អន្តរជាតិ
អ្នកនយោបាម៉ាឡេស៊ី ចង់ឲ្យរដ្ឋាភិបាលខ្លួនសម្លាប់ឈ្មួញគ្រឿងញៀនតាមលោក ឌូទើតេ រូបភាព៖ The Star Online
× អ្នកនយោបាយម៉ាឡេស៊ីមួយរូប សរសើរចំណាត់ការប្រធាធិបតីហ្វីលីពីន Rodrigo Duterte ក្នុងការបង្ក្រាបគ្រឿងញៀន ទោះវារងការរិះគន់ខ្លាំងពីអង្គការសិទ្ធិមនុស្សក្តី ។ អ្នកនយោបាយរូបនេះក៏ចង់រដ្ឋាភិបាលម៉ាឡេស៊ី អនុវត្តតាមការដឹកនាំរបស់មេដឹកនាំហ្វីលីពីនដោយបាញ់សម្លាប់ឈ្មួញគ្រឿងញៀនផងដែរ។
លោក Bung Moktar Radin សមាជិកសភារបស់ម៉ាឡេស៊ី នៅថ្ងៃ២៨ វិច្ឆិកា បានថ្លែងក្នុងការជជែកដេញដោលរបស់សភាម៉ាឡេស៊ីពាក់ព័ន្ធនឹងការបង្ក្រាបគ្រឿងញៀនយ៉ាងដូច្នេះថា ៖«ហេតុអីយើងមិនយកគំរូតាមហ្វីលីពីន? រាល់អ្នកញៀនថ្នាំទាំងអស់ ចាប់ពួកគេដាក់ពន្ធនាគារដោយពុំចាំបាច់ឆ្លងកាត់សវនការ ... រីឯអ្នកជួយដូរគ្រឿងវិញ បាញ់សម្លាប់ពួកគេតែម្តងទៅ»។ នេះបើយោងតាមការចុះផ្សាយរបស់ទូរទស្សន៍សិង្ហបុរី Channel News Asia ។
តាមប្រភពព័ត៌មានដដែលនោះ អ្នកតំណាងរាស្ត្ររូបនេះ ក៏ធ្លាប់ស្នើ និងលើកឡើងពីចំណាត់ការបែបនេះ នៅក្នុងការជជែកដេញដោលលើគោលនយោបាយរបស់ម៉ាឡេស៊ីម្តងរួចទៅហើយកាលពីឆ្នាំមុន។ អ្នកនយោបាយនេះជឿជាក់ថា វាមានតែចំណាត់ការបែបនេះ ដែលអាចបញ្ឈប់ការជួញដូរគ្រឿងញៀននៅក្នុងប្រទេសបាន ។
យ៉ាងណាក៏ដោយ សំណើរបស់លោកតំណាងរាស្ត្រ មិនទទួលបានការគាំទ្រពីសំណាក់អង្គនីតិប្រតិបត្តិនោះទេ ។ លោកអនុរដ្ឋមន្ត្រីមហាផ្ទៃម៉ាឡេស៊ី Nur Jazlan Mohamed បានអះអាងថា ការអនុវត្តគោលនយោបាយបែបនេះ នឹងដើរបញ្ច្រាសបទដ្ឋានអន្តរជាតិ និងជាពិសេសនោះ វា នឹងបំពានសិទ្ធិមនុស្សយ៉ាងធ្ងន់ធ្ងរទៀតផង ។ អនុរដ្ឋមន្ត្រី បានសង្កត់ធ្ងន់ថា៖«យើងមិនអាចធ្វើដូចហ្វីលីពីនបានឡើយ ព្រោះ វា នឹងបង្កជាបញ្ហា និងសម្ពាធច្រើនពីខាងក្រៅ រួមទាំងអង្គការសហប្រជាជាតិ»។
គួររម្លឹកផងដែរថា ក្រោយលោកប្រធានាធិបតីហ្វីលីពីន រ៉ូឌ្រីហ្គោ ឌូទើតេ ឡើងកាន់អំណាច ឈ្មោះហ្វីលីពីន បានលេចលឺខ្លាំងលើឆាកអន្តរជាតិ ។ នោះក៏ព្រោះតែសង្គ្រាមបង្ក្រាបគ្រឿងញៀនរបស់លោកបានសម្លាប់អ្នកពាក់ព័ន្ធគ្រឿងញៀនជាច្រើននាក់ ហើយវាក៏ទទួលរងនូវការថ្កោលទោសពីសហគមន៍អន្តរជាតិផងដែរ ៕
Tag:
ម៉ាឡេស៊ី
ហ្វីលីពីន
អាស៊ាន
គ្រឿងញៀន
© រក្សាសិទ្ធិដោយ thmeythmey.com