អន្តរជាតិ
សកម្មជនសិង្ហបុរីរងការចោទប្រកាន់ដោយរៀបចំបាតុកម្មដោយគ្មានការអនុញ្ញាត រូបភាព៖ សារព័ត៌មាន TODAY Online
× សកម្មជនសិង្ហបុរីម្នាក់ត្រូវបានតុលាការចោទប្រកាន់នៅថ្ងៃពុធទី ២៩ ខែវិច្ឆិកានេះដោយសារគេរៀបចំបាតុកម្មនៅទីសាធារណៈដោយគ្មានការអនុញ្ញាត។ មានការទាមទារឲ្យអាជ្ញាធរសិង្ហបុរីបញ្ឈប់ការរឹតត្បិតសិទ្ធធ្វើបាតុកម្មអហិង្សា និងឈប់បន្តចាត់ទុកការបាតុកម្មជាបទឧក្រិដ្ឋផងដែរ។
តុលាការសិង្ហបុរីបានសម្រេចចោទប្រកាន់បុគ្គលម្នាក់ដែលគេស្គាល់ថា ជាសកម្មជនពីបទរៀបចំបាតុកម្មតូចចំនួនបីលើកដោយគ្មានការអនុញ្ញាតចាប់ពីខែវិច្ឆិកាឆ្នាំមុនដល់ខែកក្កដាកន្លងមកនេះ។
យោងតាមទីភ្នាក់ងារព័ត៌មាន AFP សកម្មជនដែលត្រូវតុលាការចោទប្រកាន់នេះមានឈ្មោះថា Jolovan Wham មានអាយុ ៣៧ឆ្នាំដែលជាអ្នកសកម្មជនដែលការពារសិទ្ធិពលករបរទេស។ គេជាប់ពាក់ព័ន្ធនឹងការធ្វើបាតុកម្មមួយកាលពីខែមិថុនាដែលរៀបចំឡើងដោយសកម្មជនជាច្រើននាក់ដែលទាមទារកយុត្តិធម៌ចំពោះមនុស្ស ២២នាក់ដែលត្រូវបានឃើញចាប់ខ្លួននិងឃុំខ្លួនក្នុងឆ្នាំ ១៩៨៧ ដោយសារបំពានច្បាប់សន្តិសុខផ្ទៃក្នុងដ៏តឹងរ៉ឹងនោះ។
តាមបទល្មើសដែលគេរងការចោទប្រកាន់នេះ Jalovan អាចនឹងត្រូវផាកពិន័នរហូតដល់មួយម៉ឺនដុល្លារ ឬអាចជាប់ពន្ធនាគាររហូតដល់ ប្រាំមួយខែ ឬអាចប្រឈមពិន័យទាំងពីរក្នុងករណីដែលគេរកឃើញថា ជននេះប្រព្រឹត្តខុសម្តងហើយម្តងទៀតនោះ។
តាមពិតទៅ នៅសិង្ហបុរី វាជារឿងខុសច្បាប់ដែលរៀបចំបាតុកម្មនៅទីកន្លែងសាធារណៈដោយគ្មានការអនុញ្ញាតពីប៉ូលិសនោះ ហើយវាជារឿងកម្របំផុតដែលប៉ូលិសផ្តល់ការអនុញ្ញាតឲ្យមានការរៀបចំបាតុកម្មអហិង្សានោះ។
យ៉ាងណាក៏ដោយ ការចោទប្រកាន់សកម្មជនសិទ្ធិមនុស្ស បង្កឲ្យមានការរិះគន់ និងស្នើសុំឲ្យអាជ្ញាធរសិង្ហបុរីទម្លាក់ការចោទប្រកាន់នេះផងដែរ។ អង្គការឃ្លាំមើលសិទ្ធិមនុស្សបានទទូឲ្យសិង្ហបុរីបញ្ចប់បណ្តឹងចោទប្រកាន់ប្រឆាំងអ្នកបាតុកម្មអហិង្សា និងរៀបចំការជួបជុំដោយអហិង្សាផងដែរនោះ៕
Tag:
សិង្ហបុរី
បាតុកម្ម
សិទ្ធិមនុស្ស
© រក្សាសិទ្ធិដោយ thmeythmey.com