អន្តរជាតិ
ឥណ្ឌូណេស៊ី-ម៉ាឡេស៊ី រួមគ្នាតទល់គោលនយោបាយរើសអើងរបស់សហភាពអឺរ៉ុបលើទំនិញ«ដូងប្រេង»
× រដ្ឋាភិបាលក្រុងហ្សាការតា និងរដ្ឋាភិបាលក្រុងកូឡាឡាំពួរ ថ្មីៗនេះ បានជួបពិភាក្សាទ្វេភាគីដើម្បីរិះរកមធ្យោបាយក្នុងការតទល់ជាមួយនឹងគោលនយោបាយរឹតត្បិតថ្មីរបស់សហភាពអឺរ៉ុបលើការបញ្ជាទិញទំនិញដូងប្រេង ដែលបានធ្វើឲ្យប៉ះពាល់យ៉ាងខ្លាំងលើការនាំចេញរបស់ប្រទេសទាំងពីរ ។
លោកនាយករដ្ឋមន្ត្រី ណាជីប រ៉ាហ្សាក់ និងលោកប្រធានាធិបតី ចូកូ វីដូដូ បានអះអាងរួមគ្នានាសន្និសីទសារព័ត៌មានក្រោយបញ្ចប់កិច្ចប្រជុំប្រឹក្សាយោបល់លើកទី១២ ម៉ាឡេស៊ី-ឥណ្ឌូណេស៊ីនាចុងសប្តាហ៍មុនថា សេចក្តីសម្រេចរបស់សហភាពអឺរ៉ុបពាក់ព័ន្ធនឹង ដូងប្រេង ជាប្រភេទគោលនយោបាយមួយមានការរើសអើង និងចង្អៀតចង្អល់ ។ នេះបើយោងតាមសារព័ត៌មាន The Jakarta Post ។
ប្រមុខដឹកនាំទាំងពីរ ក៏បានចាត់ទុកថា គោលនយោបាយថ្មីថមិនមានយុត្តិធម៌ចំពោះកសិករម៉ាឡេស៊ី និងឥណ្ឌូណេស៊ី ហើយក៏មិនគួរអនុវត្តបន្តទៀតដែរ ។ ជាក់ស្តែងនោះ លោកនាយករដ្ឋមន្ត្រី ណាជីប តាមរយៈវេទិកាដដែលនោះ បានលើកបញ្ជាក់បន្ថែមថា គោលនយោបាយរបស់សហអឺរ៉ុប នឹងផ្តល់ផលអវិជ្ជមានលើរោងចងក្រដូងប្រេង និងចំណូល អ្នកពឹងផ្អែកលើវិស័យនេះរាប់ម៉ឺននាក់នៅម៉ាឡេស៊ី និងរាប់លាននាក់នៅឥណ្ឌូណេស៊ីផងដែរ ។
យ៉ាងណាក៏ដោយ ទន្ទឹមនឹងអះអាងពីការជះឥទ្ធិពលអវិជ្ជមាន មេដឹកនាំទាំងពីរ ក៏បានសន្យាស្វែងរកដំណោះស្រាយមួយឲ្យបាន ដ្បិត បញ្ហានេះ ក៏ត្រូវបានដាក់ទៅឲ្យប្រធានក្រុមប្រឹក្សាអឺរ៉ុប លោក Donald Tusk បានដឹងផងដែរនោះ ។
គួររម្លឹកផងដែរថា នៅខែមេសាកន្លងទៅ សហភាពអឺរ៉ុប បានអនុម័តលើសេចក្តីសម្រេចមួយស្តីពី ដូងប្រេង និងការកាប់បំផ្លាញព្រៃឈើ ។ តាមរយៈគោលនយោបាយនោះ សហភាពអឺរ៉ុប បានកំណត់លក្ខខណ្ឌតឹងរឹងបន្ថែមពាក់ព័ន្ធការបញ្ជាក់សម្រាប់ការនាំចូលផលិតផលដូងប្រេង។ ក្នុងនោះ រាប់បញ្ជូនទាំងគោលនយោបាយនៃការធ្វើអាជីវកម្មប្រកបដោយនិរន្តភាព និងមិនប៉ះពាល់បរិស្ថាន ខណៈពេលដែល ឥណ្ឌូណេស៊ី និងម៉ាឡេស៊ី បានទទួលរងការព្រមានពាក់ព័ន្ធនឹងការបរាជ័យក្នុងការទប់ស្កាត់ការកាប់ព្រៃឈើនោះ ៕
Tag:
ឥណ្ឌូណេស៊ី
ម៉ាឡេស៊ី
© រក្សាសិទ្ធិដោយ thmeythmey.com