អន្តរជាតិ
ដៃគូរកស៊ីលោក ត្រាំ នៅឥណ្ឌូណេស៊ី គាំទ្រលោក ចូកូ វីដូដូ ជាប្រធានាធិបតីឆ្នាំ២០១៩ ម្តងទៀត លោក Hary Tanoesoedibjo (រូបភាព៖ Reuters)
× សេដ្ឋីផ្នែកប្រព័ន្ធផ្សព្វផ្សាយ និងជាអតីតដៃគូជំនួញរបស់ប្រធានាធិបតីអាមេរិកនៅឥណ្ឌូណេស៊ី សម្រេចឈប់ឈរឈ្មោះជាប្រធានាធិបតីក្នុងការបោះឆ្នោតឆ្នាំ២០១៩ ដោយងាកមកគាំទ្រលោកប្រធានាធិបតី ចូកូ វីដូដូ (Joko Widodo) ។ អ្នកជំនួញរូបនេះ យល់ឃើញថាលោក ចូកូ ជាបុរសខ្លាំង ។
លោក Hary Tanoesoedibjo អ្នកជំនួញផ្នែកប្រព័ន្ធផ្សាយឥណ្ឌូណេស៊ី នៅថ្ងៃ២៨ វិច្ឆិកា បានថ្លែងក្នុងកិច្ចសម្ភាសន៍មួយថា លោកបានសម្រេចចិត្តមិនចូលរួមប្រកួតប្រជែងតំណែងប្រធានាធិបតី នៅក្នុងការបោះឆ្នោតឆ្នាំ២០១៩ឡើយ ។ នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី The Jakarta Post ។
លោក Hary ដែលជាអ្នកជំនួញអចលនទ្រព្យ និងជាធ្លាប់ជាដៃគូរកស៊ីធំរបស់ប្រធានាធិបតីអាមេរិក ដូណាល់ ត្រាម ផងដែរនោះ បានបញ្ជាក់ថា៖« ប្រសិនអ្នកក្រឡេកមើលស្ថានភាពសព្វថ្ងៃ លោក ចូកូ គឺជាបេក្ខជនប្រធានាធិបតីដែលខ្លាំងបំផុត ។ »
គួររម្លឹកបន្តិចដែរ នៅដើមឆ្នាំ២០១៧ កន្លងទៅ លោក Hary បានថ្លែងប្រាប់អ្នកសារព័ត៌មានយ៉ាងដូច្នេះថា៖«ប្រសិនគ្មានអ្នកណាដែលខ្ញុំអាចទុកចិត្តក្នុងការដោះស្រាយបញ្ហាក្នុងប្រទេសបានទេ ខ្ញុំអាចនឹងឈរឈ្មោះជាប្រធានាធិបតី។ យើងត្រូវការមេដឹកនាំដែលសុចរិត ដែលអាចរកដំណោះស្រាយសម្រាប់ប្រទេសនេះ»។
អ្នកជំនួញ ដែលមានទំនោរលើកិច្ចការនយោបាយរូបនេះ ធ្លាប់បរាជ័យម្តងរួចទៅហើយក្នុងការប្រជែងតំណែងអនុប្រធានាធិបតី ក្នុងឆ្នាំ២០១៤ ដែលជាឆ្នាំដែលលោក ចូកូ វីដូដូ ជាប់ឆ្នោតជាប្រធានាធិបតីក្នុងអាណត្តិទីមួយ៕
© រក្សាសិទ្ធិដោយ thmeythmey.com