សាសន្តិសុខផង អាមេរិកក៏កំពុងប្រកូកប្រកាសឲ្យប្រទេសផ្សេងៗ រួមទាំងសម្ព័ន្ធមិត្តរបស់កូរ៉េខាងជើង រួមដៃគ្នាដាក់គំនាបលើរដ្ឋកុម្មុយនីស្តមួយនេះឲ្យបោះបង់មហិច្ឆតាអភិវឌ្ឍនុយក្លេអ៊ែរ។ អាមេរិកក៏បានទទូចឲ្យបណ្ដារដ្ឋអាហ្វ្រិក ដែលមានទំនាក់ទំនងការទូតជាមួយកូរ៉េជើង ត្រូវបញ្ឈប់ ឬទម្លាក់រាល់ទំនាក់ទំនងទាំងអស់ជាមួយកូរ៉េខាងជើងដែរ។
ជាមួយនឹងការអំពាវនាវរបស់អាមេរិក កូរ៉េខាងជើងក៏បានផ្ញើសារមួយរំឭកមិត្តភក្តិអាហ្វ្រិកពីការផ្ដល់ជំនួយរបស់ខ្លួននាពេលកន្លងមក។ សារព័ត៌មានកូរ៉េខាងជើង Rodong Sinmun នៅថ្ងៃទី២៧ ខែវិច្ឆិកា បានលើកឡើងពីការជួយរបស់កូរ៉េខាងជើងទៅដល់រដ្ឋអាហ្វ្រិកក្នុងសម័យកាលដឹកនាំរបស់លោក គីម អ៊ីលស៊ុង ដែលបានផ្ដល់ជំនួយទាំងសម្ភារ និងកម្លាំងចិត្តដើម្បីឲ្យប្រទេសទាំងនោះមានលទ្ធភាពសាងសង់ប្រទេសបាន។
ប្រព័ន្ធផ្សព្វផ្សាយកូរ៉េខាងជើង បានសរសេរចំឈ្មោះរដ្ឋអាហ្វ្រិកចំនួនពីរ គឺតូហ្គោ និងតង់សានី ដែលធ្លាប់ទទួលជំនួយច្រើនពីរបបក្រុងព្យុងយ៉ាង។ សាវតារនៃចំណងការទូតរវាងកូរ៉េខាងជើង និងរដ្ឋអាហ្វ្រិកមួយចំនួន ចាប់ផ្ដើមកាលពីចុងសតវត្សរ៍ទី២០ គ្រាដែលអតីតមេដឹកនាំកំពូលកូរ៉េខាងជើង គីម អ៊ីលស៊ុង ចូលរួមក្នុងចលនាមិនចូលបក្សសម្ព័ន្ធ។ ដោយសាររឿងនេះ ទើបក្រុងព្យុងយ៉ាងផ្ដល់ជំនួយគគ្រឹកគគ្រេងទៅឲ្យប្រទេសអាហ្វ្រិកទាំងនោះដូចជារោងចក្រ កសិដ្ឋាន និងហេដ្ឋារចនាសម្ព័ន្ធនានា។
«នៅពេលនោះ កូរ៉េខាងជើងមិនមែនជាប្រទេសអ្នកមាន ឬសម្បូរសប្បាយជាងប្រទេសណាឡើយ ពេលផ្ដល់ជំនួយនោះ។ ប្រជាជនយើងបានផ្ដល់ស្បៀងអាហារ និងសម្ភារផ្សេងៗទៅកាន់ប្រទេសក្រីក្រនៅអាហ្វ្រិក»។ នេះជាសំណេររំឭកគុណរបស់សារព័ត៌មាន Rodong Sinmun ដែលផ្សាយដោយទីភ្នាក់ងារព័ត៌មានកូរ៉េខាងត្បូង Yonhap ។
បើគ្រាន់តែជាអត្ថបទលើសារព័ត៌មានមែន តែវាក៏បានឆ្លុះបញ្ចាំងពីនយោបាយរបស់កូរ៉េខាងជើង ចំពោះមុខការដាក់គំនាបរបស់អាមេរិក។ តាមរយៈសារព័ត៌មានរបស់ខ្លួន កូរ៉េខាងជើងទំនងចង់ផ្ញើសារឲ្យប្រទេសអាហ្វ្រិកដែលធ្លាប់ទទួលជំនួយរបស់ខ្លួន ត្រូវចេះថ្លឹងថ្លែងគុណស្រ័យក្នុងការសម្រេចចិត្តរបស់ខ្លួន ហើយក៏មិនត្រូវភ្លេចការគាំទ្ររបស់កូរ៉េខាងជើងដែរ៕
Tag:
កូរ៉េខាងជើង
អាហ្វ្រិក
អាមេរិក
© រក្សាសិទ្ធិដោយ thmeythmey.com