ប្រធានាធិបតីថ្មីស៊ីមបាវ៉េសន្យាបង្រួមក្បាលម៉ាស៊ីនដឹកនាំដើម្បីប្រសិទ្ធភាព និងបន្ថយការចំណាយ

អន្តរជាតិ

ប្រធានាធិបតីថ្មីស៊ីមបាវ៉េសន្យាបង្រួមក្បាលម៉ាស៊ីនដឹកនាំដើម្បីប្រសិទ្ធភាព និងបន្ថយការចំណាយ

30, Nov 2017 , 3:07 pm

រូបភាព

ដោយ: សៅ ផលនិស្ស័យ (Sao Phal Niseiy)

ប្រធានាធិបតីថ្មីស៊ីមបាវ៉េបានប្រកាសនៅដើមសប្តាហ៍ថា លោកនឹងបង្កើតគណៈរដ្ឋមន្ត្រីដែលតូចជាងមុនដោយរំលាយក្រសួង និងស្ថាប័នមួយចំនួន ដែលជួយបង្កើនប្រសិទ្ធិភាពក្នុងការដឹកនាំប្រទេសជាតិផងដែរ។

បន្ទាប់ពីស្បថចូលកាន់តំណែងកាលពីថ្ងៃសុក្រសប្តាហ៍មុន ប្រធានាធិបតីស៊ីមបាវ៉េលោក Emmerson Mnangagwa បានព្យាយាមបង្ហាញទៅប្រជាជនស៊ីមបាវ៉េគ្រប់ស្រទាប់វណ្ណៈថា លោកនឹងបង្កើនប្រសិទ្ធភាពក្នុងការដឹកនាំ និងកម្ចាត់អំពើពុករលួយដែលចាក់ឬសជ្រៅក្នុងសង្គមស៊ីមបាវ៉េនោះ។

ក្នុងជំនួបជាមួយមន្ត្រីជាន់ខ្ពស់ជាលើកដំបូងនៅថ្ងៃអង្គារទី ២៨ខែវិច្ឆិកា លោក Mnangagwa បានថ្លែងថា លោកនឹងរៀបចំបង្កើតគណៈរដ្ឋមន្ត្រីដែលជាក្បាលម៉ាស៊ីនដឹកនាំដែលតូចជាងគណៈរដ្ឋមន្ត្រីមុន ប៉ុន្តែមានប្រសិទ្ធភាពក្នុងការផ្តល់សេវាសាធារណៈផង។

ទីភ្នាក់ងារព័ត៌មាន Xinhua បានស្រង់សម្តីប្រធានាធិបតីខាងលើដូច្នេះ៖«ខ្ញុំកំពុងស្ថិតក្នុងដំណាក់កាល់រៀបចំច្របាច់បញ្ចូលរចនាសម្ព័ន្ធគណៈរដ្ឋមន្ត្រី ដែលវាគួរតែតូចជាមុន។ វានឹងមានការរួមបញ្ចូលក្រសួងមួយចំនួនដើម្បីធានាថា វាមិនមានការត្រួតស៊ីគ្នានៃតួនាទី និងភារកិច្ចជាពិសេសកាត់បន្ថយការចំណាយមិនចាំបាច់ និងធានាប្រសិទ្ធភាពការងារ»។

វាមានការលើកឡើងពីការបង្រួមក្បាលម៉ាស៊ីនដឹកនាំនេះ ដោយសារនៅជំនាន់ លោក រ៉ូបឺត មូហ្កាបេ ស៊ីមបាវ៉េ គណៈរដ្ឋមន្ត្រីរបស់លោកមានរដ្ឋមន្ត្រីមិនតិចជាង ២៥នាក់ឡើយ។

ប្រមុខរដ្ឋស៊ីមបាវ៉េថ្មីនេះបានបន្តថា៖ «រដ្ឋាភិបាលរបស់ខ្ញុំនឹងមិនអត់ឱនចំពោះបញ្ហាការិយាធិបតេយ្យដែលជាបញ្ហាធ្វើឲ្យរាំងស្ទះដល់ការផ្តល់សេវាសាធារណៈដល់ប្រជាជន អ្នកវិនិយោគ និងរាល់ភាគីទាំងអស់ក្នុងប្រទេស»។

ក្រៅពីនេះលោក Mnangagwa បានលើកឡើងពីគោលដៅដែលគណៈរដ្ឋមន្ត្រីលោកត្រូវធ្វើបន្ទាប់ពីត្រូវបានបង្កើតស្រួលបួលហើយនោះ។ រដ្ឋាភិបាលថ្មីនឹងផ្តោតសំខាន់លើដំណោះស្រាយជាក់លាក់មួយដើម្បីជំរុញកំណើនសេដ្ឋកិច្ច បង្កើតការងារ និងបង្កើនចំណូលរបស់ប្រជាពលរដ្ឋផងដែរ។ ប៉ុន្តែគេដឹងច្បាស់ថា វាជារឿងស្មុគស្មាញ និងលំបាកបំផុតមួយសម្រាប់ក្បាលម៉ាស៊ីនដឹកនាំថ្មីដែលចង់ដោះស្រាយបញ្ហាដែលកំពុងកើតឡើងនៅស៊ីមបាវ៉េបច្ចុប្បន្ននេះ។

សូមបញ្ជាក់ថា លោក Mnangagwa ឡើងកាន់អំណាចក្រោយពេលដែលយោធាធ្វើរដ្ឋប្រហារទម្លាល់លោក រ៉ូបឺត មូហ្កាបេ ពីអំណាចកាលពីពាក់កណ្តាលខែវិច្ឆិកានេះ។ មេដឹកនាំថ្មីនេះសន្យាផ្លាស់ប្តូរជោគវាសនាស៊ីមបាវ៉េ ហើយលោកក៏បានដាក់ចេញចំណាត់ការច្រើនដែរដើម្បីដោះស្រាយបញ្ហាអសកម្មនៅក្នុងប្រទេស។ ដូចឃើញដើមសប្តាហ៍នេះដែរលោកក៏បានប្រកាសដាក់ឱសានវាទដល់បណ្តាជនពុករលួយឲ្យប្រមូលទ្រព្យ ឬលុយកាក់ដែលខ្លួនលាក់នៅបរទេសត្រឡប់មកវិញផងដែរ បើមិនដូច្នោះទេពួកគេនឹងត្រូវចាប់ខ្លួន៕