អន្តរជាតិ
សភាស៊ីមបាវ៉េបណ្តេញសមាជិកខ្លួនប្រាំរូបដែលស្និទ្ធលោក មូហ្កាបេ
× សមាជិកសភាចំនួន ប្រាំរូបដែលត្រូវបានគេស្គាល់ថាជាមនុស្សជំនិតរបស់លោក រ៉ូបឺត មូហ្កាបេ ត្រូវបានសភាបញ្ចប់តំណែងជាផ្លូវការនៅថ្ងៃពុធទី ២៩ ខែវិច្ឆិកានេះ។ ការបណ្តេញមនុស្សស្និទ្ធអតីតប្រធានាធិបតីនេះធ្វើឡើងក្រោយបក្សកាន់អំណាចផ្តល់ដំណឹងថា ពួកគេលែងតំណាងឲ្យប្រយោជន៍គណបក្សទៀតហើយ។
បន្ទាប់ពីលោក រ៉ូបឺត មូហ្កាបេ ចុះចេញពីតំណែងជាផ្លូវការ គណបក្សកាន់អំណាច ZANU PFបានសម្រេចស្នើទៅសភាឲ្យបញ្ចប់តំណែងសមាជិកសភាប្រាំរូបដែលជាសម្ព័ន្ធមិត្តរបស់លោក មូហ្កាបេ ដែរ។ ការបណ្តេញមនុស្សលោក មូហ្កាបេ ពីតំណែងជាការបោសសម្អាត និងរៀបចំពង្រឹងរចនាសម្ព័ន្ធដឹកនាំផ្ទៃក្នុងរបស់បក្សកាន់អំណាចផងដែរ។
យោងតាមទីភ្នាក់ងារព័ត៌មានចិន Xinhua អនុប្រធានសភាលោកស្រី Mabel Chinomona បានប្រកាសពីអាសនៈសភាដែលនៅទំនេរក្រោយពេលបណ្តេញសមាជិកទាំងប្រាំរូបហើយនោះ ហើយលោកស្រីក៏បញ្ជាក់ផងដែរពីនីតិវិធីដែលត្រូវធ្វើបន្តបន្ទាប់ទៀតក្រោយអនុវត្តចំណាត់ការនេះ។
«វិធានការរដ្ឋបាលនឹងត្រូវដាក់ចេញដើម្បីផ្តល់ដំណឹងដល់ប្រធានាធិបតី Emmerson Mnangagwa និងគណៈកម្មការរៀបចំការបោះឆ្នោតពីអាសនៈដែលនៅសល់នេះអនុលោមតាមច្បាប់បោះឆ្នោត»។ នេះជាការបញ្ជាក់របស់អនុប្រធានសភាខាងលើ។
តាមពិតទៅ ការបណ្តេញសមាជិកសភាប្រាំរូបធ្វើឡើងបន្ទាប់ពីបក្សកាន់អំណាចរាយការណ៍ទៅសភាថា សមាជិកសភាទាំងនោះលែងតំណាងឲ្យផលប្រយោជន៍បក្សទៀតហើយ។ ម្យ៉ាងទៀតវាក៏កើតឡើងក្រោយពេលគណបក្សកាន់អំណេចសម្រេចបណ្តេញរដ្ឋមន្ត្រីអភិវឌ្ឍជនបទ, រដ្ឋមន្ត្រីអប់រំជាន់ខ្ពស់ លេខាធិការរដ្ឋបាលនៃបក្សកាន់អំណាច លេខាធិការបក្សទទួលបន្ទុកកិច្ចការយុវជន និងរដ្ឋមន្ត្រីទទួលបន្ទុកកិច្ចការងារខេត្តផងដែរ។
លោក Emmerson Mnangagwa បានស្បថចូលកាន់តំណែងជាប្រធានាធិបតីស៊ីមបាវ៉េថ្មីកាលពីថ្ងៃសុក្រសប្តាហ៍មុន ក្រោយពេលដែលមេដឹកនាំវ័យជរាលោក រ៉ូបឺត មូហ្កាបេ បង្ខំចិត្តចុះចេញពីតំណែងដោយសាររងសម្ពាធ។ គេរំពឹងថា មេដឹកនាំថ្មីនឹងអាចរួមចំណែកដោះស្រាយបញ្ហាប្រឈមរាប់រយជំពូកដែលស៊ីមបាវ៉េកំពុងប្រឈមជាពិសេសដោះស្រាយវិបត្តិសេដ្ឋកិច្ចតែម្តង៕
Tag:
ស៊ីមបាវ៉េ
រ៉ូបឺត មូហ្កាបេ
Mabel Chinomona
Emmerson Mnangagwa
© រក្សាសិទ្ធិដោយ thmeythmey.com