អន្តរជាតិ
អតីតអគ្គលេខាធិការអាស៊ាន ស៊ូរិន ពិតសុវណ្ណ ស្លាប់ដោយសារគាំងបេះដូង
× អតីតអគ្គលេខាធិការអាស៊ាន និងរដ្ឋមន្ត្រីការបរទេសថៃលោក ស៊ូរិន ពិតសុវណ្ណ (Sorin Pitsuwan) បានទទួលមរណភាពក្នុងអាយុ ៦៨ ឆ្នាំនៅថ្ងៃព្រហស្បតិ៍ទី ៣០ ខែវិច្ឆិកានេះដោយសារគាំងបេះដូង។ នេះបើតាមការចុះផ្សាយរបស់សារព័ត៌មានថៃ បាងកកប៉ុស្តិ៍។
លោក ស៊ូរិន ពិតសុវណ្ណ ដែលជាអតីតអគ្គលេខាធិការអង្គការអាស៊ាន និងជាអតីតរដ្ឋមន្ត្រីការបរទេសថៃនោះបានទទួលមរណភាពនៅថ្ងៃព្រហស្បតិ៍នេះដោយសារជំងឺគាំងបេះដូង។ លោកបច្ចុប្បន្នមានវ័យ៦៨ ឆ្នាំ។
បើតាមសារព័ត៌មានថៃបាងកកប៉ុស្តិ៍ លោក ពិតសុវណ្ណ បានដួលនៅពេលដែលលោកត្រៀមឡើងថ្លែងសុន្ទរកថានៅកម្មវិធី Halal Assembly ឆ្នាំ ២០១៧ នាមជ្ឈមណ្ឌលពាណិជ្ជកម្មក្រុងបាងកក។ ក្រោយដួល លោកត្រូវបានគេបញ្ជូនទៅមន្ទីរពេទ្យរាមកំហែង ប៉ុន្តែក្រោយមកក៏មានការប្រកាសថា លោកបានស្លាប់បាត់បង់ជីវិតតែម្តង។
សូមបញ្ជាក់បន្តិចថា លោក ស៊ូរិន ពិតសុវណ្ណ បានបំពេញការងារជាអគ្គលេខាធិកាអាស៊ានពីឆ្នាំ ២០០៨ ដល់ឆ្នាំ ២០១២ ដោយជំនួសតំណែងលោក Ong Keng Yong អគ្គលេខាធិការអាស៊ានដែលជាជនជាតិសិង្ហបុរី។ ក្រៅពីនេះលោកក៏បានបំពេញការងារជារដ្ឋមន្ត្រីការបរទេសរាជាណាចក្រថៃចាប់ពីឆ្នាំ ១៩៩៧ ដល់ឆ្នាំ ២០០១ផងដែរ៕ © រក្សាសិទ្ធិដោយ thmeythmey.com