ជាតិ
នយោបាយជាតិ
លោក សុខ ឥសាន ទៅឈរឈ្មោះជាសមាជិកព្រឹទ្ធសភា តែបន្តធ្វើអ្នកនាំពាក្យ CPP លោក សុខ ឥសាន អ្នកនាំពាក្យគណបក្សប្រជាជនកម្ពុជា
× ភ្នំពេញ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជា (CPP) ដែលអ្នកកាសែតទូទៅ យល់ថាមានភាពងាយស្រួលក្នុងការទាក់ទង និងការសួរព័ត៌មាន បានលាលែងពីសមាជិករដ្ឋសភាហើយ ដើម្បីទៅឈរជាបេក្ខជនសមាជិកព្រឹទ្ធសភាវិញ។ ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៤ នឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០១៨។
លោក សុខ ឥសាន បានប្រាប់សារព័ត៌មានថ្មីៗតាមទូរសព្ទនៅរសៀលថ្ងៃពុធនេះថា ការផ្លាស់ប្តូរស្ថាប័ន សម្រាប់បំពេញការងារនេះ គឺជាការរៀបចំរបស់គណបក្ស។ អតីតតំណាងរាស្ត្រគណបក្សប្រជាជនកម្ពុជា ដែលមានវ័យ៧១រូបនេះ បាននិយាយដូច្នេះថា៖«ព្រឹទ្ធសភា និងរដ្ឋសភា មានតួនាទីដូចតែគ្នាទេ។ គ្រាន់តែថា យើងចាស់ទុំហើយ ទៅនុ៎ងទៅ ឯរដ្ឋសភាទុកឲ្យក្មេងៗ បន្តវេនចុះ។ វា ជាការចាត់ចែងរបស់គណបក្ស ហើយទំនងជាគណបក្ស យល់អ៊ីចឹង»។
តួនាទី ឬឋានៈរបស់លោក សុខ ឥសាន ត្រូវបានផ្លាស់ប្តូរតែនៅក្នុងស្ថាប័នរដ្ឋប៉ុណ្ណោះ ឯនៅក្នុងជួរគណបក្ស គឺនៅរក្សាដដែល។ លោក សុខ ឥសាន បញ្ជាក់ថា លោក នៅតែជាអ្នកនាំពាក្យគណបក្សប្រជាជនកម្ពុជា ទោះធ្វើជាសមាជិកព្រឹទ្ធសភាក៏ដោយ។
បើតាមលោក សុខ ឥសាន ក្រៅពីរូបលោក មានតំណាងរាស្ត្រ៣រូបទៀត គឺលោក ហែម ខន លោក អាយ ខន និងលោក ម៉ម ជុនហ៊ុយ ក៏បានលាលែងដែរ ដើម្បីទៅឈរជាបេក្ខជនសមាជិកព្រឹទ្ធសភា។ បេក្ខជនថ្មី ដែលរួមមាន លោក សុខ ប៊ន លោក អ៊ុក ដាមរី លោក ជុំ យុហៀន និងលោក ពៅ សាមី ត្រូវបានគណបក្សប្រជាជនកម្ពុជា ដាក់ជំនួសអតីតតំណាងរាស្ត្រទាំង៤ខាងលើ។
គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជូនបញ្ជីបេក្ខជនតំណាងរាស្ត្រថ្មីទាំង៤រូបនេះ ទៅកាន់រដ្ឋសភាហើយ ដោយភ្ជាប់ជាមួយបញ្ជីបេក្ខជនតំណាងរាស្ត្រថ្មីទាំង១១រូបផ្សេងទៀត។ បេក្ខជនតំណាងរាស្ត្រថ្មីទាំង១១រូបនេះ ក៏មកពីគណបក្សប្រជាជនកម្ពុជាដែរ ដែលទទួលបានអាសនៈក្នុងរដ្ឋសភា ពីគណបក្សសង្គ្រោះជាតិ (CNRP) ដែលត្រូវបានតុលាការកំពូល រំលាយចោល។ តាមច្បាប់ អាសនៈតំណាងរាស្ត្រទាំង១១ ត្រូវបានទៅលើគណបក្សសម្ព័ន្ធដើម្បីប្រជាធិបតេយ្យ និងគណបក្សខ្មែរឈប់ក្រ ឯណោះទេ តែដោយសារគណបក្សទាំង២នេះ បោះបង់ចោល ទើបគ.ជ.ប ប្រគល់ទៅឲ្យគណបក្សប្រជាជនកម្ពុជា។
លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា ប្រាប់សារព័ត៌មានថ្មីៗថា លោក បានទទួលបញ្ជីបេក្ខជនតំណាងរាស្ត្រថ្មី ដែលគ.ជ.ប បញ្ជូនឲ្យហើយ។ ទោះមិនទាន់កំណត់កាលបរិច្ឆេទនៃកិច្ចប្រជុំគណៈកម្មាធិការអចិន្ត្រៃយ៍រដ្ឋសភា ដើម្បីពិភាក្សាពីបញ្ជីបេក្ខជនតំណាងរាស្ត្រទាំងនោះ តែលោក ឡេង ប៉េងឡុង បញ្ជាក់ថា នឹងធ្វើឡើងក្នុងពេលឆាប់ៗនេះ។
ជានីតិវិធី ក្រោយគណៈកម្មាធិការអចិន្ត្រៃយ៍ ទទួលស្គាល់បេក្ខជនតំណាងរាស្ត្រទាំង១១រួចហើយ រដ្ឋសភា នឹងបើកកិច្ចប្រជុំពេញអង្គ ដើម្បីប្រកាសសុពលភាពជូនពួកគេ។ ហើយបន្ទាប់មកទៀត ពួកគេ ត្រូវទៅស្បថនៅក្នុងព្រះបរមរាជវាំង មុននឹងចូលបំពេញការងារជាតំណាងរាស្ត្រ៕
© រក្សាសិទ្ធិដោយ thmeythmey.com