អន្តរជាតិ
សមាជិកព្រឹទ្ធសភាអូស្ត្រាលីអស់តំណែងព្រោះនិយាយកាន់ជើងចិនក្នុងជម្លោះសមុទ្រចិនខាងត្បូង
× សមាជិកព្រឹទ្ធសភាអូស្ត្រាលីម្នាក់ជាសមាជិកគណបក្សពលករ (ALP) ត្រូវបានប្រធានបក្សបណ្តេញចេញពីតំណែងជាប្រធានគណៈកម្មាធិការព្រឹទ្ធសភា ដោយសារបញ្ចេញយោបល់គាំទ្រចិនក្នុងបញ្ហាជម្លោះសមុទ្រចិនខាងត្បូង។
ប្រធានគណបក្សពលករអូស្ត្រាលីលោក Bill Shorten បានសម្រេចដកបញ្ចប់តំណែងលោក Sam Dastyari ដែលជាប្រធានគណៈកម្មាធិការព្រឹទ្ធសភា និងជាអនុប្រធានផ្នែកវិន័យប្រចាំព្រឹទ្ធសភាផងដែរ។
សារព័ត៌មានអូស្ត្រាលី ABC ផ្សាយថា លោក Bill Shorten បានទូរសព្ទទៅកាន់លោក Dastyari នៅថ្ងៃពុធទី ២៩ វិច្ឆិកា ដោយលោកស្នើសុំឲ្យសមាជិកព្រឹទ្ធសភារូបនេះលាលែងពីតំណែងដោយសារមានជម្លោះថ្មីមួយពាក់ព័ន្ធការបញ្ចេញយោបល់របស់លោកពាក់ព័ន្ធបញ្ហាសមុទ្រចិនខាងត្បូង។ រដ្ឋាភិបាលអូស្ត្រាលីក៏ទាមទារឲ្យលោកលាលែងពីតំណែងជាសមាជិកសភាដែរ។
ប្រធានគណបក្សពលករលោក Shorten បានអះអាងថា ការសម្រេចចិត្តបញ្ចប់តំណែងរបស់សមាជិកព្រឹទ្ធសភាខាងលើគឺដោយសារទង្វើរបសលោកផ្ទុយនឹងគោលនយោបាយរបស់បក្ស។
លោក Shorten បានបញ្ជាក់ដូច្នេះ៖ «វាមិនមែនជាការសម្រចចិត្តដែលខ្ញុំធ្វើឡើងដោយមិនគិតឡើយ។ ខ្ញុំបានប្រាប់លោក Dastyari ហើយថា ការយល់ខុសពីតួនាទីរបស់ខ្លួនក្នុងការផ្តល់យោបល់លើបញ្ហាសមុទ្រចិនខាងត្បូងផ្ទុយនឹងគោលនយោបាយរបស់គណបក្សធ្វើឲ្យលោកបាត់បង់តំណែង»។
តាមពិតទៅលោក Sam Dastyari បានបង្កើតកំហុសឆ្គងនៅពេលដែលលោកផ្តល់យោបល់ក្នុងពេលឃោសនាបោះឆ្នោតឆ្នាំ ២០១៦ ដែលលោកការពារជំហររបសចិនដែលមិនអនុវត្តតាមសេចក្តីសម្រេចរបស់តុលាការមជ្ឈត្តការអន្តរជាតិពាក់ព័ន្ធជម្លោះសមុទ្រចិនខាងត្បូងនោះ។
ប៉ុន្តែលោក Dastyari បានបដិសេធការទាមទារឲ្យលោកលាលែងពីតំណែងនេះដោយសារលោកបានទទួលស្គាល់កំហុស និងបានលាលែងពីតំណែងជាសមាជិកក្បាលម៉ាស៊ីនដឹកនាំបក្សពលករផងដែរកាលពីឆ្នាំមុន។ លោកទទួលស្គាល់ថា កាលនោះអ្នកជំនួញចិនលោក Huang Xiangmo បានផ្តល់អំណោយដល់លោកថែមទៀត៕
Tag:
អូស្ត្រាលី
គណបក្សពលករ
Sam Dastyari
Bill Shorten
© រក្សាសិទ្ធិដោយ thmeythmey.com