អន្តរជាតិ
មួយឆ្នាំប្រជាជនហ្វីលីពីនចំណាយពេល១៦ថ្ងៃ លើការស្ទះចរាចរណ៍ រូបភាព៖ Inquirer
× របាយការណ៍សិក្សាថ្មីមួយរៀបចំឡើងដោយក្រុមហ៊ុន Boston Consulting Group និងមានការសហការជាមួយក្រុមហ៊ុន Uber ហ្វីលីពីនបង្ហាញថា ប្រជាជនហ្វីលីពីនម្នាក់ៗនៅក្នុងរដ្ឋធានីម៉ានីល ចំណាយពេល ១៦ថ្ងៃក្នុងមួយឆ្នាំលើការស្ទះចរាចរណ៍ និងខាតបង់លុយជាង ៥ពាន់ដុល្លារ។
ការស្ទះចរាចរណ៍ជាបញ្ហាគួរឲ្យឈឺក្បាលបំផុតមួយនៅក្នុងបណ្តាទីក្រុងធំៗនៅតំបន់អាស៊ី។ ដូចឃើញស្រាប់ របាយការណ៍ស្រាវជ្រាវថ្មីមួយបានបង្ហាញថា ប្រជាជនហ្វីលីពីននៅរដ្ឋធានីម៉ានីលចំណាយពេល ១ម៉ោង ៦នាទីរាល់ថ្ងៃ ឬស្មើ ១៦ថ្ងៃក្នុងមួយឆ្នាំលើការស្ទះចរាចរណ៍។
សារព័ត៌មាន The Straits Times បានផ្សាយថា បើយោងរបាយការណ៍នេះ ក្រៅពីចំណាយពេល១៦ថ្ងៃលើការស្ទះចរាចរណ៍ ពួកគេក៏ត្រូវចំណាយពេល២៤នាទីក្នុងមួយថ្ងៃដើម្បីស្វែងរកកន្លែងចតឡានផងដែរ។
ប្រជាជនបីនាក់ក្នុងចំណោមប្រជាជនហ្វីលីពីនបួននាក់ទៅខកខាន ឬពេលខ្លះទៅយឺតយ៉ាវក្នុងការចូលរួមកម្មវិធីណាមួយដោយសារគេមិនអាចរកកន្លែងចតឡានបានលឿនតាមចិត្ត។ ពួកគេជាទូទៅខកខានទៅសម្ភាសន៍ការងារ ចូលរួមមង្គលការ និងទៅជួបគ្រូពេទ្យ។ ដូច្នេះហើយក្នុងមួយឆ្នាំ ប្រជាជនហ្វីលីពីនចំណាយពេល ១៦ថ្ងៃក្នុងមួយឆ្នាំលើបញ្ហាចរាចរណ៍ ហើយវាក៏ធ្វើឲ្យពួកគេខាតបង់ថវិកាប្រហែល ១សែនប៉ឺសូ (៥៣០០ដុល្លារ) រាល់ឆ្នាំផងដែរ។
លោក Laurence Cua នាយកគ្រប់គ្រងក្រុមហ៊ុន Uber ហ្វីលីពីនបានលើកឡើងដូច្នេះ៖« ស្ទះចរាចរណ៍តាមផ្លូវធ្វើឲ្យអាស៊ីខាតបង់ប្រយោជន៍សេដ្ឋកិច្ចចន្លោះពីពីរ ទៅប្រាំភាគរយនៃផលិតផលក្នុងស្រុកសរុបរាល់ឆ្នាំ។ នេះបើតាមរបាយការណ៍របស់ធនាគារអភិវឌ្ឍន៍អាស៊ី»។
ក្រៅពីបង្ហាញពីផលវិបាកនៃការស្ទះចរាចរណ៍ របាយការណ៍នេះក៏បានព្យាករផងដែរថា កំណើនតម្រូវការផ្នែកសេវាដឹកជញ្ជូនតាមរថភ្លើងកើនឡើងខ្លាំងនៅហ្វីលីពីននៅឆ្នាំ ២០២០ ដោយសារបញ្ហាស្ទះចរាចរណ៍។ ហើយវាក៏ចាំបាច់ត្រូវមានការកសាងផ្លូវ និងរៀបចំប្រព័ន្ធដឹកជញ្ជូនសាធារណៈបន្ថែមទៀតដើម្បីឆ្លើយតបបញ្ហានេះ។
ដូច្នេះហើយ រដ្ឋាភិបាលហ្វីលីពីនត្រូវចំណាយថវិកាយ៉ាងហោចណាស់ ២,៧ ពាន់លានដុល្លារបន្ថែមលើការសាងសង់ផ្លូវ ផ្លូវរថភ្លើងលើអាកាស និងផ្លូវរថភ្លើងក្រោមដីផងដែរនៅពេលអនាគតខាងមុខ។
សូមបញ្ជាក់ថា របាយការណ៍សិក្សានេះរៀបចំឡើងដោយក្រុមហ៊ុន Boston Consulting Group (BCG) ហើយការស្រាវជ្រាវនេះធ្វើឡើងដោយមានការស្ទង់មតិក្នុងចំណោមមនុស្ស ៩ពាន់នាក់អាយុចន្លោះពី ១៨ ដល់ ៦៥ឆ្នាំនៅក្នុងទីក្រុងធំៗជាច្រើននៅអាស៊ីដូចជាបាងកក ហ្សាការតា, គូឡាឡាំពួរ និង ហុងកុងជាដើម ៕
Tag:
Boston Consulting Group
ហ្វីលីពីន
ចរាចរណ៍
© រក្សាសិទ្ធិដោយ thmeythmey.com